କାନବେରା,୧୫ ।୭: କେବଳ ମହିଳା ନୁହେଁ ଏମିତି କେତେଜଣ ପୁରୁଷ ଅଛନ୍ତି ଯେଉଁମାନେ ଗହଣା ପିନ୍ଧିବାକୁ ପସନ୍ଦ କରି ଥାଆନ୍ତି । ତାହା ପୁଣି ଦାମୀ । କେହି କେହି ସୁନା ଅଳଙ୍କାର ପସନ୍ଦ କରୁଥିବା ବେଳେ ଆଉ କେହି ହୀରା, ପୁଣି କିଏ ରୂପା ଆଉ କେହି ପ୍ଲାଟିନମର ଅଳଙ୍କାର ବି ପସନ୍ଦ କରି ଥାଆନ୍ତି । ହେଲେ ଅଷ୍ଟ୍ରେଲିଆରେ ଏମିତି ଜଣେ ମହିଳା ଅଛନ୍ତି ତାଙ୍କ ଗହଣା ସୌକ ଶୁଣିଲେ ଯେକେହି ଆଶ୍ଚର୍ଯ୍ୟ ହେବା ସ୍ୱାଭାବିକ କଥା । ସେ ମୃତଦେହର ଦାନ୍ତ ଓ କେଶରୁ ଗହଣା ତିଆରି କରି ପିନ୍ଧିବାକୁ ପସନ୍ଦ କରନ୍ତି ଆଉ ଏହା ତାଙ୍କର ହବି ବୋଲି ସେ କୁହନ୍ତି । ଜ୍ୟାକି ୱିଲିୟମ୍ସ ଗେବ ମେଟଲମ ଜୁଏଲର୍ସର ମାଲିକାଣୀ । ସେ ମୃତ ଲୋକଙ୍କ ଦାନ୍ତରୁ ମୁଦି, ଚୁଡି ଓ ହାର ତିଆରି କରି ବିକ୍ରି କରିଥାଆନ୍ତି । ଆଉ କିଛି ଜୁଏଲାରୀ ମାନବ ଶରୀରର ଅବଶେଷରୁ ବି ପ୍ରସ୍ତୁତ କରିଥାନ୍ତି ଜ୍ୟାକି । ପୂର୍ବରୁ ଜ୍ୟାକି ଏକ କବର ସ୍ଥାନରେ ମାଳି ଭାବେ କାମ କରୁଥିଲେ । ଏବେ କିନ୍ତୁ ଏଭଳି ଏକ ଜୁଏଲାରୀ ଦୋକାନର ମାଲିକାଣୀ । ସେ କୁହନ୍ତି ସେ ସାମାନ୍ୟ ଅସୁସ୍ଥ । କାରଣ ସୁସ୍ଥ ଲୋକ କେବେହେଲେ ଏମିତି ଅର୍ଥାତ୍ ମାନବ ଅବଶେଷରୁ ଗହଣା ତିଆରି କରିବା କଥା ଚିନ୍ତା କରିପାରିବନି । ହେଲେ ସେ ଏମିତି ଗହଣା ତିଆରି କରିବା ଫଳରେ ପ୍ରିୟଜନଙ୍କ ମୃତ୍ୟୁକୁ ସହଜରେ ଭୁଲି ପାରୁଥିବା ସେ ପ୍ରକାଶ କରିଛନ୍ତି । ଜ୍ୟାକି କୁହନ୍ତି ଗ୍ରାହକଙ୍କ ଅର୍ଡର ଅନୁଯାୟୀ ସେମାନଙ୍କ ପ୍ରିୟଜନଙ୍କ ମୃତ୍ୟୁ ପରେ ସେହି ମୃତଦେହରୁ ଦାନ୍ତ ଓ କେଶ ସଂଗ୍ରହକରି ସେ ଗହଣା ତିଆରି କରନ୍ତି । ହେଲେ ଏଥିରେ ମୃତଲୋକଙ୍କ ପରିବାର ସଦସ୍ୟଙ୍କ ସହମତି ନିଶ୍ଚିତ ଭାବେ ଥାଏ । ଏମିତି କରି କେତେକ ଲୋକେ ପରିଜନଙ୍କ ମୃତ୍ୟୁ ଦୁଃଖକୁ ସହଜରେ ଭୁଲି ପାରନ୍ତି ବୋଲି ସେ କୁହନ୍ତି । ଜ୍ୟାକି କୁହନ୍ତି ମୁଁ ଏପରି କରିବା ପଛର କାରଣ ହେଉଛି ଲୋକଙ୍କୁ ଦୁଃଖ ସମୟରେ ସେମାନଙ୍କୁ ସାମାନ୍ୟ ଖୁସି ଦେବାକୁ ଚେଷ୍ଟା କରିବା ।