ଗୋପବନ୍ଧୁ ନଗର(ଶାନ୍ତନ୍ତୁ କୁମାର ମଢ଼ୁଆଳ)/ଖୁଣ୍ଟା(ଦେବରଞ୍ଜନ ବେହେରା),୩।୭: ମୟୂରଭଞ୍ଜ ଜିଲା ଗୋପବନ୍ଧୁ ନଗର ବ୍ଲକ ଅଧୀନ ରାଣୀବନ୍ଧ ନୋଡାଲ ଉଚ୍ଚ ବିଦ୍ୟାଳୟ ଛାତ୍ରୀନିବାସରେ ପାଚିକା ନିଯୁକ୍ତିକୁ ନେଇ ବିବାଦ ଦେଖାଦେଇଛି। ଏହି ନିଯୁକ୍ତିକୁ ସ୍ଥାନୀୟ ଗ୍ରାମବାସୀ ବିରୋଧ କରି ମଙ୍ଗଳବାର ବିଦ୍ୟାଳୟରେ ତାଲା ପକାଇ ପ୍ରତିବାଦ କରିଥିବା ଦେଖିବାକୁ ମିଳିଥିଲା।
ସୂଚନା ଅନୁଯାୟୀ, ରାଣୀବନ୍ଧ ହାଇସ୍କୁଲର ଆଦିବାସୀ ଛାତ୍ରୀନିବାସ ପାଇଁ ଗତ ୨୦୧୬ରେ କବିତା କୁଅଁର ଓ ସୁମତି ଝରିଆଳଙ୍କୁ ପାଚିକା ଭାବେ ନିଯୁକ୍ତି ଦିଆଯାଇଥିଲା। କବିତାଙ୍କୁ ବିଧବା ଭାବେ ଅଗ୍ରାଧିକାର ଭିତ୍ତିରେ ତତ୍କାଳୀନ ପରିଚାଳନା କମିଟି ଦ୍ବାରା ନିଯୁକ୍ତି ଦିଆଯାଇଥିଲା। ବର୍ତ୍ତମାନ କବିତା ଅନ୍ୟତ୍ର ବିବାହ କରିଥିବା ଓ ସୁମତି ରୋଷିଆ ଭାବେ ୮ ବର୍ଷ ଧରି କାର୍ଯ୍ୟକରି ଆସୁଛନ୍ତି। ଉଭୟ ସଧବା ମହିଳାଙ୍କୁ ପରିବର୍ତ୍ତନ କରାଯାଇ ଗ୍ରାମରେ ଥିବା ଅନ୍ୟ ଅସହାୟ ବିଧବା ମହିଳାଙ୍କୁ ନିଯୁକ୍ତି ପାଇଁ ଗ୍ରାମବାସୀ ଦାବି କରିଛନ୍ତି। ଉକ୍ତ ପଦବୀଟି ବାର୍ଷିକ ଚୁକ୍ତିଭିତ୍ତିକ ହୋଇଥିବାରୁ ଗତ ମାର୍ଚ୍ଚ ମାସରେ ଉଭୟଙ୍କର ନବୀକରଣ କରାଯାଇଛି। ତେବେ ଏହାର ପୁନଃବିଚା଼ର କରାଯାଇ ଗ୍ରାମରେ ଥିବା ଅନ୍ୟ ଅସହାୟ ବିଧବା ମହିଳାଙ୍କୁ ଅନୁରୂପ ଚୁକ୍ତିଭିତ୍ତିକ ନିଯୁକ୍ତି ଦେବାକୁ ଜିଲାପାଳ, ଖୁଣ୍ଟା ପୋଲିସ ସମେତ ଅନ୍ୟ ବିଭାଗୀୟ ଅଧିକାରୀମାନଙ୍କୁ ଗ୍ରାମବାସୀ ଲିଖିତ ଦାବିପତ୍ର ପ୍ରଦାନ କରିଥିଲେ। ଦାବି ପୂରଣ ନ ହେଲେ ଜୁଲାଇ ୨ ତାରିଖଠାରୁ ତାଲା ପକାଇ ଧାରଣା ଦିଆଯିବ ବୋଲି ଦାବିପତ୍ର ମାଧ୍ୟମରେ ପ୍ରଶାସନକୁ ଅବଗତ କରାଇଥିଲେ। ମାତ୍ର ଏହା ଉପରେ ପ୍ରଶାସନ ପକ୍ଷରୁ କୌଣସି ପଦକ୍ଷେପ ଗ୍ରହଣ କରାଯାଇ ନ ଥିବାରୁ ମଙ୍ଗଳବାର ଉକ୍ତ ବିଦ୍ୟାଳୟର ମୁଖ୍ୟ ଫାଟକରେ ସକାଳ ୯ଟା୩୦ରୁ ତାଲା ପକାଇ ଗ୍ରାମବାସୀ ଧାରଣାରେ ବସି ପ୍ରତିବାଦ କରିଥିଲେ। ତାଲାବନ୍ଦ ସମ୍ପର୍କରେ ବିଦ୍ୟାଳୟର ପ୍ରଧାନଶିକ୍ଷକ ବିଜୟ କୁମାର ସେଠୀ କଲ୍ୟାଣ ସମ୍ପ୍ରସାରଣ ଅଧିକାରୀ ଓ ବ୍ଲକ ଶିକ୍ଷାଧିକାରୀଙ୍କୁ ଅବଗତ କରାଇଥିଲେ। ଘଟଣାସ୍ଥଳରେ କଲ୍ୟାଣ ସମ୍ପ୍ରସାରଣ ଅଧିକାରୀ ସତ୍ୟଭାନୁ ସିଂ, ପ୍ରଧାନଶିକ୍ଷକ ସେଠୀ ଓ ବିଦ୍ୟାଳୟ ପରିଚାଳନା କମିଟିର ସଭାପତି ଅଭିମନ୍ୟୁ ଝରିଆ ଉପସ୍ଥିତ ହୋଇ ଧାରଣାରତ ଗ୍ରାମବାସୀଙ୍କ ସହିତ ଆଲୋଚନା କରିଥିଲେ। ବିଭାଗୀୟ ଉଚ୍ଚ ଅଧିକାରୀଙ୍କ ଦୃଷ୍ଟି ଆକର୍ଷଣ କରାଯାଇ ନିୟମ ଅନୁଯାୟୀ ପଦକ୍ଷେପ ଗ୍ରହଣ କରାଯିବ ବୋଲି ପ୍ରତିଶ୍ରୁତି ଦେବାରୁ ଦୀର୍ଘ ୩ ଘଣ୍ଟା ପରେ ବିଦ୍ୟାଳୟରୁ ତାଲା ଖୋଲା ଯାଇଥିଲା।