ସିଡ୍ନୀ, ୭ା୧୨ (ପି.ଟି.)-ରବିବାର ଖେଳାଯାଇଥିବା ଦ୍ୱିତୀୟ ଅନ୍ତର୍ଜାତୀୟ ଟି୨୦ ମ୍ୟାଚରେ ଭାରତୀୟ ଅଲରାଉଣ୍ଡର ହାର୍ଦ୍ଦିକ ପାଣ୍ଡ୍ୟାଙ୍କ ମ୍ୟାଚ ବିଜୟୀ ଇନିଂସ ଦର୍ଶନୀୟ ଥିଲା ବୋଲି କହିଛନ୍ତି ଅଷ୍ଟ୍ରେଲିଆ କୋଚ୍ ଜଷ୍ଟିନ ଲାଙ୍ଗର। ପୂର୍ବତନ ଅଧିନାୟକ ମହେନ୍ଦ୍ର ସିଂ ଧୋନୀଙ୍କ ଭଳି ପାଣ୍ଡ୍ୟା ମ୍ୟାଚରେ ଫିନିଶର ଭୂମିକା ନିର୍ବାହ କରିଥିଲେ। ଘରୋଇ ଅଷ୍ଟ୍ରେଲିଆ ବିପକ୍ଷରେ ଭାରତର ବିଜୟ ଲକ୍ଷ୍ୟ ପିଛା କରୁଥିବା ବେଳେ ସେ ୨୨ବଲ୍ରେ ଦ୍ରୁତ ୪୨ରନ କରି ଅପରାଜିତ ରହିଥିଲେ। ଯାହାଫଳରେ ଭାରତ ୬ ଉଇକେଟରେ ଜିତି ୩ମ୍ୟାଚବିଶିଷ୍ଟ ସିରିଜ୍ରେ ୨-୦ରେ ଅଗ୍ରଣୀ ସହ ଆଗୁଆ ସିରିଜ ଜିତି ନେଇଥିଲା। ପାଣ୍ଡ୍ୟା ଜଣେ ବିପଜ୍ଜନକ ଖେଳାଳି। ରବିବାର ସେ ଯେପରି ଖେଳିଲେ ଅତୀତରେ ଏମ୍.ଏସ୍. ଧୋନୀଙ୍କଠାରୁ ତାହା ଦେଖିବାକୁ ମିଳୁଥିଲା ବୋଲି ମ୍ୟାଚ୍ ପରେ ଏକ ଭର୍ଚୁଆଲ ଖବରଦାତା ସମ୍ମିଳନୀରେ ଲାଙ୍ଗର ପ୍ରକାଶ କରିଥିଲେ। ଭାରତ ଏକ ଶକ୍ତିଶାଳୀ ଦଳ ବୋଲି ଲାଙ୍ଗର ସ୍ବୀକାର କରିବା ସହ ଏହି ଦଳରେ ବହୁ ଅଭିଜ୍ଞ ଖେଳାଳି ରହିଥିବା କହିଥିଲେ। ଅନ୍ୟପକ୍ଷରେ ପାଣ୍ଡ୍ୟା କହିଛନ୍ତି, ମ୍ୟାଚ ଫିନିଶର କୌଶଳ ହାସଲ ଦିଗରେ ସେ କରୋନା ଭାଇରସ୍ ପାଇଁ ହୋଇଥିବା ଲକ୍ଡାଉନ୍ ବେଳେ କଠିନ ପରିଶ୍ରମ କରିଥିଲେ। ଅପରପକ୍ଷରେ ଭାରତୀୟ ଅଧିନାୟକ ବିରାଟ କୋହଲି କହିଛନ୍ତି, ରୋହିତ ଶର୍ମା ଓ ଯଶ୍ପ୍ରୀତ ବୁମ୍ରାଙ୍କ ଭଳି ପ୍ରତିଷ୍ଠିତ ଖେଳାଳିଙ୍କ ଅନୁପସ୍ଥିତିରେ ଟି୨୦ ସିରିଜ ଜିତିପାରିଥିବାରୁ ସେ ଗୌରବ ଅନୁଭବ କରୁଛନ୍ତି।
