କେସିଙ୍ଗା, ୧୨।୧୧ (ଡି.ଏନ.ଏ.): ଓଡ଼ିଶାର ୩ୟ ଏଭରେଷ୍ଟ ପର୍ବତାରୋହୀ ଭାବେ କଳାହାଣ୍ଡି ଜିଲା କେସିଙ୍ଗାର ଯୋଗବ୍ୟାସ ଭୋଇ ଗିନିଜ୍ ରେକଡର୍ର ଅଧିକାରୀ ହୋଇଛନ୍ତି। ସେ ୧ ଘଣ୍ଟା ମଧ୍ୟରେ ସର୍ବାଧିକ ପର୍ବତାରୋହଣ ଫଟୋ ଫେସ୍ବୁକ୍ରେ ପୋଷ୍ଟ କରି ଏହି ରେକର୍ଡ ହାସଲ କରିଛନ୍ତି। କଳ୍ପନା ଦାଶ ଓ ଗଣେଶ ଜେନାଙ୍କ ପରେ ତୃତୀୟ ପର୍ବତାରୋହୀଭାବେ ଯୋଗବ୍ୟାସ ଏଭରେଷ୍ଟ ଆରୋହଣ କରି ଓଡ଼ିଶାକୁ ଗର୍ବିତ କରିଥିଲେ। ପ୍ରକାଶ ଯୋଗ୍ୟ ଯେ, ଗତ ଅଗଷ୍ଟ ୧୫ରେ ୧ ଘଣ୍ଟା ମଧ୍ୟରେ ଫେସ୍ବୁକ ପେଜ୍ରେ ସର୍ବାଧିକ ପର୍ବତାରୋହଣ ଫଟୋ ପୋଷ୍ଟ କରି ଗିନିଜ ଓ୍ବାଲର୍ଡ ରେକର୍ଡରେ ମାଉଣ୍ଟଟେନ ଟିମ୍ସ ଅଫ ଇଣ୍ଡିଆ ସ୍ଥାନ ପାଇଛି। ଏଥିରେ ଭାରତରୁ ପ୍ରାୟ ୫ ହଜାର ପର୍ବତାରୋହୀ ଭାଗ ନେଇଥିଲେ। ଓଡିଶାର ଯୋଗବ୍ୟାସ ମାଉଣ୍ଟ ଷ୍ଟକ କାଙ୍ଗ୍ରୀ ଆରୋହଣ ସମୟର ଫଟୋ ପୋଷ୍ଟ କରି ଗିନିଜ ଓ୍ବାଲର୍ଡ ରେକର୍ଡ ସାର୍ଟିଫିକେଟ୍ ପାଇଛନ୍ତି। ସେ କଳାହାଣ୍ଡିର ନର୍ଲା ବ୍ଲକ ଅଧୀନସ୍ତ ରୁପ୍ରା ଗ୍ରାମପଞ୍ଚାୟତର ରୁପ୍ରା ଉଚ୍ଚ ପ୍ରାଥମିକ ବିଦ୍ୟାଳୟର ସହକାରୀ ଶିକ୍ଷକ ଭାବରେ କାର୍ଯ୍ୟରତ। ଏହି କାର୍ଯ୍ୟକ୍ରମକୁ ତାମିଲନାଡୁର କୋଏମ୍ବାଟୁରସ୍ଥିତ ଟ୍ରାସକେଣ୍ଡ ଆଡଭେଞ୍ଚର ଏବଂ ସୋନ ଲିଓପାଡ ଆଡଭେଞ୍ଚର ଆୟୋଜନ କରିଥିଲେ। ନେହେରୁ ପର୍ବତାରୋହଣ ସଂସ୍ଥାନ, ଜିମ୍ ପର୍ବତାରୋହଣ ସଂସ୍ଥାନ, ହିମାଳୟାନ ପର୍ବତାରୋହଣ ସଂସ୍ଥାନ, ଭାରତୀୟ ପର୍ବତାରୋହଣ ସଂସ୍ଥାନ, ଭାରତ ସରକାରଙ୍କର ଯୁବସେବା ଏବଂ କ୍ରୀଡା ବିଭାଗ ଏବଂ କେନ୍ଦ୍ର ପର୍ଯ୍ୟଟନ ଓ ସଂସ୍କୃତି ବିଭାଗ ଆଦି ସହଯୋଗ କରିଥିଲେ। ଯୋଗବ୍ୟାସ ୭ ମହାଦେଶରୁ ୫ଟି ମହାଦେଶର ଉଚ୍ଚତମ ଗିରିଶୃଙ୍ଗ ସଫଳତାର ସହ ଆରୋହଣ କରିଛନ୍ତି।