ରାଞ୍ଚି, ୨୧।୯: ଝାଡ଼ଖଣ୍ଡର ଶିକ୍ଷା ମନ୍ତ୍ରୀ ଜଗରନାଥ ମୋହତ ନିଜ ପ୍ରତିଜ୍ଞା ପୂରଣ କରିବାକୁ ଯାଉଛନ୍ତି। ରାଜ୍ୟରେ ଚଳିତ ବର୍ଷ ୧୦ମ ଓ ଦ୍ୱାଦଶ ଶ୍ରେଣୀ ପରୀକ୍ଷାରେ ଟପ୍ପରଙ୍କ ଲାଗି ୨ଟି ଅଲ୍ଟୋ କାର୍ କିଣିଛନ୍ତି। ବୁଧବାର ଏକ ସମାରୋହରେ ସେ ଏହି ୨ଟି କାର ଟପ୍ପରଙ୍କୁ ପ୍ରଦାନ କରିବେ ବୋଲି ଜଣାପଡ଼ିଛି। ନିକଟରେ ଝାଡ଼ଖଣ୍ଡ ଏକାଡେମୀ କାଉନସିଲ୍ ଦ୍ୱାରା ଆୟୋଜିତ ପରୀକ୍ଷା ଫଳ ଘୋଷଣା ଅବସରରେ ଶିକ୍ଷା ମନ୍ତ୍ରୀ ଜଗରନାଥ କହିଥିଲେ, ଯେ ଉଭୟ ୧୦ମ ଓ ଦ୍ୱାଦଶ ଶ୍ରେଣୀର ଟପ୍ପରଙ୍କୁ ସେ କାର୍ ଦେବେ। ବର୍ତ୍ତମାନ ସେ ତାଙ୍କ ପ୍ରତିଜ୍ଞା ପୂରଣ କରିବାକୁ ଯାଉଛନ୍ତି। ନୂଆ କାର୍ ୨ଟି ସହ ଶିକ୍ଷା ମନ୍ତ୍ରୀ ଏକ ଫଟୋ ତାଙ୍କ ଟୁଇଟର୍ ପୃଷ୍ଠାରେ ପୋଷ୍ଟ କରିଛନ୍ତି। ଯେଉଁଥିରେ ସେ କହିଛନ୍ତି, ଏହା ସେମାନଙ୍କ ପାଇଁ, ଯେଉଁମାନେ ରାଜ୍ୟ ମାଟ୍ରିକ ଓ ଦ୍ୱାଦଶ ପରୀକ୍ଷାରେ ସର୍ବାଧିକ ନମ୍ବର ରଖି ପ୍ରଥମ ସ୍ଥାନ ହାସଲ କରିଛନ୍ତି। ଏଠାରେ ଉଲ୍ଲେଖଯୋଗ୍ୟ, ମାଟ୍ରିକ ପରୀକ୍ଷାରେ ନେତରହାଟ ରେସିଡେନ୍ସିଆଲ ସ୍କୁଲର ମନୀଷ କୁମାର କଟିୟାର ଏବଂ ଦ୍ୱାଦଶ ଶ୍ରେଣୀ ପରୀକ୍ଷାରେ ଅମିତ୍ କୁମାର ଟପ୍ପର ହୋଇଥିଲେ।