ଝାରସୁଗୁଡ଼ା ଅଫିସ୍, ୧୭।୧୦: ଝାରସୁଗୁଡା ଜିଲା ବ୍ରଜରାଜନଗରର ଦୁର୍ଦ୍ଦାନ୍ତ ଅପରାଧି ସୋନୁ ଘୋଷଙ୍କ ନାବାଳକଙ୍କ ପୁଅ ରବିବାର ପୁଣି ଜଣେ ଯୁବକଙ୍କୁ ଛୁରାମାଡ କରିଛନ୍ତି। ଫଳରେ ଯୁବକ ଜଣଙ୍କ ଆହତ ହୋଇ ପ୍ରଥମେ ମଣ୍ଡଲିଆ ସ୍ଥିତ ଏମ୍ସିଏଲ୍ ହସ୍ପିଟାଲ୍ରେ ଭର୍ତ୍ତି ହୋଇଥିଲେ। ସେଠାରେ ପ୍ରାଥମିକ ଚିକିତ୍ସା ପରେ ଜିଲା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତରିତ ହୋଇଛନ୍ତି। ଆହତ ଯୁବକ ଜଣଙ୍କ ହେଲେ ଲମଟିବାହାଲର ଶଙ୍କର ସାହୁ(୩୪) ବୋଲି ଜଣାପଡିଛି। ଛୁରାମାଡରେ ତାଙ୍କ ବାମ ହାତ ବାହୁରେ ଗଭୀର କ୍ଷତ ସୃଷ୍ଟି ହୋଇଛି । ଏନେଇ ଆହତ ଶଙ୍କରଙ୍କ ସାଥୀ ମନୋଜ ରାୟଙ୍କ ଅଭିଯୋଗକୁ ଭିତିକରି ପୋଲିସ୍ ବ୍ରଜରାଜନଗର ଥାନାରେ ଏକ ମାମଲା (ନଂ. ୩୦୦।୨୧) ରୁଜୁ କରିଛି। ଛୁରାମାଡ କରି ଫେରାର ଥିବା ନାବାଳକଙ୍କୁ ପୋଲିସ୍ ଧରିବା ପାଇଁ ତନାଘନା ଚଳାଇଛି। ଶଙ୍କର ଓ ମନୋଜ ଉଭୟ ବ୍ରଜରାଜନଗର ବଜାରରୁ ରାଶନ ସାମଗ୍ରୀ କିଣି ଏକ ବାଇକ୍ରେ ଷ୍ଟେଶନ ଛକ ଗଳିରେ ଘରକୁ ଫେରୁଥିଲେ। ଏହି ସମୟରେ ନାବାଳକ ଜଣଙ୍କ ତାଙ୍କୁ ଅଟକାଇ ଛୁରାମାଡ କରିଥିଲେ। ସୂଚନା ଥାଉକି ଗତ ଅଗଷ୍ଟ ୪ତାରିଖରେ ଜଣେ ସାଙ୍ଗଙ୍କ ସହିତ ମିଶି ନାବାଳକ ଜଣଙ୍କ ଜଣେ ଯୁବକଙ୍କୁ ଛୁରାମାଡ କରିଥିଲେ। ଏନେଇ ପୋଲିସ୍ ବ୍ରଜରାଜନଗର ଥାନାରେ ଏକ ମାମଲା (ନଂ. ୨୦୯/୨୧) ରୁଜୁ କରିଥିଲା। ପୁଣି ୩ ମାସ ପରେ ନାବାଳକ ଜଣଙ୍କ ଆଉ ଏକ ଘଟଣା ଘଟାଇଛନ୍ତି।