କୁଜଙ୍ଗ,୧୯ା୫ (ଡି.ଏନ.ଏ.): କେନ୍ଦ୍ର ସରକାର ମହାତ୍ମା ଗାନ୍ଧୀ ଜାତୀୟ ଗ୍ରାମୀଣ ନିଶ୍ଚିତ କର୍ମ ନିଯୁକ୍ତି ଯୋଜନା (ଏମ୍ଜିଏନ୍ଆର୍ଇଜିଏସ୍)ରେ ଜଣେ ଗରିବ ଲୋକକୁ ବର୍ଷକରେ ଶହେ ଦିନ କାମ ଯୋଗାଇ ଦେବା ପାଇଁ ଏହା ପ୍ରଣୟନ କରିଥିଲେ। ମାତ୍ର ତାହା ଜଗତ୍ସିଂହପୁର ଜିଲା କୁଜଙ୍ଗ ବ୍ଲକରେ ପ୍ରହସନରେ ପରିଣତ ହୋଇଛି। ବିଭିନ୍ନ ପଞ୍ଚାୟତରେ ଅମୃତ ସରୋବର ଓ ମୋ ପୋଖରୀ ଏହି ଯୋଜନାରେ ଖୋଳା ଚାଲିଛି। ହେଲେ ଜବ୍କାର୍ଡଧାରୀ ଶ୍ରମିକଙ୍କ ବଦଳରେ ମେଶିନ୍ ସାହାର୍ଯ୍ୟରେ ପୋଖରୀ ଖୋଯାଉଛି। ଏଭଳି ଦେଖିବାକୁ ମିଳିଛି ବ୍ଲକ ଅନ୍ତର୍ଗତ ପଙ୍କପାଳ ପଞ୍ଚାୟତରେ। ପଞ୍ଚାୟତ କାର୍ଯ୍ୟାଳୟ ସମ୍ମୁଖରେ ଥିବା ଏକ ପୋଖରୀକୁ ଅମୃତ ସରୋବର ଯୋଜନାରେ ସାମିଲ କରାଯାଇଛି। ଏହି କାମକୁ କେତେଜଣ ବ୍ୟକ୍ତି ମେଶିନ୍ ଲଗାଇ ନାମକୁମାତ୍ର ଖୋଳି ପ୍ରାୟ ୧୦ ଲକ୍ଷ ଟଙ୍କା ହଡ଼ପ କରିବା ମସୁଧା କରିଥିବା ଅଭିଯୋଗ ହେଉଛି। ଖାଲି ସେତିକି ନୁହେଁ ପୂର୍ବରୁ ପୋଖରୀ ହୁଡ଼ାରେ ଥିବା ଚାକୁଣ୍ଡା ସମେତ ଅନ୍ୟ ବଡ଼ ଗଛ ସବୁ କାଟି ପଦା କରି ଦିଆଯାଇଛି। ଅନ୍ୟପକ୍ଷେ କାଳେ ଜନସାଧାରଣ ଜାଣିଯିବେ ଉକ୍ତ ପୋଖରୀଟି ଅମୃତ ସରୋବର ଯୋଜନାରେ ଅନ୍ତର୍ଭୃକ୍ତ ହୋଇ ଏମ୍ଜିଏନ୍ଆର୍ଇଜିଏସ୍ରେ ଖୋଳାଯାଉଛି ସେଥି ନିମନ୍ତେ ନାମ ଫଳକ ଉପରେ ଜରିପାଲ ଘୋଡ଼ାଇ ଦିଆଯାଇଥିବା ଦେଖିବାକୁ ମିଳିଛି। ଏ ସମ୍ପର୍କରେ ବିଡିଓ ସୌମ୍ୟଶ୍ରୀ ପାଣିଗ୍ରାହୀଙ୍କୁ ମୋବାଇଲ ନଂ. ୭୦୦୮୬୦୧୧୬୧ରେ ଯୋଗାଯୋଗ କରାଯାଇଥିଲେ ବି ସେ ବାରମ୍ବାର ଫୋନ୍ କାଟି ଦେଇଥିଲେ। ଅନ୍ୟପକ୍ଷରେ ପଙ୍କପାଳ ସରପଞ୍ଚ ସରୋଜ ସେଠୀଙ୍କୁ ପଚାରିବାରେ କ’ଣ କାମ ହେଉଛି ସେ ଜାଣି ନାହାନ୍ତି। ବୁଝିବା ପରେ ଜଣାଇବେ ବୋଲି ସେ କହିଥିଲେ। ଅନ୍ୟପକ୍ଷେ ଦାୟିତ୍ୱରେ ଥିବା କନିଷ୍ଠ ଯନ୍ତ୍ରୀ ମଧୁସ୍ମିତା ମହାନ୍ତିଙ୍କୁ ପଚାରିବାରେ ସେ ନୀରବ ରହିଥିଲେ। ଏଥିପ୍ରତି ଜିଲାପାଳ ଦୃଷ୍ଟି ଦେବାକୁ ସାଧାରଣରେ ଦାବି ହେଉଛି।
