ବାରିପଦା,୨୬।୧୧(ନୀଳାଦ୍ରି ବିହାରୀ ଦଣ୍ଡପାଟ):ମୟୂରଭଞ୍ଜ ଜିଲା ଶିମିଳିପାଳ ଅଭୟାରଣ୍ୟକୁ ଅଣାଯାଇଥିବା ମହାବଳ ବାଘୁଣୀ ‘ଜିନତ୍’ ଏନକ୍ଲୋଜରରୁ ମୁକୁଳିଛି। ରବିବାର ରାତିରେ ତାକୁ ଶିମିଳିପାଳର କୋର୍ ଅଞ୍ଚଳରେ ଛଡ଼ାଯାଇଛି। ମହାରାଷ୍ଟ୍ରର ତଡ଼ବା ଅନ୍ଧାରୀ ଜଙ୍ଗଲରୁ ଆସି ୧୦ ଦିନ ହେବ ଏନକ୍ଲୋଜରରେ ରହିବା ପରେ ଏବେ ସେ ବ୍ୟାଘ୍ର ସଂରକ୍ଷଣ ପ୍ରକଳ୍ପର ଉତ୍ତର ଡିଭିଜନରେ ଘୂରିବୁଲୁଛି। ‘ଜିନତ୍’ର ଚଳପ୍ରଚଳକୁ ନେଇ ତିନୋଟି ଟିମ୍ ପକ୍ଷରୁ ୨୪ ଘଣ୍ଟିଆ ଅନୁଧ୍ୟାନ ଜାରି ରହିଛି। ପୂର୍ବରୁ ଆସିଥିବା ବାଘୁଣୀ ଯମୁନା ଓ ଜିନତ୍ ଏବେ ଶିମିଳିପାଳ ଅଭୟାରଣ୍ୟରେ ନିର୍ଦ୍ୱନ୍ଦ୍ୱରେ ବିଚରଣ କରୁଥିବା ଆଞ୍ଚଳିକ ମୁଖ୍ୟ ବନ୍ୟପ୍ରାଣୀ ସଂରକ୍ଷକ ତଥା ଶିମିଳିପାଳ ବ୍ୟାଘ୍ର ସଂରକ୍ଷଣ ପ୍ରକଳ୍ପର କ୍ଷେତ୍ର ନିର୍ଦ୍ଦେଶକ ଡା.ପ୍ରକାଶ ଚାନ୍ଦ ଗୋଗିନେନୀ ଜଣାଇଛନ୍ତି।
ଶିମିଳିପାଳରେ ମହାବଳ ବାଘ ବଂଶ ବୃଦ୍ଧି ପାଇଁ ବିଭାଗ ପକ୍ଷରୁ ୨ଟି ମହାବଳ ବାଘୁଣୀଙ୍କୁୁ ଅଣାଯାଇଛି। ପ୍ରଥମେ ଯମୁନାକୁ ଛାଡ଼ିବା ପରେ ଜିନତ୍କୁ ରବିବାର ରାତିରେ ଛଡ଼ାଯାଇଛି। ଏନକ୍ଲୋଜରରେ ଜିନତ୍ ରହିବାର ୧୦ଦିନ ମଧ୍ୟରେ ତା’ର ଖାଦ୍ୟପେୟ ଓ ଗତିବିଧିକୁ ଡାକ୍ତରୀ ଦଳ ଅନୁଧ୍ୟାନ କରିଥିଲା। ଶିକାର କରି ଖାଇବା, ପାଣି ପିଇବା ଓ ଗାଧୋଇବା ଭଳି ଆଚରଣ ଦେଖି ତା’ର ସ୍ବାସ୍ଥ୍ୟାବସ୍ଥା ଠିକ୍ ଥିବା ତାଲିମପ୍ରାପ୍ତ କର୍ମଚାରୀ ଓ ଡାକ୍ତରୀ ଦଳ ରିପୋର୍ଟ ପ୍ରଦାନ କରିଥିଲେ। ପରେ ଜିନତ୍କୁ ଛାଡ଼ିବା ପାଇଁ ବନ ବିଭାଗ ପକ୍ଷରୁ ତାରିଖ ଧାର୍ଯ୍ୟ ହେବା ସହ ରବିବାର ଏନକ୍ଲୋଜର ଗେଟ୍ ଖୋଲାଯାଇଥିଲା। ରାତି ୯ଟା ୩୦ ବେଳେ ଜିନତ୍ ଏନକ୍ଲୋଜରରୁ ବାହାରି ଜଙ୍ଗଲ ମଧ୍ୟକୁ ଯାଇଥିଲା। ଜିନତ୍ ଦେହରେ ଲାଗିଥିବା ରେଡିଓ କଲାରକୁ ନେଇ ତା’ର ଗତିବିଧି ଉପରେ ତାଲିମପ୍ରାପ୍ତ କର୍ମଚାରୀ ଓ ଅଧିକାରୀମାନେ ଯାଞ୍ଚ କରୁଛନ୍ତି।
