ନୂଆଦିଲ୍ଲୀ,୪।୧୦: ଏୟାରଟେଲ ପରେ ଏବେ ୫ଜି ସେବା ନେଇ ଘୋଷଣା କରିଛି ଜିଓ। ଏହି ସେବା ଦଶହରାରେ ଦେଶରେ ଆରମ୍ଭ ହେବ। ପ୍ରାଥମିକ ପର୍ଯ୍ୟାୟରେ କମ୍ପାନୀ ୪ଟି ସହରରେ ସେବା ଯୋଗାଇ ଦେବ। ଦିଲ୍ଲୀ, ମୁମ୍ବାଇ, କୋଲକାତା ଓ ବାରାଣସୀର ଲୋକମାନେ ୫ଜି ସେବାର ସୁବିଧା ପାଇପାରିବେ।
ତେବେ କମ୍ପାନୀ ପକ୍ଷରୁ ୫ଜି ୱେଲକମ ଅଫର ସମ୍ପର୍କରେ ମଧ୍ୟ ଘୋଷଣା କରାଯାଇଛି। ଏହି ଅଫର ଜରିଆରେ ଗ୍ରାହକମାନେ ଅନଲିମିଟେଡ ୫ଜି ଡାଟା, ତା’ ପୁଣି ୧ଜିବିପିଏସ+ ସ୍ପିଡରେ ପାଇବେ। ବର୍ତ୍ତମାନ ଜିଓ ତା’ର ୫ଜି ସେବା ପାଇଁ ବେଟା ଟ୍ରାଏଲ୍ସ ବ୍ୟବସ୍ଥା କରିଛି। ଏହାର ଅର୍ଥ ସମସ୍ତେ ଜିଓ ୫ଜି ନେଟୱର୍କର ସୁବିଧା ପାଇପାରିବେ ନାହିଁ।
ବର୍ତ୍ତମାନ ସମୟରେ ଆପଣ ଯଦି ଉପରୋକ୍ତ ୪ ସହରରେ ରହୁଛନ୍ତି ଓ ଆପଣଙ୍କ ପାଖରେ ୫ଜି ସ୍ମାର୍ଟଫୋନ ରହିଛି, ତା’ହେଲେ ଆପଣଙ୍କୁ ଜିଓ ୫ଜି ୱେଲକମ ଅଫର ମିଳିପାରିବ। କମ୍ପାନୀ ଏଯାଏ କୌଣସି ୫ଜି ପ୍ଲାନ୍ସ ବା ସୱତନ୍ତ୍ର ପ୍ୟାକ ସମ୍ପର୍କରେ ଘୋଷଣା କରିନାହିଁ। ତେଣୁ ପ୍ୟାକ ଘୋଷଣା ହେବା ଯାଏ ୫ଜି ଫୋନ ରଖିଥିବା ଗ୍ରାହକ ମାଗଣାରେ ୫ଜି ନେଟୱର୍କର ଲାଭ ଉଠାଇ ପାରିବେ। ଏଥିଲାଗି ନୂଆ ସିମ୍ର ଆବଶ୍ୟକତା ନାହିଁ।
