ଭାରତୀୟ ମହିଳା କ୍ରିକେଟ ଟିମ୍ର ଷ୍ଟାର ବୋଲର୍ ହେଉଛନ୍ତି ଝୁଲନ ଗୋସ୍ବାମୀ। ସେ ମହିଳା ଏକଦିବସୀୟ ମ୍ୟାଚ୍ରେ ସବୁଠାରୁ ଅଧିକ ଉଇକେଟ ନେଇଥିବା ଖେଳାଳି। ୧୮୫ ମ୍ୟାଚ୍ରେ ୨୨୫ଟି ଉଇକେଟ ନେଇଛନ୍ତି ସେ। ଏହାଛଡ଼ା ଟି୨୦ ମ୍ୟାଚ୍ରେ ସେ ୫୬ଟି ଉଇକେଟ ନେଇଛନ୍ତି। ଝୁଲନଙ୍କ ଏହି ସଫଳତା କଠିନ ପରିଶ୍ରମର ଫଳ।
ପଶ୍ଚିମବଙ୍ଗର ଚକଦାହାରୁ ଆସିଥିବା ଝୁଲନ କଲିକତାର ଇଡେନ ଗାର୍ଡେନ୍ ପଡ଼ିଆରେ ଦେଖିଥିବା ଏକ ମ୍ୟାଚ୍ ତାଙ୍କ ଜୀବନର ଗତିପଥ ବଦଳାଇଦେଇଥିଲା। ମାତ୍ର ୧୫ ବର୍ଷ ବୟସରୁ କ୍ରିକେଟ ଖେଳିବା ଆରମ୍ଭ କରିଥିଲେ ଝୁଲନ। ଚକଦାହାରୁ ୮୦ କିମି ଦୂର ଯାତ୍ରା କରି ପ୍ରତିଦିନ ସେ ଟ୍ରେନିଂ ପାଇଁ ଯାଉଥିଲେ। ସକାଳ ୪ଟାରୁ ତାଙ୍କୁ ଟ୍ରେନ୍ ପାଇଁ ଅପେକ୍ଷା କରିବାକୁ ପଡ଼ୁଥିଲା। ସେତେବେଳେ ସେ କଲିକତାରୁ ଖେଳିବା ଆରମ୍ଭ କରିଥିଲେ।
୧୯୯୭ରେ ମହିଳା ବିଶ୍ୱକପ୍ ଦେଖିବାର ସୌଭାଗ୍ୟ ମିଳିଥିଲା ଝୁଲନଙ୍କୁ। ଏହି ମ୍ୟାଚ୍ ଅଷ୍ଟ୍ରେଲିଆ-ନ୍ୟୁଜିଲାଣ୍ଡ ମଧ୍ୟରେ ଖେଳାଯାଉଥିଲା। ଉକ୍ତ ମ୍ୟାଚ୍ରେ ଝୁଲନ୍ ‘ବଲ୍ ଗର୍ଲ’ ଥିଲେ। ସେଠାରେ ସେ ବିଶ୍ୱର ପ୍ରତିଭାଶାଳି ମହିଳା କ୍ରିକେଟରମାନଙ୍କୁ ଦେଖିଥିଲେ। ଏହା ତାଙ୍କୁ ପ୍ରେରଣା ଯୋଗାଇଥିଲା। ଏହି ମ୍ୟାଚ୍ ପୂର୍ବରୁ ସେ କେବଳ କ୍ରିକେଟ ଖେଳୁଥିଲେ। ମ୍ୟାଚ୍ ଦେଖିବା ପରେ ସେ କ୍ରିକେଟକୁ ନିଜର କ୍ୟାରିୟର କରିବା ନିଷ୍ପତ୍ତି ନେଇଥିଲେ। ପରେ ୨୦୦୨ରେ ସେ ଚେନ୍ନାଇରେ ଇଂଲଣ୍ଡ ବିପକ୍ଷରେ ଭାରତ ପକ୍ଷରୁ ପ୍ରଥମ ଏକଦିବସୀୟ ମ୍ୟାଚ୍ ଖେଳିଥିଲେ।