ମେଲବୋର୍ନ,୨୯।୧୨: ଚଳିତ ଆଶେସ ସିରିଜ୍ର ତୃତୀୟ ତଥା ମେଲବୋର୍ନ ଟେଷ୍ଟରେ ଇଂଲଣ୍ଡ ଏକ ଇନିଂସ ଓ ୧୪ ରନ୍ରେ ଅଷ୍ଟ୍ରେଲିଆଠାରୁ ପରାଜୟ ବରଣ କରିଛି। ଏଭଳି ଆତ୍ମସମର୍ପଣ ପରେ ଇଂଲଣ୍ଡ ଅଧିନାୟକ ଜୋ ରୁଟ୍ଙ୍କୁ ଅଧିନାୟକ ପଦ ଛାଡ଼ିଦେବାକୁ କହିଛନ୍ତି ପୂର୍ବତନ ଖେଳାଳି ଜିଓଫ୍ରେ ବୟକଟ।
“ବର୍ତ୍ତମାନ ଅଷ୍ଟ୍ରେଲିଆ ୩-୦ରେ ଆଗୁଆ ଅଛି। ଆଶେସ ଚାଲିଗଲା। ଅଷ୍ଟ୍ରେଲିଆ ଆମ ଠାରୁ ଅଧିକ ଭଲ ନୁହେଁ। ରୁଟ୍ ଦୟାକାରି ଏଭଳି ଆଉ କୁହ ନାହିଁ। ତୁମେ କେଉଁ ଦୁନିଆରେ ରହୁଚ, ମୋତେ ଫରକ ବଡ଼ୁ ନାହିଁ। କିନ୍ତୁ ଆମ ସହ ଥଟା କରିବା ବନ୍ଦ କର। ସେ ଯାହା କହିଥିଲେ ଯଦି ସେଥିରେ ତାଙ୍କର ବିଶ୍ୱାସ ଥାଏ, ତେବେ ତାଙ୍କର ଅଧିନାୟକ ପଦ ଛାଡ଼ିବାର ସମୟ ଆସିଯାଇଛି। ଜଳ ଜଳ ହୋଇ ଦଳର ରେକର୍ଡ ଦେଖାଉଛି। ରୁଟ୍ଙ୍କ ଛଡ଼ା ଆମର କେହି ବ୍ୟାଟିଂ କରି ପାରୁ ନାହାନ୍ତି। ଆମ ବୋଲିଂ ମଧ୍ୟ ସାଧାରଣ” ବୋଲି ଟେଲିଗ୍ରାଫ ପାଇଁ ଏକ ସ୍ତମ୍ବରେ ଲେଖିଛନ୍ତି ବୟକଟ। ତାଙ୍କ ଭଳି ଇଂଲଣ୍ଡ ଦଳକୁ କଡ଼ା ସମାଲୋଚନା କରିଛନ୍ତି ପୂର୍ବତନ ଅଧିନାୟକ ଇଆନ ବୋଥାମ।
