ୱାଶିଂଟନ,୨୫ ।୧୦: ଆଲୋକର ପର୍ବ ଦୀପାବଳି ସୋମବାର କେବଳ ଭାରତ କାହିଁକି ସାରା ବିଶ୍ୱରେ ପାଳନ କରାଯାଇଥିବା ଦେଖାଯାଇଛି । ଆମେରିକାର ହ୍ୱାଇଟ ହାଉସରେ ପାଳନ କରାଯାଇଥିବା ଦୀପାବଳିକୁ ନେଇ ବିଶେଷ ଚର୍ଚ୍ଚା ହୋଇଛି । ଏବେ ପର୍ଯ୍ୟନ୍ତ ହ୍ୱାଇଟ ହାଉସରେ ଯେତେଥର ଦୀପାବଳୀ ପାଳନ କରାଯାଇଛି ଚଳିତ ବର୍ଷ ସବୁଠାରୁ ବଡ ଧରଣର ଦୀପାବଳି ଏଠାରେ ପାଳନ କରାଯାଇଥିବା କୁହାଯାଉଛି । ଆମେରିକା ରାଷ୍ଟ୍ରପତି ଜୋ ବାଇଡେନ ୨୦୦ ଲୋକଙ୍କ ସହ ଏହି ଦୀପାବଳି ଉତ୍ସବ ପାଳନ କରିଛନ୍ତି । ଏହି ଉତ୍ସବକୁ ଆମେରିକାର ଏକ ଅଂଶ କରିଥିବାରୁ ସେ ଜନ ସାଧାରଣଙ୍କୁ ଧନ୍ୟବାଦ ଦେଇଥିଲେ ।
ଆମେରିକା ରାଷ୍ଟ୍ରପତି ଜୋ ବାଇଡେନ ଓ ତାଙ୍କ ପତ୍ନୀ ଡକ୍ଟର ଜିଲ ବାଇଡେନ ହ୍ୱାଇଟ ହାଉସରେ ଦୀପାବଳି ପାଳନ କରିଥିଲେ । ଉପରାଷ୍ଟ୍ରପତି କମଲା ହାରିସ ବି ହ୍ୱାଇଟ ହାଉସରେ ଦୀପାବଳି ପାଳନ କରିଛନ୍ତି । ଏଥିରେ ୨୦୦ରୁ ଅଧିକ ନାମୀଦାମୀ ଭାରତୀୟ-ଆମେରିକୀୟ ଯୋଗ ଦେଇଥିଲେ । ସେଥିପାଇଁ ହ୍ୱାଇଟ ହାଉସରେ ଚଳିତ ବର୍ଷର ଦୀପାବଳି ଉତ୍ସବ ସବୁଠାରୁ ବଡ ଧରଣର ହୋଇଥିଲା ବୋଲି କୁହାଯାଉଛି । ସୂଚନାଯୋଗ୍ୟ, ହ୍ୱାଇଟ ହାଉସରେ ଦୀପାବଳି ପାଳନ ପରମ୍ପରା ବହୁ ପୁରୁଣା । ଏହାର ଆରମ୍ଭ ଜର୍ଜ ବୁଶ ପ୍ରଶାସନଙ୍କ ସମୟରେ ଆରମ୍ଭ ହୋଇଥିବା ବେଲେ ଏବେ ପର୍ଯ୍ୟନ୍ତ ଏହା ଚାଲି ଆସିଛି ।
ଚଳିତ ବର୍ଷ ଦୀପାବଳିରେ ହ୍ୱାଇଟ ହାଉସରେ ସାଂସ୍କୃତିକ କାର୍ଯ୍ୟକ୍ରମର ବି ଆୟୋଜନ କରାଯାଇଥିଲା । ଏହି ସମୟରେ ଭାରତୀୟ ସଂସ୍କୃତିର ଝଲକ ଦେଖିବାକୁ ମିଳିଥିଲା ।