ଦିଗପହଣ୍ଡି,୧୧ା୧୨(ଡି.ଏନ୍.ଏ): ଦିଗପହଣ୍ଡି ବ୍ଲକ ଏମ୍ଜିଏନ୍ଆର୍ଇଜିଏସ୍ ଯୋଜନାରେ ଦୁର୍ନୀତି ହୋଇଥିବା ଅଭିଯୋଗ ହୋଇଛି। ଶ୍ରମିକ ବଦଳରେ ମେଶିନ ଜରିଆରେ କାମ କରାଯାଉଛି। ସେହିପରି କାମ କରି ନ ଥିବା ଲୋକଙ୍କ ନାଁରେ ମଷ୍ଟର ରୋଲ କରାଯାଇ ଅର୍ଥ ପ୍ରଦାନ କରାଯାଇଥିବା ଅଭିଯୋଗ ହୋଇଛି। ଦିଗପହଣ୍ଡି ବ୍ଲକ ଭ୍ରମରପୁର ଉପ ଡାକଘର ପୋଷ୍ଟମାଷ୍ଟର ସନ୍ତୋଷ କୁମାର ଭଟ୍ଟଙ୍କ ନାଁରେ ଜବକାର୍ଡ ରହିଥିବା ଘଟଣା ସାମ୍ନାକୁ ଆସିଛି, ଯାହାର ନଂ. ଓଆର-୧୨-୦୦୯-୦୦୮-୦୦୩/୧୮୦୪୩। ଶ୍ରମିକଙ୍କୁ ରୋଜଗାରକ୍ଷମ କରିବା ପାଇଁ ସରକାର ଶ୍ରମିକ ଚିହ୍ନଟ କରି ଜବକାର୍ଡ ଜରିଆରେ କାର୍ଯ୍ୟ ପ୍ରଦାନ କରିଥାନ୍ତି। ଜବ କାର୍ଡରେ ନାମ ଥିବା ପ୍ରତ୍ୟେକ ଶ୍ରମିକଙ୍କୁ ଶହେ ଦିନର କାର୍ଯ୍ୟ ଦିଆଯାଇପାରିବ ବୋଲି ବ୍ୟବସ୍ଥା ରହିଛି। ଗ୍ରାମାଞ୍ଚଳରେ ଏମ୍ଜିଏନ୍ଆର୍ଇଜିଏସ୍ରେ ଏହି ଜବକାର୍ଡଧାରୀଙ୍କୁ ଶ୍ରମିକଭାବେ ନିୟୋଜିତ କରାଯାଇ ପ୍ରାପ୍ୟ ପ୍ରଦାନ କରାଯାଇଥାଏ। କିନ୍ତୁ ଜଣେ କାର୍ଯ୍ୟରତ ପୋଷ୍ଟମାଷ୍ଟରଙ୍କ ନଁାରେ ଜବକାର୍ଡ ପ୍ରଦାନ କରାଯାଇଥିବା ବେଳେ ପରିବାରର ୫ଜଣ ସଦସ୍ୟଙ୍କ ନାଁ ମଧ୍ୟ ଉଲ୍ଲେଖ ରହିଛି। ସେଥିରୁ ୨ ଜଣ ସରକାରୀ କର୍ମଚାରୀ ଓ ଜଣେ ୭୮ ବର୍ଷୀୟ ବୃଦ୍ଧାଙ୍କ ନାମ ରହିଛି, ଯାହାଙ୍କର ମୃତ୍ୟୁ ହୋଇସାରିଛି। ଖାଲି ଯେ ଜବକାର୍ଡ ପ୍ରଦାନ କରାଯାଇଛି ତାହା ନୁହେଁ, ନିର୍ଦ୍ଦିଷ୍ଟ ଏକ କାର୍ଯ୍ୟରେ ଜବକାର୍ଡରେ ଉଲ୍ଲେଖ ଥିବା ସଦସ୍ୟଙ୍କ ବ୍ୟାଙ୍କ ଖାତାକୁ ୧୨ ଦିନର ପ୍ରାପ୍ୟ ଆସିଛି। ଏହାର ତଦନ୍ତ କରି ଦୃଢ଼ କାର୍ଯ୍ୟାନୁଷ୍ଠାନ ପାଇଁ ଗ୍ରାମର କୈଳାଶ ଚଣ୍ଡ, ଅଭିମନ୍ୟୁ ଷଡ଼ଙ୍ଗୀ, ରବି ମିଶ୍ର, ହରି ପ୍ରଧାନ, ମିଟୁ ଚଣ୍ଡ, ସୁଶାନ୍ତ ଷଡ଼ଙ୍ଗୀ ପ୍ରମୁଖ ଦାବି କରିଛନ୍ତି। ଏନେଇ ପୋଷ୍ଟ ମାଷ୍ଟରଙ୍କ ମତାମତ ଲୋଡାଯିବାରୁ ସେ କିଛି ଜାଣି ନ ଥିବା କହିଛନ୍ତି। ବିଡିଓ ହଳଧର ଶବରଙ୍କୁ ଯୋଗାଯୋଗ କରିବାରେ ଘଟଣାର ତଦନ୍ତ କରାଯାଇ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି କହିଛନ୍ତି।