ଓ୍ବାଶିଂଟନ: ୩୭,୦୦୦ ଫୁଟ୍ ଉଚ୍ଚରେ ଉଡ଼ାଣ କରୁଥିବା ଏକ ବିମାନର ଜଣେ ମହିଳା ଯାତ୍ରୀଙ୍କ କାରନାମା ଏବେ ଚର୍ଚ୍ଚାରେ। ଶନିବାର ଆମେରିକାର ହ୍ୟୁଷ୍ଟନରୁ କଲମ୍ବସ ଅଭିମୁଖେ ଯାତ୍ରା କରୁଥିବା ଏକ ବିମାନର ସାଇଡ୍ ଡୋର୍କୁ ୩୪ ବର୍ଷୀୟା ଏଲୋମ୍ ଅଗବେଗନିନୋଉ ଖୋଲୁଥିଲେ। ଡୋର୍ରେ ବାରମ୍ବାର ନିଜ ମୁଣ୍ଡ ବାଡ଼େଇ ସେ ବାହାରକୁ ଯିବା ପାଇଁ ଉଦ୍ୟମ କରିଥିଲେ। ଏଲୋମ୍ଙ୍କୁ ଜଣେ ଯାତ୍ରୀ ଅଟକାଇବାରୁ ସେ ତାଙ୍କୁ କାମୁଡ଼ିଦେଇଥିଲେ। ଏହାକୁ ନେଇ ଅନ୍ୟ ଯାତ୍ରୀମାନେ ଆତଙ୍କିତ ହୋଇପଡ଼ିଥିଲେ। ଫଳରେ ପାଇଲଟ୍ ବାଧ୍ୟହୋଇ ବିଲ୍ ଆଣ୍ଡ ହିଲାରି କ୍ଲିଣ୍ଟନ ନ୍ୟାଶନାଲ ଏୟାରପୋର୍ଟରେ ବିମାନର ଜରୁରୀ ଅବତରଣ କରାଇଥିଲେ। ଏଥିପାଇଁ ମହିଳାଙ୍କୁ ଗିରଫ କରାଯାଇଥିଲା। ଆମେରିକାର ଆର୍କାନ୍ସାସ୍ ଇଷ୍ଟର୍ନ ଡିଷ୍ଟ୍ରିକ୍ଟ କୋର୍ଟରେ ହାଜର ବେଳେ ଉଡ଼ନ୍ତା ବିମାନରେ ଏପରି କାହିଁକି କରୁଥିଲେ ବୋଲି ବିଚାରପତି ତାଙ୍କୁ ପ୍ରଶ୍ନ କରିଥିଲେ। ଏଲୋମ୍ କହିଥିଲେ, ବହୁ ଦିନ ଧରି ସେ ବିମାନ ଯାତ୍ରା କରି ନ ଥିଲେ। ଯିଶୁଖ୍ରୀଷ୍ଟ ତାଙ୍କୁ ଓହିଓ ଯିବାଥ ପାଇଁ କହିଥିଲେ। ଯିଶୁ ହିଁ ଯାତ୍ରା ମଝିରେ ପ୍ଲେନ୍ର ଡୋର୍ ଖୋଲିବାକୁ ପରାମର୍ଶ ଦେଇଥିଲେ।