କଣାସ,୧୯ା୭(ସ୍ବ.ପ୍ର.): ଅକ୍ଷୟ ତୃତୀୟାଠାରୁ ଚାଷୀମାନେ ଚାଷ କାର୍ଯ୍ୟ ଆରମ୍ଭ କରିଥାନ୍ତି। ଜମି ଚାଷ କରିବା ପରେ ବିହନ ବୁଣି ବର୍ଷାକୁ ଅପେକ୍ଷା କରିଥାଆନ୍ତି। ଆଷାଢ଼ ମାସରେ ବର୍ଷାଋତୁ ଆରମ୍ଭ ହେଉଥିବାରୁ ଚାଷୀମାନେ ବୁଣିଥିବା ଧାନ ଗଛହୋଇ ବଢିବାରେ ଲାଗେ। କିନ୍ତୁ ଚଳିତବର୍ଷ ପାଣିପାଗର ପରିବର୍ତ୍ତନ ଯୋଗୁ ଆଷାଢ ମାସରେ ବର୍ଷା ନ ହେବାରୁ ବୁଣାଯାଇଥିବା ଧାନଗଛଗୁଡିକ ରୌଦ୍ରତାପରେ ଜଳିବାକୁ ବସିଲାଣି ଏବଂ ବିଲଗୁଡିକ ଫାଟି ଆଁ କଲାଣି। ପୁରୀ ଜିଲା କଣାସ ବ୍ଲକର ପ୍ରତ୍ୟେକ ପଞ୍ଚାୟତରେ ଧାନଜମିଗୁଡିକ ଫାଟିଯିବାକୁ ବସିଥିବାରୁ ଚାଷୀମାନେ ଚିନ୍ତାରେ ବସିଛନ୍ତି। ଧାନଜମିରେ ବର୍ତ୍ତମାନ ମଧ୍ୟ ଗାଈ ଚରୁଥିବା ଦେଖାଯାଉଛି। କ୍ରମାଗତ ଭାବେ ଅତ୍ୟଧିକ ବର୍ଷା, ମରୁଡି, ବାତ୍ୟା ଯୋଗୁ କଣାସ ଅଞ୍ଚଳର ଚାଷୀମାନେ ଦୀର୍ଘ ବର୍ଷ ଧରି ଧାନ ଫସଲ ହରାଇ ଆସୁଥିବାରୁ ଚାଷୀମାନଙ୍କ ଅଣ୍ଟାଭାଙ୍ଗିପଡିଛି। ଚଳିତବର୍ଷ ପୁଣି ଏ ପର୍ଯ୍ୟନ୍ତ ଠିକ୍ ଭାବେ ବର୍ଷା ନ ଥିବାରୁ ଚାଷୀମାନେ ଚାଷ କରି ନ ପାରି ଭାଙ୍ଗି ପଡ଼ିଛନ୍ତି। ବିଭିନ୍ନ ବ୍ୟାଙ୍କରୁ ବାରମ୍ବାର ଋଣକରି ଚାଷୀମାନେ ପରିଶୋଧ କରିପାରୁ ନ ଥିବା ଜଣାପଡିଛି ।
