ମାଲକାନଗିରି,୩ା୧୦ (ଡି.ଏନ୍.ଏ.): ମାଲକାନଗିରି ଜିଲାରେ ଚାକିରି କରାଇଦେବା ନାଁରେ କେତେକ ଯୁବତୀଯୁବକଙ୍କଠାରୁ ଲକ୍ଷାଧିକ ଟଙ୍କା ଠକେଇ ହୋଇଥିବା ଅଭିଯୋଗ ହୋଇଛି। ଏନେଇ ଚାକିରି ଆଶାୟୀ ୧୫ରୁ ଊର୍ଦ୍ଧ୍ୱ ଯୁବତୀଯୁବକ ସୋମବାର ଥାନାର ଦ୍ୱାରସ୍ଥ ହୋଇଛନ୍ତି। ମାଲକାନଗିରି ସଦର ମହକୁମାରେ ଦୁଲାଦେଈ ଫାଉଣ୍ଡେଶନ ନାମକ ଏକ ସଂସ୍ଥା ଖୋଲି ଏହାର ନିର୍ଦ୍ଦେଶକ ସୁରେଶ କୁମାର ପଣ୍ଡା ଯୁବତୀଯୁବକଙ୍କୁ ଟିପିଏସଓଡିଏଲରେ ଚାକିରି କରାଇଦେବେ କହି ଏଥିପାଇଁ ଜଣଙ୍କ ପିଛା ୪୦ ହଜାର ଲେଖାଏ ଟଙ୍କା ନେଇଥିଲେ। ଏଥିସହ ସେ ଗ୍ରାମାଞ୍ଚଳରେ ଆୟୁଷ୍ମାନ୍ ଯୋଜନାରେ ଔଷଧ ବାଣ୍ଟିବା ଭଳି ଚାକିରି ଦେବାକୁ କହି କେତେକଙ୍କଠାରୁ ଟଙ୍କା ନେଇଛନ୍ତି। ଟଙ୍କା ଦେଇ ଚାକିରି ନ ପାଇ ଯୁବତୀଯୁବକମାନେ ପଣ୍ଡାଙ୍କୁ ବାରମ୍ବାର ଜଣାଇ କିଛି ସୁଫଳ ପାଇ ନ ଥିଲେ। ଶେଷରେ କାଲିମେଳା ଅଞ୍ଚଳର ଏହି ଯୁବତୀଯୁବକମାନେ କାଲିମେଳା ଥାନାରେ ଗତ ୧ ତାରିଖରେ ଅଭିଯୋଗ କରିଥିଲେ। ଏନେଇ କେସ୍ ନଂ. ୨୫୦/୨୨ରେ ଏକ ମାମଲା ରୁଜୁ ହୋଇଛି। ପରେ ମାଲକାନଗିରି ଅଞ୍ଚଳର ଠକେଇର ଶିକାର ହୋଇଥିବା ଯୁବତୀଯୁବକମାନେ ସୋମବାର ମାଲକାନଗିରି ଥାନାରେ ଏକ ଅନୁରୂପ ଅଭିଯୋଗ କରିଛନ୍ତି। ଏହି ସଂସ୍ଥାର ମାଲିକ ପଣ୍ଡା କଟକ ଅଞ୍ଚଳର ହୋଇଥିବା ବେଳେ ତାଙ୍କ ମୋବାଇଲ ନଂ. ୭୩୨୭୦ ୬୩୩୪୭ରେ ଯୁବତୀଯୁବକମାନେ ଫୋନ୍ ପେ ମାଧ୍ୟମରେ ଟଙ୍କା ପୈଠ କରିଥିବା ଅଭିଯୋଗକାରୀ ପୂର୍ଣ୍ଣେନ୍ଦୁ ବାରିକ, ମହେନ୍ଦ୍ର କବାସୀ, ଗଙ୍ଗାଧର ମାଡକାମି, ବୁଜି କବାସୀ, ଗାୟତ୍ରୀ ମାଡି, ମୁନା ମାଡକାମି, ଆପ୍ପାରାଓ ତେଲାମ, ସଞ୍ଜୟ ବାଛାଡ, ମାଙ୍ଗି ମାଡକାମି ପ୍ରମୁଖ କହିଛନ୍ତି। ସୂଚନାଯୋଗ୍ୟ, ମାଲକାନଗିରି ଜିଲାର ବିଭିନ୍ନ ଅଞ୍ଚଳର ପ୍ରାୟ ୨ଶହରୁ ଊର୍ଦ୍ଧ୍ୱ ଯୁବତୀଯୁବକଙ୍କଠାରୁ ପଣ୍ଡା ଚାକିରି ଦେବା ନାଁରେ ଟଙ୍କା ଠକେଇ କରିଛନ୍ତି।
