ସୁନ୍ଦରଗଡ,୨୧ା୯(ଜୟ ନାରାୟଣ ମେଣ୍ଡୁଳି): ଖରା, ବର୍ଷା, ଶୀତ, କାକରରେ ହାଡ଼ଭଙ୍ଗା ପରିଶ୍ରମ କରି ମାଟି ମା’ରୁ ଉତ୍ପାଦିତ ପ୍ରଥମ ଶସ୍ୟକୁ ସମ୍ମାନ ଦେବାର ପର୍ବ ହେଉଛି ନୂଆଁଖାଇ। ପ୍ରତିବର୍ଷ ପରି ଚଳିତ ବର୍ଷ ମଧ୍ୟ ହସ ଉଲ୍ଲାସରେ ଏହି ଗଣପର୍ବକୁ ପାଳନ କରଛନ୍ତି ସୁନ୍ଦରଗଡ଼ ଜିଲା ଲେଫ୍ରିପଡ଼ା ବ୍ଲକ ଝୁରିମାଲ ଗ୍ରାମବାସୀ। ନୂଆଁଖାଇକୁ ନିଆରା ଢଙ୍ଗରେ ପାଳନ କରିବା ପାଇ ୨ ସପ୍ତାହ ପୂର୍ବରୁ ପ୍ରସ୍ତୁତିରେ ଲାଗିପଡିଥିଲେ ସଂପୂର୍ଣ୍ଣ ଗ୍ରାମବାସୀ। ବୁଧବାର ସକାଳେ ସର୍ବପ୍ରଥମେ ଗ୍ରାମର ଆରାଧ୍ୟ ଦେବତା ସଙ୍କଟମୋଚନ ବଜରଙ୍ଗବଲୀଙ୍କ ପାଖରେ ନୂଆଁ ଚାଉଳ ଲାଗି ପୂଜାର୍ଚ୍ଚନା କରିବା ପରେ ଗ୍ରାମର ପ୍ରତ୍ୟେକ ପରିବାର ନିଜ ନିଜ ଇଷ୍ଟଦେବା ଦେବୀଙ୍କୁ ପୂଜାର୍ଚ୍ଚନା କରି ଅପରାହ୍ନ ୧ଟାରେ ଗାଁ ମଣ୍ଡପରେ ଏକାଠି ହୋଇଥିଲେ। ଏହାପରେ ପାରମ୍ପାରିକ ସଙ୍କୀର୍ତ୍ତନ, ସଂପ୍ରଦା ଓ ଢୋଲ ନିଶାନର ତାଳେ ତାଳେ ଝୁମୀ ଉଠିଥିଲା ଗାଁ ଦାଣ୍ଡ। ସାମୂହିକ ଏକତାର ଏହି ବିରଳ ପରମ୍ପରାରେ ସମ୍ମାନିତ ଅତିଥିଭାବେ ଯୋଗଦେଇଥିଲେ ଜିଲା ପରିଷଦ ଅଧ୍ୟକ୍ଷା କୁନ୍ତୀ ପ୍ରଧାନ, ସୁନ୍ଦରଗଡ ବନଖଣ୍ଡ ଅଧିକାରୀ ପ୍ରଦୀପ ମିରାସେ। ଜିଲା ପରିଷଦ ଅଧ୍ୟକ୍ଷା ପ୍ରଧାନ ଝୁରିମାଲର ଏହି ମହାନ ପରମ୍ପରା କେବଳ ରାଜ୍ୟ ନୁହେଁ ଦେଶରେ ଏକ ଯୁଗାନ୍ତକାରୀ ଅଭିନବ ଉଦାହରଣ ବୋଲି କହିଥିଲେ। ବନଖଣ୍ଡ ଅଧିକାରୀ ମିରାସେ ଝୁରିମାଲର ନୂଆଁଖାଇ ନିଜର ବ୍ୟକ୍ତିଗତ ଜୀବନରେ ଏକ ଅଭୂଲା ସ୍ମୃତି ରହିବା ତଥା ଯେଉଁଠି ଥିଲେ ବି ସେ ଝୁରିମାଲର ନୂଆଁଖାଇରେ ଯୋଗଦେବାକୁ ଚେଷ୍ଟା କରିବେ ବୋଲି କହିଥିଲେ। ସ୍ବତନ୍ତ୍ର ଅତିଥିଭାବେ ଉଦୀୟମାନ କଣ୍ଠଶିଳ୍ପୀ ମଧୁସ୍ମିତା ନାଏକ ଯୋଗଦେଇ ନୂଆଁଖାଇ ସଙ୍ଗୀତ, ଓଲିଉଡ ତାରକା ଶୁଭମ ନାଏକଙ୍କ ସଂଳାପ, ପ୍ରସିଦ୍ଧ ହାସ୍ୟ କଳାକାର କେଦାରନାଥ ପଟେଲ ଓ ମନୋରଞ୍ଜନ ପଟେଲଙ୍କ ଅଭିନୟ ବେଶ ମନଛୁଆଁ ହୋଇଥିଲା। ଏହାପରେ ଆରମ୍ଭ ହୋଇଥିଲା ସାମୂହିକ ନୂଆଁଖାଇର ଅଭିନବ ପରମ୍ପରା। ଗାଁ ଦାଣ୍ଡରେ ଜାତି, ଧର୍ମ,ବର୍ଣ୍ଣ ନିର୍ବିଶେଷର ଧାଡିକୁ ଧାଡି ବସିଥିଲେ ସମସ୍ତ ଗ୍ରାମବାସୀ। ଆରମ୍ଭ ହୋଇଥିଲା ନବାହ୍ନ ସାଙ୍ଗକୁ ବିବିଧ ମିଷ୍ଟାନ୍ନ ବଣ୍ଟନ। ଗ୍ରାମର ସମୁଦାୟ ୧୬୩ଟି ପରିବାର ସାଙ୍ଗକୁ ପଡୋଶୀ ଗାଁର ହଜାର ହଜାର ଲୋକ ସାମିଲ ହୋଇ ଆନନ୍ଦ ଉଲ୍ଲାସର ସହିତ ପାଳନ କରିଥିଲେ ସାମୂହିକ ନୂଆଁଖାଇ। ଗାଁରେ ଏକତା, ସହଭାଗିତା ଓ ଭାଇଚାରାର ଏକ ବିରଳ ଦୃଷ୍ଟାନ୍ତ ଏହି ଗ୍ରାମରେ ଦେଖିବାକୁ ମିଳିଛି। ଦୀର୍ଘ ୧୧ ବର୍ଷ ଧରି ସାମୂହିକ ନୂଆଁଖାଇ ପାଳନ କରୁଛନ୍ତି ଏହି ଗ୍ରାମବାସୀ। ଏହା ପରେ ନୂଆଁଖାଇ ଭେଟ ଘାଟ ସାଙ୍ଗକୁ ବିଭିନ୍ନ ବିଲୁପ୍ତ ପ୍ରାୟ ଖେଳ ଯଥା:- ପୁଚି ଖେଳ, ଶଙ୍ଖ ଫୁକା, ହୁଳହୁଳି, ଚାମୁଚ ରେଶ, ରଶି ଡିଆଁ ଇତ୍ୟାଦିରେ ମଜ୍ଜି ଯାଇଥିଲେ ଗ୍ରାମବାସୀ। ଏହି ସାମୂହିକ ନୂଆଁଖାଇକୁ ଦେଶ ବିଦେଶରୁ ଅନେକ ଶୁଭେଚ୍ଛୁ ଅଭିନନ୍ଦନ ଜଣାଇ ଏହି ପରମ୍ପରା ବଜାୟ ରଖିବାକୁ ଆହ୍ବାନ ହେଇଥିଲେ। ସଂପୂର୍ଣ୍ଣ କାର୍ଯ୍ୟକ୍ରମକୁ ଝୁରିମାଲ ବନ ସୁରକ୍ଷା ସମିତି, ଜୟ ବଜରଙ୍ଗ କ୍ଲବ ଓ ସ୍ବ୍ଚ୍ଛୋସେବୀ ଅନୁଷ୍ଠାନ ସେବକର କର୍ମକର୍ତ୍ତା ପରିଚାଳନା କରିଥିଲେ।