ଭୁବନେଶ୍ୱର,୩।୪: ଦେଶର ପ୍ରମୁଖ ଟେଲିକମ କମ୍ପାନୀ ରିଲାଏନ୍ସ ଜିଓ ୫ଜି ସେବା ପ୍ରଦାନରେ ଉଲ୍ଲେଖନୀୟ ସଫଳତା ଲାଭ କରିଛି। ଏପରିକି ୫ଜି ହାରାହାରି ଡାଉନଲୋଡ୍ ସ୍ପିଡ୍ ଦୃଷ୍ଟିରୁ ଭାରତ ବର୍ତ୍ତମାନ ବିଶ୍ୱର ଶ୍ରେଷ୍ଠ ୧୫ଟି ଦେଶ ମଧ୍ୟରେ ରହିଛି। ଭାରତରେ ୫ଜି ପ୍ରଦର୍ଶନ ଏବଂ ଗ୍ରାହକ ଅଭିଜ୍ଞତା ଉପରେ ବ୍ରଡବ୍ୟାଣ୍ଡ ସ୍ପିଡ୍ ଆଣ୍ଡ ମାପକ ସଂସ୍ଥା ଓକ୍ଲା ପକ୍ଷରୁ ଏକ ରିପୋର୍ଟ ପ୍ରକାଶ କରାଯାଇଛି। ଉକ୍ତ ରିପୋର୍ଟରେ ଓକଲା କହିଛି, ଭାରତୀୟ ଟେଲିକମ୍ ଶିଳ୍ପର ପରିବର୍ତ୍ତିିତ ଦୃଶ୍ୟପଟରେ ରିଲାଏନ୍ସ ଜିଓ ୫ଜି ଆଧିପତ୍ୟ ଦୌଡ଼ରେ ସବୁଠୁ ବଡ଼ ସଂସ୍ଥା ଭାବେ ଉଭା ହୋଇଛି। ଏପରିକି ଜିଓ ଦ୍ରୁତ ଗତିରେ ୫ଜି ମୁତୟନ କାର୍ଯ୍ୟ କରୁଛି ଏବଂ ଉନ୍ନତ ପ୍ରଦର୍ଶନ କରୁଥିବା ଉକ୍ତ ରିପୋର୍ଟରେ ଉଲ୍ଲେଖ କରାଯାଇଛି। ସେହିଭଳି ଦୂରସଞ୍ଚାର ବିଭାଗ ଅନୁଯାୟୀ ୨୦୨୪ ଫେବୃଆରୀ ୨୯ସୁଦ୍ଧା ଭାରତରେ ୪.୨୫ ଲକ୍ଷ ୫ଜି ବିଟିଏସ୍ ସ୍ଥାପନ କରାଯାଇଛି। ଯେଉଁଥିରୁ ପ୍ରାୟ ୮୦% ବିଟିଏସ୍ ରିଲାଏନ୍ସ ଜିଓ ସ୍ଥାପନ କରିଛି। ରିଲାଏନ୍ସ ଜିଓ ଏବଂ ଭାରତୀ ଏୟାରଟେଲ ସମଗ୍ର ଭାରତରେ ୫ଜି ନେଟୱର୍କ ବିସ୍ତାର କରିବା ପାଇଁ ବ୍ୟାପକ ପୁଞ୍ଜି ନିବେଶ କରିଛନ୍ତି,ଯାହା ଫଳରେ ଭାରତରେ ୫ଜି ଉପଲବ୍ଧତାରେ ଉଲ୍ଲେଖନୀୟ ବୃଦ୍ଧି ଦେଖାଯାଇଛି। ୫ଜି ଉପଲବ୍ଧତା ୨୦୨୩ର ପ୍ରଥମ ତ୍ରୈମାସରେ ୨୮.୧% ଥିବାବେଳେ ୨୦୨୩ର ଚତୁର୍ଥ ତ୍ରୈମାସରେ ଏହା ୫୨.୦%କୁ ବୃଦ୍ଧି ପାଇଛି। ଆରମ୍ଭରୁ ୫ଜି ଷ୍ଟାଣ୍ଡ ଏଲୋନ ନେଟୱର୍କ କାର୍ଯ୍ୟକାରୀ କରିବା ଦ୍ୱାରା ରିଲାଏନ୍ସ ଜିଓ ପରବର୍ତ୍ତୀ ପିଢ଼ିର ଯୋଗାଯୋଗ କ୍ଷେତ୍ରରେ ଅଗ୍ରଣୀ ଭାବରେ ପ୍ରତିଷ୍ଠିତ ହୋଇପାରିଛି। ଜିଓର ବ୍ୟାପକ ୫ଜି କଭରେଜ୍ ଏହାର ଉନ୍ନତ ୫ଜି ଉପଲବ୍ଧତା ହାରରୁ ସ୍ପଷ୍ଟ ହୋଇଛି। ୨୦୨୩ ର ୪ର୍ଥ ତ୍ରୈମାସରେ ଜିଓର ୫ଜି ଉପଲବ୍ଧତା ହାର ୬୮.୮%କୁ ବୃଦ୍ଧି ପାଇଥିବା ବେଳେ ପ୍ରତିଦ୍ୱନ୍ଦ୍ୱୀ ଏୟାରଟେଲର ୩୦.୩%କୁ ହ୍ରାସ ପାଇଛି। ରିଲାଏନ୍ସ ଜିଓ ଲୋ-ବ୍ୟାଣ୍ଡ (୭୦୦ ମେଗାହର୍ଜ) ଏବଂ ମିଡ୍ ବ୍ୟାଣ୍ଡ (୩.୫ ଗିଗାହର୍ଜ) ସ୍ପେକ୍ଟ୍ରମ ଏବଂ ବିସ୍ତୃତ ଫାଇବର ନେଟୱର୍କ ସହିତ ଗ୍ରାହକଙ୍କୁ ବ୍ୟାପକ କଭରେଜ୍ ଏବଂ ବ୍ୟାପକ ନେଟୱର୍କ ପ୍ରଦାନ କରିବାରେ ସକ୍ଷମ ହୋଇଛି। ରିଲାଏନ୍ସ ଜିଓର ୫ଜି ନେଟୱର୍କ ବିଶେଷ କରି ଭିଡିଓ ଷ୍ଟ୍ରିମିଂ ଏବଂ ମୋବାଇଲ ଗେମିଂରେ ଗ୍ରାହକଙ୍କ ଅଭିଜ୍ଞତାର ଯଥେଷ୍ଟ ଉନ୍ନତି ଆଣିଛି।