କୋଲକାତା, ୯ା୮ (ପି.ଟି.)-କରୋନା ଭାଇରସ୍ ଯୋଗୁ ଲକ୍ଡାଉନ୍ ଚାଲିଥିବାରୁ ବିଶ୍ୱର ୫ ନମ୍ବର ମାନ୍ୟତାପ୍ରାପ୍ତ ଜୁନିୟର ଟେବୁଲ ଟେନିସ (ଟିଟି) ଖେଳାଳି ସ୍ବସ୍ତିକା ଘୋଷ ଆର୍ଥିକ ସଙ୍କଟରେ ପଡ଼ିଛନ୍ତି। ମୁମ୍ବାଇରେ ଘର ଭଡ଼ା ଦେଇ ରହିବା ତାଙ୍କ ପରିବାର ପକ୍ଷେ ଆଉ ସମ୍ଭବପର ନୁହେଁ। ତେଣୁ ତାଙ୍କ ପରିବାର କୋଲକାତା ଉପକଣ୍ଠସ୍ଥିତ ତାଙ୍କ ଜନ୍ମସ୍ଥାନ ଅନ୍ଦୁଲକୁ ଫେରିଯିବା ଲାଗି ବିଚାର କରୁଛନ୍ତି। ସ୍ବସ୍ତିକାଙ୍କ ପିତା ସନ୍ଦୀପ ହେଉଛନ୍ତି ତାଙ୍କର କୋଚ୍ ଏବଂ ଟ୍ରେନିଂ ପାର୍ଟନର। ସେ ୪ ମାସରୁ ଊର୍ଦ୍ଧ୍ୱ ସମୟ ଧରି ଚାକିରି ହରାଇଛନ୍ତି। ଫଳରେ ନଭି ମୁମ୍ବାଇରେ ଘରଭଡ଼ା ଦେଇ ରହିବା କଷ୍ଟକର ହୋଇପଡ଼ିଛି। ସନ୍ଦୀପ ନେରୁଲଠାରେ ଥିବା ଏକ ଡିଏଭି ପବ୍ଲିକ ସ୍କୁଲରେ ଜଣେ ଟେବୁଲ ଟେନିସ୍ କୋଚ୍। ଲକ୍ଡାଉନ୍ ପରଠାରୁ ସେ ‘ନୋ ଓ୍ବାର୍କ, ନୋ ପେ’ ନୀତିର ଶିକାର ହୋଇଛନ୍ତି। ସେ ତାଙ୍କ ସଞ୍ଚତ୍ତ ପ୍ରୋଭିଡେଣ୍ଟ ଫଣ୍ଡ୍କୁ ଟଙ୍କା ଆଣି ଖର୍ଚ୍ଚ କରିବାକୁ ବାଧ୍ୟ ହେଉଛନ୍ତି। ସ୍ବସ୍ତିକା ଦୈନିକ ୬ଘଣ୍ଟା ଟ୍ରେନିଂ ନେଇଥାନ୍ତି। ଖାଦ୍ୟପେୟ ବାବଦରେ ତାଙ୍କୁ ୧୨୦୦ ଟଙ୍କା ଖର୍ଚ୍ଚ କରିବାକୁ ହୋଇଥାଏ। ମାତ୍ର ବର୍ତ୍ତମାନ ସେ ସବୁ ବନ୍ଦ ହୋଇଯାଇଛି। ଲକ୍ଡାଉନ୍ ଯଦି ଜାରି ରୁହେ ତେବେ ସେ ବେଙ୍ଗଲ ଫେରିଯାଇପାରନ୍ତି। ସନ୍ଦୀପ ହେଉଛନ୍ତି ଜଣେ ଲେଭଲ-୨ କୋଚ୍ ୧୯୯୨ରୁ ସେ ମୁମ୍ବାଇରେ ଅଛନ୍ତି।
