ବ୍ରହ୍ମପୁର,୧୩।୧୦(ସୁବାସ ଚନ୍ଦ୍ର ପାଢ଼ୀ): ବଡ଼ବଜାର ଥାନା ଅଧୀନ ହର୍ଷ ବିହାରରେ ରହୁଥିବା ଜଣେ ବରିଷ୍ଠ ନାଗରିକଙ୍କ ଘରୁ ଏକ ଲୁଟେରା ଗ୍ୟାଙ୍ଗ କଳାକନା ବୁଲାଇଛନ୍ତି। ଏନେଇ ଘର ମାଲିକ ଭରତ ସାହୁ(୬୩) ବଡ଼ବଜାର ଥାନାରେ ଅଭିଯୋଗ କରିଛନ୍ତି। ପୋଲିସ ଏକ ମାମଲା(ନଂ.୩୮୯/୨୩) ରୁଜୁ କରି ଅଞ୍ଚଳରେ ଲାଗିଥିବା ସିସି ଟିଭି ଫୁଟେଜ ସଂଗ୍ରହ କରି ତଦନ୍ତ ଚଳାଇଛି। ଅନ୍ୟପକ୍ଷେ ପୋଲିସ ନିକଟରେ ଜେଲରୁ ଜାମିନରେ ଆସିଥିବା କେତେକ ପେଷାଦାର ଲୁଟେରାଙ୍କ ଉପରେ ନଜର ରଖିଛି।
ମିଳିଥିବା ସୂଚନା ମୁତାବକ, ଗତ ସେପ୍ଟମ୍ବର ୨୭ ତାରିଖରେ ଭରତ ତାଙ୍କ ପରିବାର ସହ କୌଣସି କାମରେ ଦିଲ୍ଲୀ ଯାଇଥିଲେ। ଯିବା ପୂର୍ବରୁ ସେ ଘରେ ତାଲା ପକାଇବା ସହ ଗ୍ରୀଲରେ ମଧ୍ୟ ତାଲା ଦେଇଥିଲେ। ସେ ଗତ ୧୧ ତାରିଖ ରାତିରେ ଘରକୁ ଫେରିଥିଲେ। ସେତିକିବେଳେ ଘର ଗ୍ରୀଲ ତାଲା ଭଙ୍ଗା ଯାଇଥିବା ବେଳେ ଘରର ମୁଖ୍ୟ କବାଟ ମଧ୍ୟ ଖୋଲା ଥିବା ଦେଖିବାକୁ ପାଇଥିଲେ। ଭାରତ ଏବଂ ତାଙ୍କ ପରିବାର ଲୋକ ଭିତରକୁ ଯାଇ ଦେଖିବା ବେଳେ ଅଲମାରୀ ଖୋଲା ରହିଥିଲା। ଏପରିକି ଘର ଭିତରେ ବିଭିନ୍ନ ଜିନିଷ ବିଛେଇ ହୋଇ ପଡ଼ିଥିଲା। ଏପରିକି ଆଲମାରୀରେ ଥିବା ଦୁଇଟି ସୁନା ମୁଦି, ଦୁଇ ହଳ ସୁନା କାନଫୁଲ, କିଛି ରୁପା ସାମଗ୍ରୀ ସହ ନଗଦ ୩୦ ହଜାର ଟଙ୍କା ନ ଥିଲା। ଏନେଇ ସେ ବଡବଜାର ଥାନା ପୋଲିସକୁ ଖବର କରିଥିଲେ। ପୋଲିସ ଘଟଣା ସ୍ଥଳରେ ପହଞ୍ଚି ସାଇଣ୍ଟିଫିକ ସହାୟତାରେ ଛାନ୍ଭିନ୍ ଚଳାଇଛି। ସହରରେ ଏବେ ଦିନକୁ ଦିନ ଚୋରି ବଢ଼ିବା ପୋଲିସ ପାଇଁ ଏକ ଚ୍ୟାଲେଞ୍ଜ ସୃଷ୍ଟି କରିଛି।