ନୂଆଦିଲ୍ଲୀ,୧୬ା୭: ସୁପ୍ରିମକୋର୍ଟରେ ପୂର୍ବାହ୍ନ ୧୦ଟା ୩୦ ମିନିଟରେ ମାମଲାଗୁଡ଼ିକର ଶୁଣାଣି ପ୍ରକ୍ରିୟା ଆରମ୍ଭ ହୋଇଥାଏ। କିନ୍ତୁ ଶୁକ୍ରବାର ଏଥିରେ ବ୍ୟତିକ୍ରମ ଦେଖିବାକୁ ମିଳିଛି। ଆସନ୍ତା ଅଗଷ୍ଟରେ ଭାରତର ପରବର୍ତ୍ତୀ ପ୍ରଧାନ ବିଚାରପତି (ସିଜେଆଇ) ହେବାକୁ ଯାଉଥିବା ଜଷ୍ଟିସ୍ ୟୁ.ୟୁ. ଲଳିତ ପୂର୍ବାହ୍ନ ୯ଟା ୩୦ରେ ଏକ ମାମଲାର ଶୁଣାଣି କରି ବିରଳ ଦୃଷ୍ଠାନ୍ତ ସୃଷ୍ଟି କରିଛନ୍ତି। ଜଷ୍ଟିସ୍ ଲଳିତଙ୍କ ଅଧ୍ୟକ୍ଷତା ତଥା ଜଷ୍ଟିସ୍ ଏସ୍. ରବୀନ୍ଦ୍ର ଭଟ୍ଟ ଏବଂ ସୁଧାଂଶୁ ଢୁଲିଆଙ୍କୁ ନେଇ ଗଠିତ ତିନିଜଣିଆ ଖଣ୍ଡପୀଠ କୋର୍ଟ ନମ୍ବର ୨ରେ ନିର୍ଦ୍ଧାରିତ ସମୟର ଘଣ୍ଟାଏ ପୂର୍ବରୁ ଶୁଣାଣି କରିଥିବାବେଳେ ପୂର୍ବତନ ଆଟର୍ନି ଜେନେରାଲ ମୁକୁଲ ରହତୋଗି ଖୁସି ବ୍ୟକ୍ତ କରିଥିଲେ। ଏନେଇ ଜଷ୍ଟିସ୍ ଲଳିତ କହିଥିଲେ, ଯଦି ସ୍କୁଲ ପିଲାମାନେ ସକାଳ ୭ଟାରେ ପାଠ ପଢ଼ିବାକୁ ଯାଇପାରୁଛନ୍ତି ତେବେ ବିଚାରପତି ଓ ଆଇନଜୀବୀମାନେ ସେମାନଙ୍କ କାମ ୯ଟାରେ କାହିଁକି ଆରମ୍ଭ କରିପାରିବେ ନାହିଁ। ସୁପ୍ରିମକୋର୍ଟ ୯ଟାରେ ଆରମ୍ଭ ହୋଇ ପୂର୍ବାହ୍ନ ୧୧ଟା ୩୦ ପର୍ଯ୍ୟନ୍ତ ଚାଲିବା ପରେ ବିରତି ନେଇ ଅପରାହ୍ନରେ ପୁଣି ଚାଲିପାରିବ। ଏପରି କଲେ ଆଇନଜୀବୀମାନେ ସନ୍ଧ୍ୟାରେ ଅଧିକ କାମ କରିପାରିବେ ବୋଲି ଜଷ୍ଟିସ୍ ଲଳିତ ପ୍ରସ୍ତାବ ଦେଇଛନ୍ତି। ପ୍ରକାଶ ଯେ, ବର୍ତ୍ତମାନର ସିଜେଆଇ ଏନ୍.ଭି. ରମନା ଆସନ୍ତା ଅଗଷ୍ଟ ୨୭ରେ ଅବସର ନେବେ। ତାଙ୍କ ସ୍ଥାନରେ ଜଷ୍ଟିସ୍ ଲଳିତ ସିଜେଆଇ ହେବାର ଯଥେଷ୍ଟ ସମ୍ଭାବନା ରହିଛି। ତେବେ ସିଜେଆଇ ରୂପେ ସେ ନଭେମ୍ବର ୮ ପର୍ଯ୍ୟନ୍ତ ଦାୟିତ୍ୱ ତୁଲାଇପାରିବେ।