ମାଲକାନଗିରି/ଖଇରପୁଟ, ୩୦।୯(ଡି.ଏନ୍.ଏ.): ବଣ୍ଡାଘାଟି ଅଞ୍ଚଳର ବିକାଶକୁ ରାଜ୍ୟ ସରକାର ଗୁରୁତ୍ୱ ଦେଉଛନ୍ତି। ମାଓବାଦୀମାନେ ବିକାଶରେ ବାଧକ ନ ସାଜି ସମାଜର ମୁଖ୍ୟସ୍ରୋତରେ ସାମିଲ ହୁଅନ୍ତୁ। ବିଏସ୍ଏଫ୍ ମାଲକାନଗିରି ଜିଲା ତଥା ବଣ୍ଡାଘାଟି ଅଞ୍ଚଳବାସୀଙ୍କ ସୁରକ୍ଷା ପାଇଁ ସର୍ବଦା ସଜାଗ ରହିଛି। ମାଲକାନଗିରି ଜିଲା ବଣ୍ଡାଘାଟିସ୍ଥିତ ଅଣ୍ଡ୍ରାହାଲ୍ ଓ ମୁଦୁଲିପଡ଼ା ବିଏସ୍ଏଫ୍ କ୍ୟାମ୍ପରେ ମାଓବାଦୀ କାର୍ଯ୍ୟକଳାପ ନେଇ ସ୍ଥିତି ସମୀକ୍ଷା ବୈଠକରେ ବିଏସ୍ଏଫ୍ ଏଡିଜି ରାଜଓ୍ବିନ୍ଦର ସିଂହ ଭଟ୍ଟି ମାଓବାଦୀଙ୍କ ଉଦ୍ଦେଶ୍ୟରେ ଏହା କହିଛନ୍ତି। ଦୁଇ ବିଏସ୍ଏଫ୍ କ୍ୟାମ୍ପ ପରିଦର୍ଶନ କରିବା ପରେ ଏଡିଜି ଜିଲାର ବରିଷ୍ଠ ବିଏସ୍ଏଫ୍ ଅଧିକାରୀଙ୍କୁ ନେଇ ବୈଠକ କରିଥିଲେ। ବଣ୍ଡାଘାଟିକୁ ମାଓବାଦୀମାନେ ନୂଆ ଆଶ୍ରୟସ୍ଥଳୀ କରିବା ସହ ହିଂସା ବଢ଼ୁଛି। ତେଣୁ ଏହାକୁ ରୋକିବାକୁ ବୈଠକରେ ବିଭିନ୍ନ ରଣନୀତି ପ୍ରସ୍ତୁତ କରାଯାଇଥିଲା। ସୂଚନାଯୋଗ୍ୟ, କିଛିଦିନ ପୂର୍ବରୁ ବଣ୍ଡାଘାଟିର ମୁଦୁଲିପଡ଼ା ଏବଂ ଅଣ୍ଡ୍ରାହାଲଠାରେ ଦୁଇଟି ବିଏସ୍ଏଫ୍ କ୍ୟାମ୍ପ ପ୍ରତିଷ୍ଠା କରାଯାଇଥିଲା। ଏଡିଜିଙ୍କ କ୍ୟାମ୍ପ ପରିଦର୍ଶନ ଓ ସମୀକ୍ଷା କାର୍ଯ୍ୟକ୍ରମରେ ବିଏସ୍ଏଫ୍ ଆଇଜି ସତୀଶ ଚନ୍ଦ୍ର ବୁଡାକୋଟି, କୋରାପୁଟ ବିଏସ୍ଏଫ୍ ମୁଖ୍ୟାଳୟର ଡିଆଇଜି ମଦନଲାଲ ଏବଂ ମାଲକାନଗିରି ଡିଆଇଜି ସଞ୍ଜୟ କୁମାର ସିଂହ ଉପସ୍ଥିତ ଥିଲେ। ଏହାପରେ ଏଡିଜି ଏବଂ ଅନ୍ୟ ବରିଷ୍ଠ ଅଧିକାରୀ ସ୍ବାଭିମାନ ଅଞ୍ଚଳର ଜନ୍ତାପାଇ ବିଏସ୍ଏଫ୍ କ୍ୟାମ୍ପ ପରିଦର୍ଶନ କରିବା ସହ ମାଲକାନଗିରିସ୍ଥିତ ବିଏସ୍ଏଫ୍ ମୁଖ୍ୟାଳୟରେ ପହଞ୍ଚି ବରିଷ୍ଠ ଅଧିକାରୀମାନଙ୍କ ସହ ଛତିଶଗଡ଼, ଛତିଶଗଡ଼ ସୀମାନ୍ତ ଏବଂ ମାଥିଲି ଥାନା ଅନ୍ତର୍ଗତ ତୁଳସୀ ପାହାଡ଼ ଅଞ୍ଚଳରେ ମାଓବାଦୀ ସମସ୍ୟା ନେଇ ଆଲୋଚନା କରିଥିଲେ।