କେନ୍ଦୁଝର,୨୯।୭ (ନରେଶ ଚନ୍ଦ୍ର ପଟ୍ଟନାୟକ): ସଦର ରେଞ୍ଜ ଅନ୍ତର୍ଗତ ରାଇସୁଆଁ ନିକଟରୁ ବନ ବିଭାଗ ଏକ ଚୋରା କାଠ ବୋଝେଇ ଜିପ୍ ଜବତ କରିଛି। ଏହି ଜିପ୍ ଝାଡଖଣ୍ଡ ଅଞ୍ଚଳରୁ ଚମ୍ପୁଆ ଦେଇ ଆସୁଥିବା ବେଳେ ବନ ବିଭାଗ କର୍ମଚାରୀ ରାଇସୁଆଁ ନିକଟରେ ପିଛା କରିଥିଲେ। ଦୃତଗତିରେ ଯାଉଥିବା ଜିପ୍କୁ ପିଛା କରିବା ବେଳେ ବନ ବିଭାଗ ଜିପ୍ ଦୁର୍ଘଟଣା ଗ୍ରସ୍ତ ହୋଇଥିଲା। ଭୟରେ ଜିପ୍ ଚାଳକ ରାଇସୁଆଁ ସାହି ଭିତରକୁ ଜିପକୁ ପୁରାଇ ଅଧାରାସ୍ତାରେ ଛାଡ଼ି ଫେରାର ହୋଇ ଗଲା। ପିଛା କରୁଥିବା ବନ ବିଭାଗ କର୍ମଚାରୀ କାଠ ବୋଝେଇ ଜିପ୍ଟିକୁ ଜବତ କରି ଅଫିସକୁ ଆଣିଥିଲେ। ଏହି ଚୋରା କାଠ ଜବତ କରିବା ସହ ଗାଡ଼ି ମାଲିକ ଓ ମାଫିଆ ମାନଙ୍କୁ ଚିହ୍ନଟ କରାଯାଉଛି ବୋଲି ରେଞ୍ଜ ଅଧିକାରୀ ବିଜୟ କୁମାର ମହାନ୍ତ ସୂଚନା ଦେଇଛନ୍ତି। ଏହି ଚଢାଉ ବେଳେ ଫରେଷ୍ଟର ପ୍ରଦୀପ କୁମାର ବାରିକ, ଫରେଷ୍ଟ ଗାର୍ଡ ସୁବ୍ରତ ପାତ୍ର, ଫରେଷ୍ଟର ପଳାଶପଙ୍ଗା, ଜୟକୃଷ୍ଣ ଦାସ, ବୁଲୁ ନାହାକ ସାମିଲ ହୋଇଥିଲେ। ଏହି କାଠ ଘଟଗାଁ ଥାନା ସାନ୍ତରାପୁର ଗ୍ରାମକୁ ଯାଉଥିଲା ବୋଲି ପ୍ରାଥମିକ ତଦନ୍ତରୁ ଜଣାପଡିଛି।