ସମ୍ବଲପୁର,୮ା୨(ବ୍ୟୁରୋ): ଝାରସୁଗୁଡ଼ା ଜିଲା ଗାନ୍ଧୀ ଛକରେ ଗତ ୨୯ ତାରିଖରେ ସ୍ବାସ୍ଥ୍ୟମନ୍ତ୍ରୀ ନବ ଦାସଙ୍କୁ ଗୁଳିମାଡ଼ ସମୟରେ ସ୍ଥାନୀୟ ବ୍ରଜରାଜନଗରର ଜୀବନ ନାଏକଙ୍କ ବେକରେ ଏକ ଗୁଳିି ବାଜିଥିଲା। ଘଟଣାର ୯ଦିନ ପରେ ବୁର୍ଲା ଭିମ୍ସାରରେ ଚିକିତ୍ସିତ ହେଉଥିବା ଜୀବନ ସୁସ୍ଥ ହୋଇ ଘରକୁ ଫେରିଛନ୍ତି। ଫେରିବା ସମୟରେ ସେ ପ୍ରଥମେ ମା’ ସମଲେଇଙ୍କଠାରେ ପୂଜାର୍ଚ୍ଚନା କରିଥିଲେ। ଏହି ଅବସରରେ ଗଣମାଧ୍ୟମ ପ୍ରତିନିଧିଙ୍କୁ ସୂଚନା ଦେଇ ଜୀବନ କହିଥିଲେ, ସ୍ବାସ୍ଥ୍ୟମନ୍ତ୍ରୀ ଦାସ (ଦାଦା)ଙ୍କ ଗାଡି ଆସିବାକୁ ଅପେକ୍ଷା କରିଥିଲୁ। ଅଭିଯୁକ୍ତ ଗୋପାଳ ଦାସ ମଧ୍ୟ ସେଠାରେ ଥିଲେ। ଟ୍ରାଫିକ ସମସ୍ୟା ସୁଧାରିବାକୁ ଗୋପାଳଙ୍କୁ କହିଥିଲି। ସେ ଅନ୍ୟ କର୍ମଚାରୀ ଅଛନ୍ତି, ସମସ୍ୟା ଦୂର ହୋଇଯିବ ବୋଲି କହିଥିଲେ। ଏହା ପରେ ମନ୍ତ୍ରୀଙ୍କ କାର୍ ଆସିଥିଲା। ମନ୍ତ୍ରୀ ଓହ୍ଲାଇବା କ୍ଷଣି ତାଙ୍କ ପାଦ ଛୁଇଁ ମୁଣ୍ଡିଆ ମାରିଥିଲି। ଏହି ସମୟରେ କାନପାଖରେ ବୋମ ଫୁଟିବା ଭଳି ଶବ୍ଦ ହୋଇଥିଲା। ମୁଁ ଦୁଇପାଦ ପଛକୁ ଚାଲିଯାଇଥିଲି। ସେତେବେଳକୁ କାର୍ରୁ ବାହାରୁଥିବା ସ୍ବାସ୍ଥ୍ୟମନ୍ତ୍ରୀଙ୍କୁ ଗୁଳିମାଡ଼ ହୋଇ ସାରିଥିଲା ଓ ସେ ରକ୍ତ ଜୁଡୁବୁଡୁ ଅବସ୍ଥାରେ ତଳେ ବେହୋସ ହୋଇ ପଡିଥିଲେ। ମୋ ବେକ ପଛପଟେ ଗୁଳି ବାଜି ଅନ୍ୟ ପଟକୁ ବାହାରି ଯାଇଥିଲା। ଝାରସୁଗୁଡାରେ ପ୍ରାଥମିକ ଚିକିତ୍ସା ପରେ ମୋତେ ବୁର୍ଲା ମେଡିକାଲକୁ ସ୍ଥାନାନ୍ତର କରାଯାଇଥିଲା। ସୂଚନାଥାଉ କି, ଜୀବନ ନାଏକଙ୍କ ପ୍ରକୃତ ଘର ଗଜପତି ଜିଲାର ପାରଳାଖେମୁଣ୍ଡି ଅଞ୍ଚଳରେ। ସେ ବ୍ରଜରାଜନଗର ଅଞ୍ଚଳରେ ରହି ଏକ ସୁରକ୍ଷା ସଂସ୍ଥାରେ କାର୍ଯ୍ୟ କରୁଛନ୍ତି। ପ୍ରାୟ ୮ ମାସ ପୂର୍ବରୁ ସେ ସ୍ବାସ୍ଥ୍ୟମନ୍ତ୍ରୀଙ୍କ ସଂସ୍ପର୍ଶରେ ଆସିଥିଲେ। ମନ୍ତ୍ରୀଙ୍କୁ ଭେଟି ଦୁଃଖ କହିବା ପରେ ସେ ଚାକିରି କରାଇ ଦେଇଥିଲେ ବୋଲି ଜୀବନ କହିଛନ୍ତି।