ଜୋହାନ୍ସବର୍ଗ, ୧୦।୯: ବିଶ୍ୱ କ୍ରିକେଟ୍ରେ ଫିଲ୍ଡିଂ ପାଇଁ ନିଜର ସ୍ବତନ୍ତ୍ର ପରିଚୟ ସୃଷ୍ଟି କରିଥିବା ଦକ୍ଷିଣ ଆଫ୍ରିକାର ପୂର୍ବତନ ଖେଳାଳି ଜଣ୍ଟି ରୋଡ୍ସ ସ୍ବିଡେନ ଜାତୀୟ କ୍ରିକେଟ୍ ଦଳର ମୁଖ୍ୟ କୋଚ୍ ଭାବେ ନିଯୁକ୍ତ ହୋଇଛନ୍ତି। ସ୍ବିଡେନ କ୍ରିକେଟ୍ ପକ୍ଷରୁ ଗୁରୁବାର ଏହା ସ୍ପଷ୍ଟ କରାଯାଇଛି। ଆଇପିଏଲ୍ ୧୩ତମ ସଂସ୍କରଣ ପରେ ୫୧ ବର୍ଷୀୟ ଜଣ୍ଟି ଏହି ଗୁରୁ ଦାୟିତ୍ୱ ଗ୍ରହଣ କରିବେ ବୋଲି ଜଣାପଡ଼ିଛି। ୧୯୯୦ ଦଶକରେ ବିଶ୍ୱ କ୍ରିକେଟ୍ରେ ଫିଲ୍ଡିଂରେ ସ୍ବତନ୍ତ୍ର ଛାପ ଛାଡ଼ିଥିବା ଜଣ୍ଟି ବର୍ତ୍ତମାନ ଆଇପିଏଲ୍ରେ କିଙ୍ଗ୍ସ ଇଲେଭେନ ପଞ୍ଜାବ ଦଳର ଫିଲ୍ଡିଂ କୋଚ୍ ଭାବେ ଦାୟିତ୍ୱ ତୁଲାଉଛନ୍ତି। ଏହି ନୂଆ ଭୂମିକାକୁ ନେଇ ଜଣ୍ଟି ବେଶ୍ ରୋମାଞ୍ଚିତ ରହିଛନ୍ତି। ‘ମୋ ପରିବାର ସହିତ ସ୍ବିଡେନ ଯିବାକୁ ଏବଂ ସେଠାରେ କାମ କରିବାକୁ ଉତ୍ସାହିତ ରହିଛି। ଠିକ୍ ସମୟରେ ମୋତେ ଏହି ଦାୟିତ୍ୱ ମିଳିଛି’ ବୋଲି ଜଣ୍ଟି ତାଙ୍କ ପ୍ରତିକ୍ରିୟାରେ କହିଛନ୍ତି।
ଚମତ୍କାର ଫିଲ୍ଡିଂ ଲାଗି ପରିଚିତ ରୋଡ୍ସ ୧୯୯୨ରୁ ୨୦୦୩ ପର୍ଯ୍ୟନ୍ତ ଦକ୍ଷିଣ ଆଫ୍ରିକା ପକ୍ଷରୁ ୫୨ ଟେଷ୍ଟ ଓ ୨୪୫ ଦିନିକିଆ ମ୍ୟାଚ୍ ଖେଳିଥିଲେ। ଟେଷ୍ଟରେ ସେ ୨,୫୩୨ ଓ ଦିନିକିଆରେ ୫,୯୩୫ ରନ କରିଛନ୍ତି।
