ନୂଆଦିଲ୍ଲୀ,୧୩।୧୨ : ଗଣ ବଳାତ୍କାର ଓ ହତ୍ୟା ମାମଲାରେ ୧୧ ଦୋଷୀଙ୍କୁ ମୁକ୍ତ କରିବାକୁ ଚ୍ୟାଲେଞ୍ଜ କରି ଗୁଜରାଟ ଦଙ୍ଗାର ପୀଡିତା ବିଲକିସ ବାନୋଙ୍କ ଆବେଦନ ଉପରେ ସୁପ୍ରିମକୋର୍ଟର ବିଚାରପତି ଜଷ୍ଟିସ ବେଲା ଏମ ତ୍ରିବେଦୀ ନିଜକୁ ଏହି ମାମଲାରୁ ଅଲଗା କରିଛନ୍ତି। ମଙ୍ଗଳବାର ଜଷ୍ଟିସ ଅଜୟ ରାସ୍ତୋଗୀ ଏବଂ ଜଷ୍ଟିସ ବେଲା ଏମ ତ୍ରିବେଦୀଙ୍କ ଏକ ବେଞ୍ଚ ଦ୍ୱାରା ଏହି ମାମଲାର ଶୁଣାଣି ପୂର୍ବରୁ ଏହା ଜଣାପଡ଼ିଥିଲା। ଜଷ୍ଟିସ ରାସ୍ତୋଗୀ କହିତତ୍ଲେ ଯେ ଜଷ୍ଟିସ ତ୍ରିବେଦୀ ଏହି ମାମଲାର ଶୁଣାଣି କରିବାକୁ ଚାହୁଁନାହାଁନ୍ତି।]
ଏହା ସହିତ ଜଷ୍ଟିସ ରାସ୍ତୋଗୀଙ୍କ ନେତୃତ୍ୱରେ ଏକ ବେଞ୍ଚ ଏହି ମାମଲାକୁ ତାଲିକାଭୁକ୍ତ କରିବାକୁ ନିର୍ଦ୍ଦେଶ ଦେଇଛନ୍ତି ଯେଉଁଠି ଏହି ବେଞ୍ଚର କୌଣସି ବିଚାରପତିଙ୍କୁ ନେଇ ତାହା ଗଠିତ ହୋଇ ନଥିବ। ତେବେ ଜଷ୍ଟିସ ତ୍ରିବେଦୀଙ୍କ ମାମଲାରୁ ଅଲଗା ହେବାର କୌଣସି କାରଣ ଦର୍ଶାଇ ନାହାନ୍ତି।
ବିଲକିସ ବାନୋ ସୁପ୍ରିମକୋର୍ଟରେ ଏକ ପୃଥକ ଆବେଦନ କରିଛନ୍ତି, ଜଣେ ଦୋଷୀ ସାବ୍ୟସ୍ତ ହେବାପରେ ସର୍ବୋଚ୍ଚ ନ୍ୟାୟାଳୟଙ୍କର ୧୩ ମେ ୨୦୨୨ ଆଦେଶର ସମୀକ୍ଷା କରିବାକୁ ଚାହୁଁଛନ୍ତି। କୋର୍ଟ ତାଙ୍କ ଆଦେଶରେ ଗୁଜରାଟ ସରକାରଙ୍କୁ ୯ ଜୁଲାଇ ୧୯୯୨ ର ଏକ ନୀତି ଅନୁଯାୟୀ ଦୋଷୀଙ୍କୁ ସମୟ ପୂର୍ବରୁ ମୁକ୍ତ କରିବା ପାଇଁ ଆବେଦନ କରିବାକୁ କହିଥିଲେ।
ଏହା ପରେ, ଚଳିତ ବର୍ଷ ଅଗଷ୍ଟ ୧୫ରେ ଗୁଜୁରାଟ ସରକାର ସମସ୍ତ ୧୧ଦୋଷୀଙ୍କୁ ମୁକ୍ତ କରି ସେମାନଙ୍କୁ ଦଣ୍ଡରୁ ମୁକ୍ତ କରିଥିଲେ। ବିଲକିସ ବାନୋ ତାଙ୍କ ପିଟିଶନରେ କହିଛନ୍ତି ଯେ ଗୁଜରାଟ ସରକାର ତାଙ୍କ ମୁକ୍ତି ସମ୍ପର୍କରେ ସୁପ୍ରିମକୋର୍ଟ ଦେଇଥିବା ଆଇନକୁ ଅଣଦେଖା କରି ଏହି ନିର୍ଦ୍ଦେଶ ଦେଇଛନ୍ତି।
