ନାଗରିକତ୍ୱ ଆଇନର ଧାରା ୬-ଏ କୁ ଚ୍ୟାଲେଞ୍ଜ କରୁଥିବା ଆବେଦନ ଉପରେ ରାୟ ସଂରକ୍ଷିତ, ସମ୍ବିଧାନ ବେଞ୍ଚରେ ଶୁଣାଣି ଶେଷ …

ନୂଆଦିଲ୍ଲୀ,୧୨।୧୨ : ସୁପ୍ରିମକୋର୍ଟର ପାଞ୍ଚ ଜଣିଆ ସମ୍ବିଧାନ ବେଞ୍ଚ ନାଗରିକତ୍ୱ ଆଇନର ଧାରା ୬-ଏ ର ସାମ୍ବିଧାନିକ ବୈଧତାକୁ ଚ୍ୟାଲେଞ୍ଜ କରୁଥିବା ଆବେଦନ ଉପରେ ନିଜର ରାୟ ସଂରକ୍ଷିତ ରଖିଛନ୍ତି। ଆସାମ ଚୁକ୍ତିନାମାକୁ ଆଗକୁ ନେବା ପାଇଁ ୧୯୮୫ ରେ ଏକ ସଂଶୋଧନ ମାଧ୍ୟମରେ ଏହି ବିଭାଗକୁ ସମ୍ବିଧାନରେ ଅନ୍ତର୍ଭୁକ୍ତ କରାଯାଇଥିଲା ।

ପ୍ରଧାନ ବିଚାରପତି ଡି.ଓ୍ବାଇ. ଚନ୍ଦ୍ରଚୂଡଙ୍କ ନେତୃତ୍ୱରେ ଏକ ପାଞ୍ଚ ଜଣିଆ ସମ୍ବିଧାନ ବେଞ୍ଚ ଏହି ମାମଲାର ଶୁଣାଣି କରିଥିଲେ। ଏହି ରାୟ ସଂରକ୍ଷଣ ପୂର୍ବରୁ ଚାରି ଦିନ ପାଇଁ ଆଟର୍ନି ଜେନେରାଲ ଆର ଭେଙ୍କଟାରମଣି, ସୋଲିସିଟର ଜେନେରାଲ ତୁଷାର ମେହେଟ୍ଟା, ବରିଷ୍ଠ ଓକିଲ ଶ୍ୟାମ ଦିଓ୍ବାନ, କପିଲ ସିବଲ ଏବଂ ଅନ୍ୟମାନଙ୍କ ଯୁକ୍ତି ଶୁଣାଣି କରିଥିଲେ। ୍‌ଧାରା ୬-ଏ ର ସାମ୍ବିଧାନିକ ବୈଧତାକୁ ନେଇ ୧୭ ଟି ଆବେଦନ କରାଯାଇଥିଲା। ଆସାମ ଚୁକ୍ତିନାମା ଅନୁଯାୟୀ ଧାରା ୬-ଏ ସମ୍ବିଧାନର ନାଗରିକତ୍ୱ ଅଧିନିୟମରେ ଅନ୍ତର୍ଭୁକ୍ତ ଲୋକଙ୍କ ନାଗରିକତ୍ୱ ସହିତ ଜଡିତ ଏକ ସ୍ବତନ୍ତ୍ର ବ୍ୟବସ୍ଥା ଭାବରେ ଅନ୍ତର୍ଭୁକ୍ତ କରାଯାଇଥିଲା ।

ଆଇନର ଏହି ବ୍ୟବସ୍ଥାରେ ଉଲ୍ଲେଖ କରାଯାଇଛି, ଯେଉଁମାନେ ୧ ଜାନୁଆରୀ ୧୯୬୬ ରେ କିମ୍ବା ପରେ ୨୫ ମାର୍ଚ୍ଚ ୧୯୭୧ ପୂର୍ବରୁ ବାଂଲାଦେଶ ସମେତ ଉଲ୍ଲେଖିତ ଅଞ୍ଚଳରୁ ଆସାମକୁ ଆସିଛନ୍ତି ଏବଂ ଭାରତରେ ରହୁଛନ୍ତି, ସେମାନେ ୧୯୮୫ ର ନାଗରିକତା ସଂଶୋଧନ ଅଧିନିୟମ ଅଧୀନରେ ନାଗରିକତା ପାଇଁ ଯୋଗ୍ୟ ହେବେ। ବିଭାଗ ୧୮ ଅନୁଯାୟୀ ସେମାନଙ୍କୁ ପଞ୍ଜିକରଣ କରିବାକୁ ପଡିବ। ଆଇନର ଏହି ବ୍ୟବସ୍ଥା ୨୫ ମାର୍ଚ୍ଚ ୧୯୭୧ କୁ ବାଂଲାଦେଶରୁ ଆସାମକୁ ଆସିଥିବା ଲୋକଙ୍କ ପାଇଁ ‘କଟ ଅଫ ତାରିଖ’ ଭାବରେ ସ୍ଥିର କରିଛି।