ଓ୍ବାଶିଂଟନ୍: ସମୟକ୍ରମେ ଗ୍ରହ ଓ ଉପଗ୍ରହମାନଙ୍କ ଚଳନ ହୋଇଥାଏ। ମାଇଲ, ମାଇଲ ଦୂରରେ ଥିବା ଗ୍ରହ ଅନେକ ସମୟରେ ପୃଥିବୀ କିମ୍ବା ଅନ୍ୟ ଗ୍ରହମାନଙ୍କ ନିକଟତର ହୋଇଥାନ୍ତି, ଯାହାକୁ ସୌରମଣ୍ଡଳରେ ଗ୍ରହମାନଙ୍କ ଐତିହାସିକ ମୁହୂର୍ତ୍ତ ବୋଲି କୁହାଯାଇପାରିବ। ପୃଥିବୀଠାରୁ ୬୦୦ ମିଲିୟନ୍ ମାଇଲ୍ ଦୂରରେ ଥିବା ବୃହସ୍ପତି ଆସନ୍ତା ୨୬ ତାରିଖରେ ପୃଥିବୀର ନିକଟତର ହେବାକୁ ଯାଉଛି। ଅର୍ଥାତ୍ ସୌରମଣ୍ଡଳର ସବୁଠାରୁ ବଡ଼ ଗ୍ରହ ପୃଥିବୀଠାରୁ ୩୬୭ ମିଲିୟନ୍ ମାଇଲ୍ ଦୂରରେ ଅବସ୍ଥାପିତ ହେବାକୁ ଯାଉଛି। ତେବେ ୫୯ ବର୍ଷ ପରେ ବୃହସ୍ପତି ପୃଥିବୀର ନିକଟତର ହେବାକୁ ଯାଉଛି। ୨୬ ତାରିଖ ରାତିତମାମ୍ ବୃହସ୍ପତିକୁ ସ୍ପଷ୍ଟଭାବେ ପୃଥିବୀବାସୀ ଦେଖିପାରିବେ ବୋଲି ନାସା ପକ୍ଷରୁ କୁହାଯାଇଛି। ସୂର୍ଯ୍ୟ ପଶ୍ଚିମ ଦିଗରେ ଅସ୍ତ ହେବା ପରେ ବୃହସ୍ପତି ପୂର୍ବ ଦିଗରେ ଦୃଶ୍ୟମାନ ହେବ। ସୋମବାର ବୃହସ୍ପତି, ସୂର୍ଯ୍ୟ ମଧ୍ୟରେ ପୃଥିବୀ ରହିବ। ପ୍ରତି ୧୩ ମାସରେ ଥରେ ବୃହସ୍ପତି ପୃଥିବୀର ନିକଟତର ହୋଇଥାଏ। ସେ ସମୟରେ ବୃହସ୍ପତି ଅତି କ୍ଷୁଦ୍ର ଆକାରରେ ଦେଖାଯାଉଥିଲେ ହେଁ ୨୬ ତାରିଖରେ ବୃହସ୍ପତି ସ୍ପଷ୍ଟ ଭାବେ ଦେଖାଯିବ। ଏକ ଭଲ ବାଇନାକୁଲାରରେ ବୃହସ୍ପତିକୁ ଦେଖିବା ସମ୍ଭବପର ହେବ ବୋଲି ବିଶେଷଜ୍ଞ କହିଛନ୍ତି। ଉଚ୍ଚ ସ୍ଥାନରେ ରହି ମଧ୍ୟ ଏହି ମହାଜାଗତିକ ଦୃଶ୍ୟକୁ ଉପଭୋଗ କରାଯାଇପାରିବ ।