ବଲାଙ୍ଗୀର, ୮ା୭(ବୀରେନ୍ଦ୍ର କୁମାର ଝାଙ୍କର): ଝାଡ଼ଖଣ୍ଡ ମୁଖ୍ୟମନ୍ତ୍ରୀ ହେମନ୍ତ ସୋରେନ୍ ଶୁକ୍ରବାର ବଲାଙ୍ଗୀର ଆସି ଏକ ଦ୍ୱାଦଶାହ କାର୍ଯ୍ୟକ୍ରମରେ ଯୋଗଦେଇଥିଲେ। ଝାଡ଼ଖଣ୍ଡ ହାଇକୋର୍ଟ ମୁଖ୍ୟ ବିଚାରପତି ଜଷ୍ଟିସ୍ ସଞ୍ଜୟ କୁମାର ମିଶ୍ରଙ୍କ ପିତା ମାର୍କଣ୍ଡ ମିଶ୍ର ଓ ମାତା ଜ୍ୟୋତିର୍ମୟୀ ମିଶ୍ରଙ୍କ ଦ୍ୱାଦଶାହ କାର୍ଯ୍ୟକ୍ରମରେ ମୁଖ୍ୟମନ୍ତ୍ରୀ ସୋରେନ୍ ଯୋଗଦେଇ ଦିବଙ୍ଗତଙ୍କୁ ଶ୍ରଦ୍ଧାଞ୍ଜଳି ଜଣାଇଥିଲେ। ମୁଖ୍ୟମନ୍ତ୍ରୀ ସୋରେନ୍ ରାଞ୍ଚତ୍ସ୍ଥିତ ବିର୍ସା ମୁଣ୍ଡା ଉଡ଼ାଜାହାଜ ପଡିଆରୁ ଏକ ସ୍ବତନ୍ତ୍ର ବିମାନ ଯୋଗେ ବଲାଙ୍ଗୀର ଜିଲା ତୁଷରାସ୍ଥିତ ଉଡାଜାହାଜ ପଡିଆକୁ ଆସିଥିଲେ। ସେଠାରୁ ସେ ସଡକ ପଥରେ ବଲାଙ୍ଗୀର ଆସି ହୋଟେଲ ସେଲିବ୍ରେସନ୍ ଠାରେ ଆୟୋଜିତ ଦ୍ୱାଦଶାହ କାର୍ଯ୍ୟକ୍ରମରେ ଯୋଗଦେଇଥିଲେ। ଏହି ଅବସରରେ ମୁଖ୍ୟମନ୍ତ୍ରୀ ସୋରେନ୍ ଝାଡ଼ଖଣ୍ଡ ହାଇକୋର୍ଟ ମୁଖ୍ୟ ବିଚାରପତି ଜଷ୍ଟିସ ମିଶ୍ରଙ୍କ ସହ ତାଙ୍କ ପରିବାରବର୍ଗଙ୍କୁ ଭେଟି ସମବେଦନା ଜଣାଇଥିଲେ। କିଛିଦିନ ତଳେ ଜଷ୍ଟିସ ମିଶ୍ରଙ୍କ ମାତାଙ୍କ ପରଲୋକ ହୋଇଥିଲା। ତା’ର କିଛି ଦିନ ପରେ ତାଙ୍କ ପିତାଙ୍କ ପରଲୋକ ହୋଇଥିଲା। ଏଠାକୁ ଆସି ଶ୍ରଦ୍ଧାଞ୍ଜଳି ଜଣାଇଛି ବୋଲି କହିଥିଲେ। ସେଠାରେ କିଛି ସମୟ ରହିବା ପରେ ସେ ପୁଣି ତୁଷରା ଉଡାଜାହାଜ ପଡିଆକୁ ଯାଇ ସେଠାରୁ ରାଞ୍ଚତ୍ ଅଭିମୁଖେ ଫେରିଥିବା ଜଣାପଡିଛି। ଏହି କାର୍ଯ୍ୟକ୍ରମରେ ସ୍ବାସ୍ଥ୍ୟମନ୍ତ୍ରୀ ନିରଞ୍ଜନ ପୂଜାରୀ, ଜଳସମ୍ପଦ ମନ୍ତ୍ରୀ ଟୁକୁନି ସାହୁ, ବଲାଙ୍ଗୀର ଜିଲାପାଳ ଚଞ୍ଚଳ ରାଣା, ଏସ୍ପି ଋଷିକେଶ ଖିଲାରି, ପୂର୍ବତନ ମନ୍ତ୍ରୀ ଅନଙ୍ଗ ଉଦୟ ସିଂଦେଓ ବିଭିନ୍ନ କୋର୍ଟର ଜଷ୍ଟିସ୍ ଓ ଅନ୍ୟ ଗଣ୍ୟମାନ୍ୟ ବ୍ୟକ୍ତି ଉପସ୍ଥିତ ଥିଲେ। ବଲାଙ୍ଗୀର ଟିକ୍ରାପଡା ସ୍ଥିତ ବାସଭବନରେ ଗତ ଜୁନ୍ ୧୭ ତାରିଖ ଜଷ୍ଟିସ୍ ମିଶ୍ରଙ୍କ ମାତା ଜ୍ୟୋତିର୍ମୟୀଙ୍କ ବିୟୋଗ ଘଟିଥିଲା। ଏହାପରେ ଗତ ଜୁନ ୨୬ରେ ତାଙ୍କ ପିତା ବିଶିଷ୍ଟ ଆଡଭୋକେଟ୍୍ ମାର୍କଣ୍ଡ ମିଶ୍ରଙ୍କ ପରଲୋକ ଘଟିଥିଲା।