ନୂଆଦିଲ୍ଲୀ,୨୪।୩: ଭାଜପା ସଭାପତି ଜେପି ନଡା ଶୁକ୍ରବାର କଂଗ୍ରେସ ନେତା ରାହୁଲ ଗାନ୍ଧୀଙ୍କ ଉପରେ ବର୍ଷିଛନ୍ତି। ରାହୁଲ ଓବିସି ସମ୍ପ୍ରଦାୟକୁ ଅପମାନିତ କରିଥିବା ଅଭିଯୋଗ କରିଛନ୍ତି ନଡା।
ନଡା କହିଛନ୍ତି, କଂଗ୍ରେସ ନେତା ରାହୁଲ ଗାନ୍ଧୀ ତଥ୍ୟ ବିଷୟରେ ଅଜ୍ଞାତ ଏବଂ ମନଗଢା ଅଭିଯୋଗ କରିବାର ତାଙ୍କର ପୁରୁଣା ଅଭ୍ୟାସ ରହିଛି। ୨୦୧୯ ଲୋକସଭା ନିର୍ବାଚନ ପୂର୍ବରୁ ରାହୁଲ ରାଫଲେ ନାମରେ ଦେଶକୁ ବିଭ୍ରାନ୍ତ କରିବାକୁ ଚେଷ୍ଟା କରିଥିଲେ। ଏଥିପାଇଁ ମାନ୍ୟବର ସୁପ୍ରିମକୋର୍ଟ ତାଗିଦ କରିଥିଲେ। ମନଗଢା ଅଭିଯୋଗ ପାଇଁ ବିନା ସର୍ତ୍ତରେ କ୍ଷମା ପ୍ରାର୍ଥନା ମଧ୍ୟ କରିଥିଲେ। ରାହୁଲ ଗାନ୍ଧୀଙ୍କ ଅହଂକାର ବହୁତ ବଡ ଏବଂ ବୁଝାମଣା ବହୁତ ଛୋଟ। ତାଙ୍କର ରାଜନୈତିକ ଲାଭ ପାଇଁ ସେ ସମଗ୍ର ଓବିସି ସମ୍ପ୍ରଦାୟକୁ ଅପମାନିତ କରିଥିଲେ। ସମାଜ ତଥା କୋର୍ଟ ଦ୍ୱାରା ବାରମ୍ବାର କ୍ଷମା ପ୍ରାର୍ଥନା କରିବାର ବିକଳ୍ପକୁ ସେ ଅଣଦେଖା କରିଥିଲେ ଏବଂ ଓବିସି ସମ୍ପ୍ରଦାୟର ଭାବନାକୁ କ୍ରମାଗତ ଭାବରେ ଆଘାତ ଦେଇଥିଲେ। ଗଣତାନ୍ତ୍ରିକ ଢଙ୍ଗରେ ରାହୁଲଙ୍କ ଏହି ଅପମାନ ପାଇଁ ପୁରା ଓବିସି ସମ୍ପ୍ରଦାୟ ପ୍ରତିଶୋଧ ନେବ।
‘ଚୌକିଦାର ଚୋର ହୈ’ ସ୍ଲୋଗାନ ଦେଇ ୨୦୧୯ ନିର୍ବାଚନ ବୈତରଣୀ ପାର୍ ହେବାକୁ ଚାହୁଁଥିଲେ, କିନ୍ତୁ ଜନତା ଜନାର୍ଦ୍ଦନ ଏହାକୁ ତୀବ୍ର ନିନ୍ଦା କରିଥିଲେ। ଏହାର ଫଳାଫଳ ଥିଲା କଂଗ୍ରେସର ଶୋଚନୀୟ ପରାଜୟ ବୋଲି ନଡା କହିଛନ୍ତି।
