ବ୍ରହ୍ମପୁର (ସ୍ମୃତି ରଞ୍ଜନ ମହାଲିକ)/ ଗୋପାଳପୁର (ନବୀନରାଜ ଆଚାରୀ) ୨୬ା୮: ୫-ଟି ସଚିବ ଭି. କେ. ପାଣ୍ଡିଆନ ୩ ଦିନିଆ ଗଞ୍ଜାମ ଜିଲା ଗସ୍ତରେ ଆସିଥିବା ବେଳେ ଶୁକ୍ରବାର ପ୍ରଥମ ଦିନରେ ସେ ବେଗୁନିଆପଡ଼ା ବ୍ଲକ ବୁରୁଝୁରୀ, ବ୍ରହ୍ମପୁର ମହାନଗରର ବିବେକ ବିହାର, ରଙ୍ଗେଇଲୁଣ୍ଡା ବ୍ଲକ କନିଷି ବାଲାଜୀ ବିଦ୍ୟାପୀଠ ଆୟୋଜିତ ସମାବେଶରେ ଯୋଗ ଦେଇଛନ୍ତି। ଏହାପରେ ୫-ଟି ସଚିବ ପୁରୁଷୋତ୍ତମପୁର ଆସି ମା’ ତାରାତାରିଣୀଙ୍କ ଦର୍ଶନ କରି ସେଠାରେ ମିଶନ ଶକ୍ତି ମହିଳାମାନଙ୍କ ସମସ୍ୟା ବୁଝିଛନ୍ତି। ପରେ ଗସ୍ତ କାର୍ଯ୍ୟକ୍ରମ ସୂଚୀ ସାମାନ୍ୟ ପରିବର୍ତ୍ତନ କରି ଅପରାହ୍ନରେ ଗଜପତି ଜିଲା ଗସ୍ତ କରିଛନ୍ତି।
ଆମ୍ବପୁଆ ବିବେକ ବିହାରଠାରେ ଆୟୋଜିତ ସଭା ସ୍ଥଳରେ ୫-ଟି ସଚିବ ବିଭିନ୍ନ ମହାବିଦ୍ୟାଳୟର ଛାତ୍ରୀଛାତ୍ରଙ୍କ ସହ ସେମାନଙ୍କ ସମସ୍ୟା ଆଲୋଚନା କରିଥିଲେ। କଲେଜଗୁଡିକୁ ୫-ଟିରେ ରୂପାନ୍ତରଣ କରାଯିବ। ଏଥିପାଇଁ ପ୍ରଥମ ପର୍ଯ୍ୟାୟରେ ୯୨ କୋଟି ଟଙ୍କା ଖର୍ଚ୍ଚ କରାଯିବ। ୬ ମାସ ମଧ୍ୟରେ ଏହି କାର୍ଯ୍ୟ ସରିବ ବୋଲି ସେ କହିଥିଲେ। କନିଷି ବାଲାଜୀ ବିଦ୍ୟାପୀଠ ଖେଳ ପଡିଆଠାରେ ଆୟୋଜିତ ସମାବେଶରେ ସ୍ବୟଂ ସହାୟକ ଗୋଷ୍ଠୀ ମହିଳାମାନେ ସଚିବଙ୍କୁ ସ୍ବାଗତ ସମ୍ବର୍ଦ୍ଧନା ଜଣାଇଥିଲେ। ସଚିବ ମଧ୍ୟ ସେମାନଙ୍କୁ କୃତଜ୍ଞତା ଜଣାଇଥିଲେ। ସାଧାରଣ ଲୋକଙ୍କ ସୁବିଧା ଅସୁବିଧା ବୁଝିବା ପାଇଁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ କହିଛନ୍ତି ବୋଲି ୫-ଟି ସଚିବ ସେଠାରେ କହିଥିଲେ। ମନ୍ଦିର, ମସଜିଦ, ଚର୍ଚ୍ଚ ଓ କମ୍ୟୁନିଟି ସେଣ୍ଟରର ଉନ୍ନତୀକରଣ ପାଇଁ ଯେଉଁମାନେ ଦରଖାସ୍ତ ଦେଇଛନ୍ତି, ୭ ଦିନରେ ଅର୍ଥାତ ସେପ୍ଟମ୍ବର ୪ରେ ଅର୍ଥ ମଞ୍ଜୁର ହେବ। ଧର୍ମାନୁଷ୍ଠାନଗୁଡିକର ଉନ୍ନତି ହେଲେ ରାଜ୍ୟର ଉନ୍ନତି ହେବ ବୋଲି ସଚିବ କହିଥିଲେ। ମିଶନ ଶକ୍ତି ମହିଳାଙ୍କୁ ବିନା ସୁଧରେ ୫ ଲକ୍ଷ ଟଙ୍କା ଋଣ ପ୍ରଦାନ କରାଯାଉଛି। ଏଥିସହ ୱାର୍ଡ, ସାହି ଓ ଗ୍ରାମରେ ବ୍ୟବହୃତ ହେଉ ନ ଥିବା ବିଦ୍ୟାଳୟ ଏବଂ ଦୋକାନ ଗୃହ ମିଶନ ଶକ୍ତି ମହିଳାଙ୍କୁ ପ୍ରଦାନ କରିବା ପାଇଁ ମୁଖ୍ୟମନ୍ତ୍ରୀ ନିର୍ଦ୍ଦେଶ ଦେଇଛନ୍ତି। ଏସଏଚଜି ସଭ୍ୟାମାନେ ପିଇବା ପାଣି ସମସ୍ୟା ସମାଧାନ ପାଇଁ ଦରଖାସ୍ତ ଦେଇଥିଲେ। ଶନିବାର ପୂର୍ବାହ୍ନ ସୁଦ୍ଧା ଏହା ସମାଧାନ ହେବ ବୋଲି ସଚିବ ପ୍ରତିଶ୍ରୁତି ଦେଇଥିଲେ। ଜିଲାରେ ବିଜୁ ସ୍ବାସ୍ଥ୍ୟ କଲ୍ୟାଣ ଯୋଜନାରେ ୨ବର୍ଷ ମଧ୍ୟରେ ୭୦ ହଜାର ଲୋକ ଉପକୃତ ହୋଇଛନ୍ତି। ଜିଲାବାସୀଙ୍କ ନିମନ୍ତେ ୨୫୦ କୋଟି ଟଙ୍କା ମୁଖ୍ୟମନ୍ତ୍ରୀ ଖର୍ଚ୍ଚ କରିଛନ୍ତି। ଗରିବ ଛାତ୍ରୀଛାତ୍ରମାନେ ଉତ୍ତମ ବାତାବରଣ ମାଧ୍ୟମରେ ପାଠ ପଢା ନିମନ୍ତେ ମୁଖ୍ୟମନ୍ତ୍ରୀ ସ୍ମାର୍ଟ ଶ୍ରେଣୀ ଗୃହ, ଇ ଲାଇବ୍ରେରୀ ସମେତ ଅନ୍ୟାନ୍ୟ ସୁବିଧା କରିଛନ୍ତି। ବର୍ତ୍ତମାନ ଜିଲାରେ ୧୫୭ଟି ଯୁକ୍ତ୨ ଓ ଯୁକ୍ତ୩ ମହାବିଦ୍ୟାଳୟକୁ ୫-ଟିରେ ସାମିଲ କରାଯାଇଛି ବୋଲି ୫-ଟି ସଚିବ କହିଥିଲେ। ସମାବେଶରେ ମୁଖ୍ୟମନ୍ତ୍ରୀଙ୍କ ସ୍ବତନ୍ତ୍ର ସଚିବ ଆର. ଭିନିଲ କ୍ରିଷ୍ଣା, ଦକ୍ଷିଣାଞ୍ଚଳ ଆଇଜି ସତ୍ୟବ୍ରତ ଭୋଇ, ଗଞ୍ଜାମ ଜିଲାପାଳ ଦିବ୍ୟଜ୍ୟୋତି ପରିଡା, ବ୍ରହ୍ମପୁର ଉପଜିଲାପାଳ ଆଶୁତୋଷ କୁଲକର୍ଣ୍ଣି, ବ୍ରହ୍ମପୁର ଏସ୍ପି ଡା ଶ୍ରର୍ବଣା ବିବେକ ଏମ. ଓ ବିଭିନ୍ନ ବିଭାଗର ବରିଷ୍ଠ ଅଧିକାରୀମାନେ ଉପସ୍ଥିତ ଥିଲେ।