ଚେଷ୍ଟର-ଲେ-ଷ୍ଟ୍ରିଟ,୨୯।୬: ଇଂଲଣ୍ଡ ବ୍ୟାଟ୍ସମ୍ୟାନ ଜୋ ରୁଟ୍ ଏଠାରେ ମଙ୍ଗଳବାର ଶ୍ରୀଲଙ୍କା ବିପକ୍ଷରେ ଖେଳାଯାଇଥିବା ଦ୍ୱିତୀୟ ଦିନିକିଆ ମ୍ୟାଚ୍ରେ ୭୯* ରନ୍ର ଇନିଂସ ଖେଳିବା ଅବସରରେ ଦିନିକିଆ କ୍ରିକେଟରେ ୬ ହଜାର ରନ୍ ପୂରଣ କରିଛନ୍ତି। ଏହି ମାଇଲଷ୍ଟୋନ ଛୁଇଁବାରେ ସେ ବିଶ୍ୱର ଚତୁର୍ଥ ଦ୍ରୁତତମ ବ୍ୟାଟ୍ସମ୍ୟାନ। ଏହି ଧାରାରେ ପୂର୍ବତନ ଭାରତୀୟ ଅଧିନାୟକ ସୌରଭ ଗାଙ୍ଗୁଲିଙ୍କୁ ପଛରେ ଛାଡ଼ି ଦେଇଛନ୍ତି ରୁଟ୍। ୬୦୦୦ ରନ୍ ପୂରଣ କରିବା ପାଇଁ ଗାଙ୍ଗୁଲିଙ୍କୁ ୧୪୭ଟି ଇନିଂସ ଲାଗିଥିଲାବେଳେ ରୁଟ୍ ୧୪୧ ତମ ଇନିଂସରେ ଏହି ମାଇଲଷ୍ଟୋନ ଛୁଇଁଛନ୍ତି।
ଦିନିକିଆ ଫର୍ମାଟରେ ଦ୍ରୁତତମ ୬୦୦୦ ରନ୍ ପୂରଣ କରିବାର ରେକର୍ଡ ଦକ୍ଷିଣ ଆଫ୍ରିକାର ପୂର୍ବତନ ବ୍ୟାଟ୍ସମ୍ୟାନ ହାସିମ ଆମଲାଙ୍କ ନାମରେ ରହିଛି। ସେ ମାତ୍ର ୧୨୩ଟି ଇନିଂସରେ ଏହି ମାଇଲଷ୍ଟୋନ ସ୍ପର୍ଶ କରିଥିଲେ। ଏହି ତାଲିକାରେ ତାଙ୍କ ପଛକୁ ବିରାଟ କୋହଲି (୧୩୬ ଇନିଂସ) ଓ କେନ ଓ୍ବିଲିୟମସନ (୧୩୯) ରହିଛନ୍ତି।
