ନୂଆଦିଲ୍ଲୀ,୨୨।୧୨: ଜମି ହଡପ ମାମଲାରେ କଂଗ୍ରେସର ସାଧାରଣ ସମ୍ପାଦକ ପ୍ରିୟଙ୍କା ଗାନ୍ଧୀଙ୍କ ସ୍ବାମୀ ରବର୍ଟ ଭଦ୍ର ଏବଂ ତାଙ୍କ ମା’ ମୌରିନ ଭଦ୍ରଙ୍କ ପାଇଁ ସମସ୍ୟା ବଢିବାରେ ଲାଗିଛି। ରବର୍ଟ ଭଦ୍ରଙ୍କ କମ୍ପାନୀ ସ୍କାଏଲାଇଟ ହସ୍ପିଟାଲିଟିର ଆବେଦନକୁ ରାଜସ୍ଥାନ ହାଇକୋର୍ଟ ଖାରଜ କରିଦେଇଛନ୍ତି। କିନ୍ତୁ କୋର୍ଟ ରବର୍ଟ ଭଦ୍ରାଙ୍କ ଗିରଫଦାରୀ ଉପରେ ମଧ୍ୟବର୍ତ୍ତୀକାଳୀନ ଆଶ୍ୱସ୍ତି ପ୍ରଦାନ କରିଛନ୍ତି। କୋର୍ଟ କହିଛନ୍ତି, ଗିରଫ ଉପରେ ନିଷେଧାଦେଶ ୨ ସପ୍ତାହ ପର୍ଯ୍ୟନ୍ତ ଜାରି ରହିବ, ତେଣୁ ସେ ଯଦି ଏହି ନିଷ୍ପତ୍ତିକୁ ଉପର ଅଦାଲତରେ ଚ୍ୟାଲେଞ୍ଜ କରିବାକୁ ଚାହାଁନ୍ତି, ତେବେ ତାହା ସେ କରିପାରିବେ। ବିକାନେରରେ ଜମି କ୍ରୟ ଏବଂ ବିକ୍ରିରେ ହୋଇଥିବା ଠକେଇରେ ଉଭୟ ମା’ ପୁଅ ଜଡିତ ଥିବା ଅଭିଯୋଗ ହୋଇଛି।
ରାଜସ୍ଥାନ ହାଇକୋର୍ଟର ଜଷ୍ଟିସ ପୁଷ୍ପେନ୍ଦ୍ର ସିଂଙ୍କ ବେଞ୍ଚ ସ୍ପଷ୍ଟ ଭାବେ କହିଛି ଯେ, ଏହି ଘଟଣାରେ ଇଡି ତଦନ୍ତରେ ରବର୍ଟ ଏବଂ ତାଙ୍କ ମାଙ୍କୁ ସହଯୋଗ କରିବାକୁ ପଡ଼ିବ। ଉପର ଅଦାଲତରେ ଆବେଦନ କରିବାକୁ ଦୁଇ ସପ୍ତାହ ସମୟ ଦିଆଯାଇଛି। ସେପର୍ଯ୍ୟନ୍ତ ଗିରଫଦାରୀ ଉପରେ ପ୍ରତିବନ୍ଧକ ଲାଗୁ ହେବ।
୨୦୧୮ଠାରୁ ଚାଲିଥିବା ଏହି ମାମଲାରେ ହାଇକୋର୍ଟ ବର୍ତ୍ତମାନ ପର୍ଯ୍ୟନ୍ତ ରବର୍ଟ ଭଦ୍ରାଙ୍କ ଗିରଫଦାରୀକୁ ସ୍ଥଗିତ ରଖିଥିଲେ। ବର୍ତ୍ତମାନ ଯଦି ଦୁଇ ସପ୍ତାହ ମଧ୍ୟରେ ଉପର ଅଦାଲତରୁ କୌଣସି ଆରାମ ମିଳିବ ନାହିଁ, ତେବେ ଭଦ୍ରାଙ୍କୁ ଇଡି ଗିରଫ କରିପାରିବ। ଉଲ୍ଲେଖନୀୟ କଥା ହେଉଛି, ଏହି ମାମଲାରେ ଇଡି ପକ୍ଷରୁ ଏକ ପିଟିଶନ ଦାଖଲ କରି ହାଇକୋର୍ଟରୁ ରବର୍ଟ ଏବଂ ତାଙ୍କ ମାଆଙ୍କ ଗିରଫଦାରୀ ଉପରେ ପ୍ରତିବନ୍ଧକକୁ ହଟାଇବାକୁ ଦାବି କରାଯାଇଥିଲା।
