ଦଶମନ୍ତପୁର,୧୬ା୧ ଡି.ଏନ.ଏ.): କୋରାପୁଟ ଜିଲା ଦଶମନ୍ତପୁର ବ୍ଲକଠାରୁ ୩ କି.ମି. ଦୂରରେ ଥିବା ଗୁମ୍ଭାରିଗୁଡ଼ା ଗ୍ରାମ ସବୁ କ୍ଷେତ୍ରରେ ଅବହେଳିତ ହୋଇରହିଛି। ଏଠାରେ ସରକାରଙ୍କ କୌଣସି ଯୋଜନାର ସୁଫଳ ଲୋକଙ୍କ ନିକଟରେ ପହଞ୍ଚତ୍ପାରୁନାହିଁ। ଅନ୍ୟପକ୍ଷରେ ଏହି ଗୁମ୍ଭାରିଗୁଡ଼ା ଗ୍ରାମ ରାୟଗଡ଼ା ଜିଲା କାଶୀପୁର ବ୍ଲକର କୁଚେଇପଦର ପଞ୍ଚାୟତ ଅଧୀନରେ ଥିବାରୁ ଦଶମନ୍ତପୁର ବ୍ଲକ ପ୍ରଶାସନ ଉନ୍ନୟନମୂଳକ କାର୍ଯ୍ୟ ପାଇଁ କୌଣସି ପଦକ୍ଷେପ ଗ୍ରହଣ କରିପାରୁାହିଁି। ଏପରିସ୍ଥଳେ ଦଶମନ୍ତପୁର ବ୍ଲକରେ ମିଶିବା ଲାଗି ଗ୍ରାମବାସୀଙ୍କ ସ୍ବର କ୍ରମଶଃ ଦୃଢ଼ ହେବାରେ ଲାଗିଛି।
୫୭ଟି ଆଦିବାସୀ ପରିବାର ବସବାସ କରୁଥିବା ଏହି ଗ୍ରାମର ଜନସଂଖ୍ୟା ରହିଛି ୨ଶହ। ରାୟଗଡ଼ା ଜିଲା ପ୍ରଶାସନ ଏବଂ ବ୍ଲକ ପ୍ରଶାସନର ଅବହେଳା ଯୋଗୁ ଗ୍ରାମରେ ବିକାଶ ଅପହଞ୍ଚ ହୋଇ ରହିଛି। ଏତେ ସଂଖ୍ୟକ ଲୋକଙ୍କ ପାଇଁ ଗ୍ରାମରେ ରହିଛି ଗୋଟିଏ ନଳକୂପ। ପାନୀୟ ଜଳ ଆବଶ୍ୟକତା ପୂରଣ ଲାଗି ଗ୍ରାମବାସୀ ନିକଟସ୍ଥ ଝରଣା ଉପରେ ନିର୍ଭର କରନ୍ତି। କେବେ ଗ୍ରାମରେ କୌଣସି ସରକାରୀ ଅଧିକାରୀଙ୍କ ପାଦ ପଡ଼ିନାହିଁ ବୋଲି କହନ୍ତି ସେମାନେ। ଗ୍ରାମଠାରୁ ଦଶମନ୍ତପୁର ପାଖ ହେଉଥିବାରୁ ସବୁ କାର୍ଯ୍ୟରେ ସେମାନେ ଦଶମନ୍ତପୁର ଉପରେ ନିର୍ଭର କରନ୍ତି। ବ୍ଲକ କାର୍ଯ୍ୟାଳୟରୁ ନିଜ ପଞ୍ଚାୟତକୁ ଯିବାକୁ ହେଲେ ସେମାନଙ୍କୁ ୭୦ କି.ମି. ଯିବାକୁ ପଡ଼େ। ଗ୍ରାମରେ କୌଣସି ଅଘଟଣ ଘଟିଲେ ୩୫ କି.ମି. ଦୂର ଦୋରାଗୁଡ଼ା ଥାନାକୁ ଯିବାକୁ ପଡୁଥିବା କହନ୍ତି କନ୍ଦୁ ନାଚିକା, କେମିଡି ମାଣ୍ଡିଙ୍ଗା, ଆରତ ନାଚିକା, ମାଧବ ପ୍ରାସିକା, ଦୋରା ପ୍ରାସିକା, ଗୋପାଳ ମାଣ୍ଡିଙ୍ଗା, ତିଳସୀ ନାଚିକା, ଜ୍ୟୋତି ପ୍ରାସିକା, ସାଦାଇ ମାଣ୍ଡିଙ୍ଗା, ଭାଙ୍ଗାରି ନାଚିକା, ସିଙ୍ଗାରି ପ୍ରାସିକା, କମଳା ମାଣ୍ଡିଙ୍ଗା ପ୍ରମୁଖ ଗ୍ରାମବାସୀ। ସବୁ କ୍ଷେତ୍ରରେ ଆମେ ଅବହେଳିତ ହେଉଥିବାରୁ ଆମକୁ ଦଶମନ୍ତପୁର ବ୍ଲକରେ ମିଶାଇବାକୁ ସେମାନେ ଦାବି କରିଛନ୍ତି। ନିର୍ବାଚନ ସମୟରେ ଅନେକ ନେତା ତୁମକୁ ଦଶମନ୍ତପୁର ବ୍ଲକରେ ମିଶାଇ ଦେବୁ କହି ଭୋଟ ନେଇ ପରେ ଭୁଲିଯାଉଛନ୍ତି ବୋଲି ଗ୍ରାମବାସୀ ଅଭିଯୋଗ କରିଛନ୍ତି। ଆମକୁ ଦଶମନ୍ତପୁର ବ୍ଲକରେ ନ ମିଶାଇଲେ ଆଗାମୀ ଦିନରେ ଆମେ ଆନ୍ଦୋଳନ କରିବୁ ବୋଲି ଚେତାବନୀ ଦେଇଛନ୍ତି।