ଗୋଡ୍ଡା,୫।୯: ଝାଡ଼ଖଣ୍ଡର ଗୋଡ୍ଡା ଅଞ୍ଚଳରେ ଏକ ରୋଚକ ପ୍ରେମ କାହାଣୀ ସାମ୍ନାକୁ ଆସିଛି। ଉକ୍ତ ଅଞ୍ଚଳର ଜଣେ ଓକିଲଙ୍କ ସହ ବିଚାରପତି ପ୍ରେମ ବିବାହ କରିଛନ୍ତି। ବିଚାରପତି ଜଣଙ୍କ ୫୯ବର୍ଷର ହୋଇଥିବା ବେଳେ ଓକିଲ ଜଣଙ୍କ ତାଙ୍କଠାରୁ ୯ବର୍ଷ ସାନ ବୋଲି ଜଣାପଡ଼ିଛି। ସବୁଠାରୁ ବଡ଼ କଥା ହେଲା ଉକ୍ତ ବିଚାରପତି ଗୋଖାଦ୍ୟ ଦୁର୍ନିତୀ ମାମଲାରେ ଆରଜେଡ଼ି ସୁପ୍ରିମୋ ଲାଲୁ ପ୍ରସାଦ ଯାଦବଙ୍କ ଶୁଣାଣି କରି ତାଙ୍କୁ ଦଣ୍ଡିତ କରିଥିଲେ। ଏହାପରେ ସେ ଚର୍ଚ୍ଚାର ପରିସରକୁ ଆସିଥିଲେ। ଆସନ୍ତା ବର୍ଷ ସେ ଅବସର ନେବାକୁ ଯାଉଛନ୍ତି। ସୂଚନାଯୋଗ୍ୟ, ଝାଡ଼ଖଣ୍ଡରେ କଠୋର ବିଚାରପତି ଭାବେ ବେଶ୍ ଜଣାଶୁଣା ଶିବପାଲ ସିଂହ(୫୯) ଭାଜପା ନେତ୍ରୀ ତଥା ଓକିଲ ନୂତନ ତିଓ୍ବାରୀ(୫୦)ଙ୍କୁ ବିବାହ କରିଛନ୍ତି। ଝାଡ଼ଖଣ୍ଡରେ ନୂତନଙ୍କୁ ଭାଜପାର ଟାଣୁଆ ନେତା ବୋଲି ଜଣାଯାଏ। ପ୍ରାୟ ଦୁଇ ଦଶନ୍ଧି ପୂର୍ବରୁ ଶିବପାଲଙ୍କ ପତ୍ନୀଙ୍କ ଦେହାନ୍ତ ହୋଇଥିବା ବେଳେ କିଛି ବର୍ଷ ପୂର୍ବେ ନୂତନଙ୍କ ସ୍ବାମୀଙ୍କର ମଧ୍ୟ ପରଲୋକ ଘଟିଛି। ଶିବପାଲଙ୍କ ୨ପୁତ୍ର ଥିବା ବେଳେ ନୂତନଙ୍କ ଗୋଟିଏ ପୁଅ ରହିଛି। ତେବେ ଦୁହିଁଙ୍କ ବିବାହ ପରିବାରର ସହମତିରେ ହୋଇଥିବା ବେଳେ ଏହା ଏବେ ସ୍ଥାନୀୟ ଅଞ୍ଚଳରେ ଚର୍ଚ୍ଚାର ବିଷୟ ପାଲଟିଛି।