ଦେବଘର,୧୨ ।୪: ଝାଡଖଣ୍ଡର ଦେବଘର ରୋପୱେରେ ଫସି ରହିଥିବା ଲୋକଙ୍କ ଉଦ୍ଧାର କାର୍ଯ୍ୟ ଜାରି ରହିଛି । ଏବେ ପର୍ଯ୍ୟନ୍ତ ୩୭ ଜଣଙ୍କୁ ଉଦ୍ଧାର କରାଯାଇଥିବା ବେଳେ ଆହୁର ୧୧ ଜଣ ଫସି ରହିଛନ୍ତି । ଅକାଶ ଏବଂ ପୃଥିବୀ ମଧ୍ୟରେ ଈଶ୍ୱରଙ୍କୁ ଜୀବନ ଭିକ୍ଷା କରୁଥିବା ଲୋକଙ୍କ ମଧ୍ୟରୁ ଆଉ ୧୧ ଜଣଙ୍କୁ ଉଦ୍ଧାର କରିବା ପାଇଁ ମଙ୍ଗଳବାର ସକାଳୁ ଉଦ୍ଧାର କାର୍ଯ୍ୟ ଆରମ୍ଭ କରାଯାଇଛି । ଏବେ ପ୍ରଶ୍ନ ଉଠିଛି ଏତେବଡ ଦୁର୍ଘଟଣା ଘଟିଲା କିପରି । ଯେଉଁ ଟ୍ରଲିରେ ପ୍ରତିଦିନ ଶହ ଶହ ଶ୍ରଦ୍ଧାଳୁ ଝାଡଖଣ୍ଡର ଧାର୍ମିକ ନଗରୀ ଦେବଘର ପାହାଡ ଉପରେ ନିର୍ମିତ ମନ୍ଦିର ପର୍ଯ୍ୟନ୍ତ ଯାଇଥାଆନ୍ତି ସେଥିରେ ତ୍ରୁଟି ହେଲା କିପରି ।
ସୂଚନାଯୋଗ୍ୟ, ରବିବାର ଏକାସାଙ୍ଗେ କିଛି ଟ୍ରଲିକୁ ଶ୍ରଦ୍ଧାଳୁଙ୍କ ସହ ପଠାଇ ଦିଆଯାଇଥିଲା । ହଠାତ୍ ରୋପୱେ କେବଲ ଉପରେ ଲୋଡ ପଡିଯାଇଥିଲା । ଫଳରେ ଗୋଟିଏ ରୋଲର ଭାଙ୍ଗି ଯାଇଥିଲା । ପ୍ରତ୍ୟେକ୍ଷଦର୍ଶୀଙ୍କ କହିବା ଅନୁଯାୟୀ, ରୋଲର ଭାଙ୍ଗି ଯିବାରୁ ୩ ଟ୍ରଲି ପାହାଡରେ ପିଟି ହୋଇ ଯାଇଥିଲେ । ସେଥିମଧ୍ୟରୁ ୨ଟି ଟ୍ରଲି ତଳକୁ ଖସି ପଡିଥିଲା । ଏହାସବୁ ଏତେ ଶୀଘ୍ର ହୋଇଥିଲା ଯେ କେହି କିଛି ବୁଝି ପାରି ନ ଥିଲେ । କେତେଜଣ ଶ୍ରଦ୍ଧାଳୁ ଟ୍ରଲିରୁ ବାହାରି ତଳେ ପଡିଯାଇଥିଲେ ।
ଏବେ ପ୍ରାୟ ୨୫୦୦ ଫୁଟ ଉପରେ ପାହାଡ ମଝିରେ ଫସି ରହିଥିବା ଲୋକଙ୍କ ଉଦ୍ଧାର କାର୍ଯ୍ୟ ଜାରି ରହିଥିବା ବେଳେ ସେମାନଙ୍କ ନିକଟକୁ ଡ୍ରୋନ୍ ସାହାଯ୍ୟରେ ଖାଦ୍ୟ ସାମଗ୍ରୀ ପଠାଯାଉଥିବା ଜଣାପଡିଛି । କାରଣ ୨ ଦିନ ହେବ ଏତେ ଉଚ୍ଚରେ ଫସି ରହିଥିବା ଲୋକେ ବିନା ଖାଦ୍ୟ ପାନୀୟରେ ଅସୁସ୍ଥ ହୋଇଯିବାର ସମ୍ଭାବନା ରହିଛି ।