ସୁନ୍ଦରଗଡ଼,୧।୯(ଡି.ଏନ୍.ଏ.): ପଶ୍ଚିମ ଓଡିଶାର କୃଷି ଭିତ୍ତିକ ଗଣପର୍ବ ନୂଆଁଖାଇ ମହାନ ସଂସ୍କୃତି, ପରମ୍ପରା ଓ ଭାଇଚାରାର ଏକ ଅପୂର୍ବ ନିଦର୍ଶନ। ଏହି ଗଣପର୍ବକୁ ଅଭିନବ ଢଙ୍ଗରେ ପାଳନ କରିଆସୁଛନ୍ତି ସୁନ୍ଦରଗଡ଼ ଜିଲା ଲେଫ୍ରିପରା ବ୍ଲକର ଝୁରିମାଲ ଗ୍ରାମବାସୀ। ଝୁରିମାଲ ଗାଁର ପ୍ରତ୍ୟେକ ପରିବାର ଏକାଠି ସାମୂହିକ ଭାବେ ନୂଆଁଖାଇ ପାଳନ କରି ଭାଇଚାରା, ଏକତା, ସଦ୍ଭାବନା ଓ ସଂହତିର ଅନନ୍ୟ ଉଦାହରଣ ସୃଷ୍ଟି କରିଛନ୍ତି। ଗୁରୁବାର ପବିତ୍ର ନୂଆଁଖାଇ ଉପଲକ୍ଷେ ସକାଳ ୧୦ଟା ୪୫ରେ ଗ୍ରାମର ଆରାଧ୍ୟ ଦେବତା ସଂକଟମୋଚନ ହନୁମାନବୀରଙ୍କ ମନ୍ଦିରରେ ନବାନ୍ନ ଅର୍ପଣ କରାଯିବା ପରେ ଗ୍ରାମର ପ୍ରତ୍ୟେକ ପରିବାର ନିଜ ନିଜ ଇଷ୍ଟଦେବା/ଦେବୀଙ୍କୁ ପୂଜାର୍ଚ୍ଚନା କରିଥିଲେ। ଏହାପରେ ପରିବାରର ସମସ୍ତ ଲୋକ ଏକତ୍ରିତ ହୋଇ ନବାନ୍ନ ଖାଇଥିଲେ। ଏହି ଅବସରରେ ଝୁରିମାଲ ବନ ସୁରକ୍ଷା ସମିତି, ସ୍ବେଚ୍ଛାସେବୀ ଅନୁଷ୍ଠାନ ‘ସେବକ’ ଓ ଜୟ ବଜରଙ୍ଗ କ୍ଲବର ମିଳିତ ଉଦ୍ୟମରେ ନୂଆଁଖାଇ ଭେଟ୍ଘାଟ୍ କାର୍ଯ୍ୟକ୍ରମର ଆୟୋଜନ କରାଯାଇଥିଲା। ବିଲୁପ୍ତ ବିଭିନ୍ନ ପୁରାତନ ଖେଳ ଯଥା: ପୁଚି, ଶଙ୍ଖ ଫୁକା, ହୁଳହୁଳି, ବାଡିଘିଚା ଇତ୍ୟାଦି ପ୍ରତିଯୋଗିତା ଏଥିରେ ସାମିଲ କରାଯାଇଥିଲା। ଏହି କାର୍ଯ୍ୟକ୍ରମରେ ମୁଖ୍ୟ ଅତିଥି ଭାବେ ସୁନ୍ଦରଗଡ ଜିଲା ପରିଷଦ ଅଧ୍ୟକ୍ଷା କୁନ୍ତୀ ପ୍ରଧାନ ଏବଂ ସମ୍ମାନିତ ଅତିଥି ଭାବେ ସୁନ୍ଦରଗଡ ବିଧାୟିକା ଶ୍ରୀମତୀ କୁସୁମ ଟେଟେ ସାମିଲ ହୋଇଥିଲେ।