ଭୁବନେଶ୍ୱର, ୨୦।୨(ବ୍ୟୁରୋ): ନ୍ୟାଶନାଲ ଟେଷ୍ଟିଂ ଏଜେନ୍ସି(ଏନ୍ଟିଏ) ଦ୍ୱାରା ପରିଚାଳିତ ଜେଇଇ ମେନ୍ ୨୦୨୩ର ଦ୍ୱିତୀୟ ସେସନ ବା ସେସନ-୨ ଏପ୍ରିଲ ୬ରୁ ୧୨ ମଧ୍ୟରେ ଅନୁଷ୍ଠିତ ହେବ। ଭାରତ ସମେତ ଦେଶ ବାହାରର ୧୭ ସହରରେ ପରୀକ୍ଷା କେନ୍ଦ୍ର ରହିବ। ଏଥିପାଇଁ ପଞ୍ଜୀକରଣ ଆରମ୍ଭ ହୋଇଥିବାବେଳେ ମାର୍ଚ୍ଚ ୧୨ରେ ଏହି ଆବେଦନ ପ୍ରକ୍ରିୟା ଶେଷ ହେବ। ତେବେ କେବେ ଆଡ୍ମିଟ୍ କାର୍ଡ ଉପଲବ୍ଧ ହେବ ଓ କେବେ ରେଜଲ୍ଟ ପ୍ରକାଶ ପାଇବ ସେନେଇ ଖୁବ୍ଶୀଘ୍ର ଜେଇଇ ମେନ୍ ପୋର୍ଟାଲରେ ସୂଚନା ଦିଆଯିବ ବୋଲି ଏନ୍ଟିଏର ଜଣେ ବରିଷ୍ଠ ଅଧିକାରୀ ସୂଚନା ଦେଇଛନ୍ତି।
ସୂଚନାଯୋଗ୍ୟ, ଜେଇଇ ମେନ୍ ସେସନ-୧ରେ ରେକର୍ଡ ସଂଖ୍ୟକ ୯୫.୮୦% ଛାତ୍ରୀଛାତ୍ର ପରୀକ୍ଷା ଦେଇଥିଲେ। ଏହି ପରୀକ୍ଷା ଇଂଲିଶ, ହିନ୍ଦୀ, ଓଡ଼ିଆ ସମେତ ୧୩ଟି ଭାଷାରେ ଅନୁଷ୍ଠିତ ହୋଇଥିଲା। ଗତ ୭ ତାରିଖରେ ଏହାର ରେଜଲ୍ଟ ପ୍ରକାଶ ପାଇଥିଲା। ଏଥିରେ ୨୦ଜଣ ଛାତ୍ରୀଛାତ୍ର ୧୦୦ ପର୍ସେଣ୍ଟାଇଲ ସ୍କୋର୍ ରଖିଥିଲେ। ତେବେ ସେସନ-୨ ପରୀକ୍ଷା ସରିବା ପରେ ଦୁଇଟି ସେସନର ସ୍କୋର୍କୁ ଆଧାର କରି ରେଜଲ୍ଟ ପ୍ରକାଶ କରାଯିବ। ଏହି ରେଜଲ୍ଟରେ ଶ୍ରେଷ୍ଠ ପ୍ରଦର୍ଶନ କରିଥିବା ୨.୬ ଲକ୍ଷ ଛାତ୍ରୀଛାତ୍ର ଜେଇଇ ଆଡଭାନ୍ସଡ୍ ପରୀକ୍ଷା ଦେବା ପାଇଁ ଯୋଗ୍ୟ ବିବେଚିତ ହେବେ। ଜେଇଇ ଆଡଭାନ୍ସଡ୍ରେ ଯେଉଁମାନେ ମନୋନୀତ ହେବେ ସେମାନେ ଦେଶର ୨୩ଟି ଆଇଆଇଟିରେ ଇଞ୍ଜିନିୟରିଂ ନାମ ଲେଖାଇପାରିବେ।