ନୂଆଦିଲ୍ଲୀ, ୨୬ା୮ (ପି.ଟି.)-ନ୍ୟାଶନାଲ ଆଣ୍ଟି ଡୋପିଂ ଏଜେନ୍ସି (ନାଡା) ଡିସିପ୍ଲିନାରୀ ପ୍ୟାନେଲ ଭାରତୀୟ ଜୁଡୋକା ଦୀପାଂଶୁ ବାଲାୟନଙ୍କୁ ୨୨ ମାସ ପାଇଁ ସସ୍ପେଣ୍ଡ କରିଛି। ସେ ନିଷିଦ୍ଧ ଦ୍ରବ୍ୟ ଫୁରୋସେମାଇଡ୍ ବ୍ୟବହାର କରିଥିଲେ, ଯାହାକି ଏକ ଡ୍ୟୁରେଟିକ୍ ମେଡିସିନ୍। ଏସିଆନ ଜୁନିୟର ଜୁଡୋ ଚାମ୍ପିୟନଶିପ୍ ପାଇଁ ଗତବର୍ଷ ଜୁନ୍ରେ ଭୋପାଳଠାରେ ଟ୍ରାଏଲ୍ ବେଳେ ଦୀପାଂଶୁଙ୍କଠାରୁ ସାମ୍ପଲ ସଂଗ୍ରହ କରାଯାଇଥିଲା। ଟ୍ରାଏଲ ବେଳେ ସେ ୯୦କେଜି କାଟେଗୋରି ଜିତିଥିଲେ। ବାଲାୟନ ଜ୍ଞାତସାରରେ ଡୋପ୍ ଅପରାଧ କରିଛନ୍ତି ବୋଲି ପ୍ରମାଣ ଦେବାରେ ନାଡା ବିଫଳ ହୋଇଥିଲା। ତେଣୁ ପ୍ୟାନେଲ ନିୟମାବଳୀ ଧାରା ୧୦.୨.୦ ଅନୁସାରେ ୪ ବର୍ଷ ପରିବର୍ତ୍ତେ ଆଥଲେଟ୍ଙ୍କୁ ୨୨ ମାସ ସସ୍ପେଣ୍ଡ କରିଥିଲା। ଦୀପାଂଶୁ ୨୦୧୯ ଅକ୍ଟୋବର ୧୭ରୁ ସାମୟିକ ସସ୍ପେଣ୍ଡ ହୋଇଥିଲେ। ଫଳରେ ତାଙ୍କୁ ଆଉ ୧ ବର୍ଷ ଏବଂ ୧୦ମାସ ଦଣ୍ଡ ଭୋଗିବାକୁ ପଡ଼ିବ।