ନୂଆଦିଲ୍ଲୀ,୩।୧୦: ଦେଶର ପ୍ରମୁଖ ଟେଲିକମ୍ କମ୍ପାନୀ ‘ରିଲାଏନ୍ସ ଜିଓ’ ଖୁବଶୀଘ୍ର ଏକ ସ୍ବଳ୍ପ ବଜେଟର ଲାପ୍ଟପ୍ ‘ଜିଓ ଲାପ୍ଟପ୍’ର ବଜାର ପ୍ରବେଶ ସମ୍ପର୍କରେ ଘୋଷଣା କରିପାରେ ବୋଲି ଜଣାପଡିଛି। ଏପରିକି ଉକ୍ତ ଲାପ୍ଟପରେ ୪ଜି ସିମ୍ କାର୍ଡ ସେବା ସକ୍ଷମ ହେବା ଭଳି ସୁବିଧା ମଧ୍ୟ ଉପଲବ୍ଧ ବୋଲି କୁହାଯାଉଛି। ବିଶେଷକରି ଏହାର ମୂଲ୍ୟ ପ୍ରାୟ ୧୮୪ ଡଲାର ବା ୧୫,୦୦୦ ଟଙ୍କା ହେବ ବୋଲି ଚର୍ଚ୍ଚା ହେଉଛି।
ଅପରପକ୍ଷରେ ମୁକେଶ ଅମ୍ବାନୀଙ୍କ ନେତୃତ୍ୱାଧୀନ କନ୍ଗ୍ଲୋମେରେଟ୍ ଜିଓ ବୁକ୍ ପାଇଁ ବିଶ୍ୱସ୍ତରୀୟ ସଂସ୍ଥା କ୍ୱାଲକମ୍ ଏବଂ ମାଇକ୍ରୋସଫ୍ଟ ଭଳି କମ୍ପାନୀ ସହ ଆଲୋଚନା ହୋଇଥିବା ଜାତୀୟ ଗଣମାଧ୍ୟମରେ ଚର୍ଚ୍ଚା ହେଉଛି। ଏପରିକି ଉକ୍ତ ଲାପଟପ୍ ଚଳିତ ମାସ ଶେଷ ସୁଦ୍ଧା ଦେଶର ସମସ୍ତ ବିଦ୍ୟାଳୟ ଏବଂ ସରକାରୀ ପ୍ରତିଷ୍ଠାନ ପରି ଏଣ୍ଟରପ୍ରାଇଜ୍ ଗ୍ରାହକଙ୍କ ପାଇଁ ଉପଲବ୍ଧ ହେବ ଏବଂ ଆସନ୍ତା ୩ମାସ ମଧ୍ୟରେ ଭାରତୀୟ ଗ୍ରାହକ ପାଇଁ ଶୁଭାରମ୍ଭ ହେବାର ଆଶା କରାଯାଉଛି।
