କାବୁଲ, ୧୮।୧୦: ଆଫଗାନିସ୍ତାନରେ ମିଳିତ ସୈନ୍ୟ ବାହିନୀ ଏବଂ ତାଲିବାନ ବିଦ୍ରୋହୀ ମୁହାଁମୁହିଁ ହୋଇଛନ୍ତି। ଏଥିରେ ୭ ସୈନ୍ୟ ନିହତ ହୋଇଥିବାବେଳେ ୫ ତାଲିବାନ ବିଦ୍ରୋହୀଙ୍କ ମୃତ୍ୟୁ ଘଟିଛି। ଉତ୍ତର କୁନ୍ଦୁଜ ପ୍ରଦେଶର ଇମାମ ସାହିବ୍ ଜିଲାରେ ଏହା ଘଟିଛି। ଜିଲାର ଆବ ଫ୍ରୋଶାନ୍ ଏବଂ ବଖାମଲ କୋଚା ଅଞ୍ଚଳରେ ଆଫଗାନୀସ୍ତାନ ଜାତୀୟ ପ୍ରତିରକ୍ଷା ବାହିନୀ ଏବଂ ସୁରକ୍ଷାକର୍ମୀ ମିଳିତ ଭାବେ ତାଲିବାନ ବିଦ୍ରୋହୀଙ୍କ ମୁକାବିଲା କରିଥିଲେ। ଏସମ୍ପର୍କରେ ଜିଲା ମୁଖ୍ୟ ମହବୁବୁଲ୍ଲା ସୟିଦ୍ ସୂଚନା ଦେଇଛନ୍ତି। ଏଥିରେ ୫ ଜଣ ତାଲିବାନ ବିଦ୍ରୋହୀ ଆହତ ହୋଇଛନ୍ତି। ସେହିପରି ମିଳିତ ସୈନ୍ୟ ବାହିନୀର ୩ ଜଣ ସଦସ୍ୟ ଆହତ ହୋଇଛନ୍ତି। ମିଳିତ ସୈନ୍ୟ ବାହିନୀର ଆହତ ସଦସ୍ୟଙ୍କୁ ଚିକିତ୍ସା ଲାଗି ହସ୍ପିଟାଲରେ ଭର୍ତ୍ତି କରାଯାଇଛି। ଏହି ଜିଲାରେ ଚଳିତ ମାସରେ ଲଗାତାର ମିଳିତ ସୈନ୍ୟ ବାହିନୀ ଏବଂ ତାଲିବାନ ବିଦ୍ରୋହୀଙ୍କ ମଧ୍ୟରେ ସଂଘର୍ଷ ଘଟୁଥିବା ଜିଲା ମୁଖ୍ୟ କହିଛନ୍ତି।
