ସାଣ୍ଟିଆଗୋ, ୨।୧୨: ଏଠାରେ ଚାଲିଥିବା ଜୁନିୟର ମହିଳା ହକି ବିଶ୍ୱକପ୍ରେ ଭାରତ ଏହାର ଦ୍ୱିତୀୟ ମ୍ୟାଚରେ ଲଢ଼ୁଆ ପ୍ରଦର୍ଶନ ସତ୍ତ୍ୱେ ଜର୍ମାନୀଠାରୁ ୩-୪ ଗୋଲରେ ହାରିଯାଇଛି। ପ୍ରଥମ ମ୍ୟାଚରେ କାନାଡା ବିପକ୍ଷରେ ୧୨-୦ ଗୋଲରେ ବିଜୟୀ ହୋଇଥିବା ଭାରତୀୟ ଦଳ ଦ୍ୱିତୀୟ ମ୍ୟାଚରେ ଜର୍ମାନୀକୁ କଡ଼ା ଟକ୍କର ଦେଇଥିଲା। ମାତ୍ର ଶେଷ ଭାଗରେ ଜର୍ମାନୀ ରକ୍ଷଣାତ୍ମକ ଖେଳି ଭାରତକୁ ବରାବର ସ୍ଥିତିକୁ ଆସିବାରେ ରୋକିଥିଲା। ପ୍ରଥମ କ୍ୱାର୍ଟରରେ ଭାରତ ପ୍ରଭାବୀ ପ୍ରଦର୍ଶନ କରିଥିଲା। କ୍ରମାଗତ ୨ଟି ପେନାଲ୍ଟି କର୍ନର ମିଳିଥିବାବେଳେ ମ୍ୟାଚର ୧୧ତମ ମିନିଟରେ ଅନୁ ଦ୍ୱିତୀୟଟିକୁ ଗୋଲରେ ପରିଣତ କରି ଭାରତକୁ ଅଗ୍ରଣୀ କରିଥିଲେ। ୧୪ତମ ମିନିଟରେ ରୋପ୍ନି କୁମାରୀ ପେନାଲ୍ଟି କର୍ନରରୁ ଆଉ ଏକ ଗୋଲ ସ୍କୋର କରି ଅଗ୍ରଣୀ ବ୍ୟବଧାନକୁ ୨-୦ରେ ପହଞ୍ଚାଇଥିଲେ। ଦ୍ୱିତୀୟ କ୍ୱାର୍ଟରରେ ଅର୍ଥାତ୍ ୧୭ତମ ମିନିଟରେ ସୋଫିଆ ସ୍କ୍ବାବେ ଗୋଟିଏ ଗୋଲ ପରିଶୋଧ କରିବାରୁ ଜର୍ମାନୀ ପ୍ରତ୍ୟାବର୍ତ୍ତନ କରିଥିଲା। ଲୌରା ପ୍ଲୁଥ୍ ୨୧ତମ ମିନିଟରେ ଗୋଲ ଦେଇ ମ୍ୟାଚକୁ ୨-୨ ସ୍ଥିତିକୁ ନେଇ ଆସିଥିଲେ। ୨ଟି ଯାକ ଫିଲ୍ଡଗୋଲ ଥିଲା। ତେବେ ମୁମ୍ତାଜ ଖାଁ ୨୪ତମ ମିନିଟରେ ଫିଲ୍ଡ ଗୋଲ ଦେବାରୁ ପ୍ରଥମାର୍ଦ୍ଧ ଶେଷସୁଦ୍ଧା ଭାରତର ଅଗ୍ରଣୀ ବ୍ୟବଧାନ ୩-୨ରେ ପହଞ୍ଚତ୍ ଯାଇଥିଲା। ତୃତୀୟ କ୍ୱାର୍ଟରରେ ଆକ୍ରମଣକୁ ଜୋରଦାର କରି ସଫଳ ହୋଇଥିଲା ଜର୍ମାନୀ। ୩୬ତମ ମିନିଟରେ ଲୌରା ବ୍ୟକ୍ତିଗତ ଦ୍ୱିତୀୟ ଏବଂ ଦଳ ପକ୍ଷରୁ ୩ୟ ଗୋଲଟି ଦେବାରୁ ମ୍ୟାଚ ୩-୩ ସ୍ଥିତିକୁ ଚାଲି ଆସିଥିଲା। ଏହାର ୨ ମିନିଟ ପରେ ଅର୍ଥାତ୍ ୩୮ତମ ମିନିଟରେ କାରୋଲିନ ସେଇଡେଲ ପେନାଲ୍ଟି କର୍ନରର ସଦୁପଯୋଗ କରି ଦେଇଥିବା ଗୋଲଟି ଶେଷରେ ନିର୍ଣ୍ଣାୟକ ହୋଇଥିଲା। ପରବର୍ତ୍ତୀ ୨୨ ମିନିଟରେ ବିଶେଷକରି ୪ର୍ଥ କ୍ୱାର୍ଟରରେ ଭାରତ ବହୁବାର ଉଦ୍ୟମ କରିଥିଲେ ମଧ୍ୟ ଗୋଲ ପରିଶୋଧ କରିବାରେ ଅସମର୍ଥ ରହିଥିଲା। ଭାରତୀୟ ଦଳର ଗୋଲକିପର ମାଧୁରୀ କିଣ୍ଡୋ ଚମତ୍କାର ପ୍ରଦର୍ଶନ କରି ଜର୍ମାନୀର ଏକାଧିକ ଉଦ୍ୟମକୁ ପଣ୍ଡ କରିଥିଲେ। ଭାରତ ଏହାର ପରବର୍ତ୍ତୀ ମ୍ୟାଚ ବେଲଜିୟମ ବିପକ୍ଷରେ ଖେଳିବ। ଶନିବାର ସନ୍ଧ୍ୟା ୬ଟା ୩୦ରେ ଏହି ମ୍ୟାଚ ଆରମ୍ଭ ହେବ।