ଭୁବନେଶ୍ୱର ଶୈଳଶ୍ରୀବିହାର ଅଞ୍ଚଳର ଝିଅ ତଥା କିଟ୍ର ଛାତ୍ରୀ ପ୍ରିୟଙ୍କା ସରଙ୍କୁ ନେଇ ଏବେ ସାରା ରାଜ୍ୟରେ ଚର୍ଚ୍ଚା। କାରଣ ଶନିବାର ପ୍ରକାଶ ପାଇଥିବା ଜେଇଇ ମେନ୍ ସେସନ-୨ ପରୀକ୍ଷାରେ ସେ ୯୯.୯୮ ପର୍ସେଣ୍ଟାଇଲ୍ ମାର୍କ ରଖି ଓଡ଼ିଶା ଟପ୍ପର ହୋଇଛନ୍ତି। ଏଥିସହ ସର୍ବଭାରତୀୟ ସ୍ତରରେ ୨୪୩ ର଼୍ୟାଙ୍କ୍ ହାସଲ କରି ପ୍ରଶଂସା ସାଉଣ୍ଟିଛନ୍ତି। ଜଣେ ଆଇଏଏସ୍ ଅଫିସର ହେବାକୁ ଲକ୍ଷ୍ୟ ରଖିଥିବା ପ୍ରିୟଙ୍କାଙ୍କ ଏହି ସଫଳତା ଓ ଭବିଷ୍ୟତକୁ ନେଇ ତାଙ୍କ ସହ ‘ଧରିତ୍ରୀ’ର ସ୍ବତନ୍ତ୍ର ଆଳାପ…।
ଟପ୍ପର ହେବା ପରେ କିପରି ଅନୁଭବ କରୁଛନ୍ତି?
ଜାତୀୟ ସ୍ତରରେ ନିଜକୁ ପରଖିବାର ପ୍ରଥମ ସୋପାନ ହେଉଛି ଜେଇଇ ମେନ୍। ଏଥିରେ ପରିଶ୍ରମର ଫଳ ମିଳିଛି। ବହୁତ ଖୁସି ଲାଗୁଛି। ଏହି ସ୍କୋର୍ ଜେଇଇ ଆଡ୍ଭାନ୍ସ ସହ ଆଗକୁ ବଢିବା ପାଇଁ ମୋତେ ଅଧିକ ପ୍ରୋତ୍ସାହିତ କରିଛି।
କେତେ ସମୟ ପାଠପଢ଼ାକୁ ଦିଅନ୍ତି?
ପ୍ରତିଦିନ ୬ଘଣ୍ଟା କ୍ଲାସ୍ ପରେ ଘରେ ଆଉ ୨/୩ ଘଣ୍ଟା ପଢ଼ାପଢ଼ି କରେ। ପରୀକ୍ଷା ପୂର୍ବରୁ ୨ ମାସ ଘରେ ଅଧିକ ସମୟ ପଢ଼ାପଢ଼ି କରୁଥିଲି। କେବଳ ଡାଉଟ୍ କ୍ଲିୟର ପାଇଁ କ୍ଲାସ୍ କରିବାକୁ ଯାଏ। ବାକି ସମୟ ପଢ଼ାପଢ଼ି କରେ।
କିପରି ଥିଲା, ଫଳାଫଳକୁ ନେଇ କ’ଣ କହିବେ?
ସବୁଥିରେ ଶତପ୍ରତିଶତ ଫଳ ପାଇବାକୁ ଚେଷ୍ଟା ବହୁତ କରିଥିଲି। ଏଥିପାଇଁ ସବୁ ଶିକ୍ଷୟିତ୍ରୀଶିକ୍ଷକଙ୍କର ମଧ୍ୟ ବହୁତ ସହଯୋଗ ରହିଥିଲା। ତେବେ ଗଣିତ ଓ ପଦାର୍ଥ ବିଜ୍ଞାନରେ ୧୦୦ ପର୍ସେଣ୍ଟାଇଲ୍ ସ୍କୋର୍ କରିପାରିଛି।
ପାଇଁ କ’ଣ ପରାମର୍ଶ ଦେବେ?
କେବଳ ପାଠପଢ଼ା ନୁହେଁ, ଯେକୌଣସି କ୍ଷେତ୍ରରେ ସଫଳତା ପାଇବାର ଗୋଟିଏ ମାତ୍ର ଉପାୟ କଠିନ ପରିଶ୍ରମ। ଯେଉଁଥିରେ ଆଗ୍ରହ ନ ଥିବ ସେଥିରେ ସମୟ ନ ଦେଇ ଯେଉଁଥିରେ ଇଚ୍ଛା ହେଉଛି, ସେଇ କ୍ଷେତ୍ରରେ ଦୃଢ଼ ମନୋବଳ ସହ ପରିଶ୍ରମ କରିଚାଲିଲେ ସଫଳତା ନିଶ୍ଚୟ ମିଳିବ।
ଶ୍ରେୟ କାହାକୁ ଦେବେ?
ପ୍ରଥମେ ମୁଁ ମୋ ମାଆଙ୍କୁ ସଫଳତାର ଶ୍ରେୟ ଦେବାକୁ ଚାହିଁବି। ତାଙ୍କ ମାର୍ଗଦର୍ଶନରେ ମୁଁ ଏହି ସଫଳତା ପାଇଛି। ତେବେ ସାନ ଭଉଣୀ ଓ ବାପାଙ୍କର ମଧ୍ୟ ସହଯୋଗ କିଛି କମ୍ ନୁହେଁ। ମୁଁ ଯେତିକି ପରିଶ୍ରମ କରୁଥିଲି, ମୋ ପାଇଁ ଶିକ୍ଷୟିତ୍ରୀଶିକ୍ଷକ ମଧ୍ୟ ସେତିକି ପରିଶ୍ରମ କରୁଥିଲେ। ଏଇ ସଫଳତାର ଶ୍ରେୟ ସମସ୍ତଙ୍କୁ ଦେବାକୁ ଚାହିଁିବି।
କ’ଣ ଲକ୍ଷ୍ୟ ରହିଛି?
ବର୍ତ୍ତମାନ ତ ଭଲ ଆଇଆଇଟିରେ ପଢ଼ିବାକୁ ଚାହଁୁଛି। ଆଗକୁ ଜେଇଇ ଆଡ୍ଭାନ୍ସରେ ଭଲ କରିବାର ଯୋଜନା ରହିଛି। ଏହାପରେ ଆଇଏଏସ୍ ଅଫିସର ହେବାକୁ ଲକ୍ଷ୍ୟ ରହିଛି।
-ରିପୋର୍ଟ: ଅନୁରାଧା, ଭୁବନେଶ୍ୱର
