ବ୍ରହ୍ମପୁର ଅଫିସ,୪ା୧୧: ଟାଉନ ଥାନା ଅନ୍ତର୍ଗତ ଗାନ୍ଧୀନଗରର ଏକ ତାଲା ବନ୍ଦ ଘରେ ଲୁଟିଆଗ୍ୟାଙ୍ଗ ଗତ ସେପ୍ଟେମ୍ବର ୨୧ତାରିଖରେ କଳାକାନା ବୁଲାଇଥିଲେ। ତେବେ ଏ ଯାଏ ବି ପୋଲିସକୁ ଏହାର ସୁରାକ ମିଳିପାରିନାହିଁ। ପୋଲିସ କେବଳ ଅଞ୍ଚଳର କେତେଜଣ ଯୁବକଙ୍କୁ ଥାନାକୁ ଆଣି ପଚରାଉଚରା କରିଥିବା ବେଳେ ତଦନ୍ତରେ ଅଗ୍ରଗତି ହୋଇନି। ଅନ୍ୟପଟେ ଚୋରି ସୁନା ଗହଣା ଓ ଟଙ୍କା ମିଳିବ କି ନାହିଁ ଏନେଇ ଗୃହକର୍ତ୍ତା ସନ୍ଦେହରେ ରହିଥିବା କହିଛନ୍ତି। ସେପ୍ଟେମ୍ବର ୨୦ତାରିଖ ରାତିରେ ଗାନ୍ଧିନଗରରେ ରହୁଥିବା ଦୀପକ ପାଣିଗ୍ରାହୀ ଘରେ ତାଲା ପକାଇ କୌଣସି କାମରେ ବାହାରକୁ ଯାଇଥିଲେ। ୨୨ତାରିଖ ଅପରାହ୍ନରେ ସେ ଫେରିବାରେ ଘରତାଲା ଭଙ୍ଗା ଯାଇଥିବା ଦେଖିଥିଲେ। ଘରେ ଥିବା ଆଲମିରା ଭଙ୍ଗା ମଧ୍ୟ ଯାଇଥିଲା। ସେଥିରେ ଥିବା ପ୍ରାୟ ୧ଲକ୍ଷ ଟଙ୍କା ଓ ୧୨ ତୋଳାର ସୁନାହାର, ଚେନ୍, ମୁଦି ଏଭଳି ପ୍ରାୟ ୧୨ ତୋଳା ସୁନା ଗହଣା ଓ ରୁପା ଜିନିଷ ଲୁଟ ହୋଇଥିଲା। ଗୃହକର୍ତ୍ତା ଦୀପକଙ୍କ ଅଭିଯୋଗ ପ୍ରକାରେ ଥାନାରେ ନଂ.୨୬୫/୨୨ରେ ଏକ ମାମଲା ରୁଜୁ ହୋଇଥିଲା।