ଭୁବନେଶ୍ୱର,୨୫।୧(ବ୍ୟୁରୋ): କୋମଳ ହୃଦୟରେ ବସା ବାନ୍ଧୁଛି ନିଷ୍ଠୁରତା। ନାବାଳକ ମନରେ ବୃଦ୍ଧି ପାଉଛି ଅପରାଧପ୍ରବଣତା। ଯେଉଁ ହାତରେ ଦେଶ ଗଢ଼ିବାକୁ କଲମ ଧରିବା କଥା, ସେହି ହାତ ଆଜି ଖଣ୍ଡା, ବନ୍ଧୁକ, ଭୁଜାଲି ଧରୁଛି। ଫୁଲମାଳ ବଦଳରେ ହାତକଡ଼ି ପଡୁଛି। ରାଜ୍ୟରେ ଅପରାଧ ବଢ଼ି ଚାଲିଥିବାବେଳେ ନାବାଳକଙ୍କ ସମ୍ପୃକ୍ତି ଚିନ୍ତା ବଢ଼ାଉଛି। ବାଳ ଅପରାଧ ରୋକିବା ପାଇଁ ବହୁ ଆଇନ ଓ ବ୍ୟବସ୍ଥା ରହିଛି। ସରକାରଙ୍କ ପକ୍ଷରୁ ଅନେକ ସଂସ୍କାର ମୂଳକ ପଦକ୍ଷେପ ନିଆଯାଉଛି। ହେଲେ ବ୍ୟବସ୍ଥାର ସ୍ଥାଣୁତା, ପରିବାରରେ ପ୍ରତିକୂଳ ପରିବେଶ, ସାମାଜିକ ପରିସ୍ଥିତି ଆଜି କୋମଳମତୀ ନାବାଳକଙ୍କୁ ଅବାଟକୁ ଟାଣି ନେଉଛି।
କ୍ରାଇମବ୍ରାଞ୍ଚର ତଥ୍ୟ ଅନୁଯାୟୀ, ୨୦୧୭ରେ ରାଜ୍ୟରେ ବାଳ ଅପରାଧ ସଂକ୍ରାନ୍ତ ୧୦୮୯ଟି ମାମଲା ହୋଇଥିବାବେଳେ ୨୦୧୮ରେ ୧୧୫୫ ଓ ୨୦୧୯ରେ ଏହା ବୃଦ୍ଧି ପାଇଁ ୧୨୫୦ରେ ପହଞ୍ଚତ୍ଛି। ଏହି ତିନିବର୍ଷରେ ସମ୍ବଲପୁର ଜିଲାରେ ସର୍ବାଧିକ ୪୦୯ଜଣ ନାବାଳକ ଅପରାଧ ଘଟାଇଥିବାବେଳେ ସୋନପୁର ଜିଲାରେ ସର୍ବନିମ୍ନ ୩୦ ମାମଲା ହୋଇଛି। ତେବେ ୨୦୧୯ରେ ହୋଇଥିବା ୧୨୫୦ ମାମଲାରେ ସମ୍ପୃକ୍ତ ମୋଟ ୧୪୫୦ ଜଣଙ୍କ ମଧ୍ୟରୁ ୨୫ଜଣଙ୍କୁ ବୁଝାଇଶୁଝାଇ ଘରକୁ ଛଡାଯାଇଥିବାବେଳେ ୧୪୨୫ ଜଣଙ୍କୁ ଜୁଭେନାଇଲ୍ ଜଷ୍ଟିସ୍ ବୋର୍ଡକୁ ପଠାଇଯାଇଥିଲା। ସେଠାରୁ ସେମାନଙ୍କୁ ସ୍ବତନ୍ତ୍ର ସୁଧାର ଗୃହକୁ ପଠାଯାଇଥିଲା। ଏମାନଙ୍କ ମଧ୍ୟରୁ ୩ଜଣ ନାବାଳକଙ୍କ ବିରୋଧରେ ହତ୍ୟା ଅଭିଯୋଗ, ୫୩ ଜଣଙ୍କ ବିରୋଧରେ ହତ୍ୟା ଉଦ୍ୟମ, ୧୧ଜଣଙ୍କ ବିରୋଧରେ ଅସଦାଚରଣ, ୨ଜଣଙ୍କ ବିରୋଧରେ ବଳାତ୍କାର, ୯୧୦ଜଣଙ୍କ ବିରୋଧରେ ଚୋରି, ୧୩୬ ଜଣଙ୍କ ବିରୋଧରେ ଲୁଟ୍ ଆଦି ଅଭିଯୋଗ ହୋଇଥିଲା। ସେହିଭଳି ୧୨୦ଜଣଙ୍କ ମା’ବାପା ଆଦୌ ପାଠ ପଢି ନ ଥିବାେବେଳ ୪୧୧ଜଣ ପ୍ରାଇମେରୀ ପର୍ଯ୍ୟନ୍ତ ପାଠ ପଢିଛନ୍ତି। ୮୪୮ ଜଣଙ୍କ ମା’ବାପା ପ୍ରାଇମେରୀରୁ ମାଟ୍ରିକ ଓ ୨୭ଜଣ ଉଚ୍ଚ ମାଧ୍ୟମିକ ମଧ୍ୟରେ ପାଠ ପଢିଛନ୍ତି। କେତେକ ଘଟଣାରେ ସମ୍ପୃକ୍ତ ନାବାଳକଙ୍କ ମା’ବାପାଙ୍କ ଶିକ୍ଷାଗତ ଯୋଗ୍ୟତା ଜଣା ପଡ଼ି ନ ଥିବାବେଳେ ଉଚ୍ଚ ମାଧ୍ୟମିକରୁ ଅଧିକ ପାଠ ପଢିଥିବା ବାପା ମା’ଙ୍କ ପିଲା ଆଦୌ ଅପରାଧ ଘଟାଇ ନାହାନ୍ତି।
ଓଁକାର ମିଶ୍ର