ପଲମ, ୨୦।୧୨(ଡି.ଏନ.ଏ.)- କଳାହାଣ୍ଡି ଜିଲା ନର୍ଲା ବ୍ଲକ ଅଧିନ ସେରଗଡ଼ ପଞ୍ଚାୟତ ଉଫେର ଗ୍ରାମର ନାବାଳକ ଦିନମଣି ଜାନୀ । ବୟସ ୧୧ ବର୍ଷ । ସେ ଜଣେ ଭିନ୍ନକ୍ଷମ । ଜନ୍ମରୁ ମୁକବଧିର । ଭିନ୍ନକ୍ଷମ ହୋଇବି ଆଜି ସରକାରୀ ସହାୟତାରୁ ବଞ୍ଚିତ ହୋଇଛନ୍ତି । ତାଙ୍କର ବାପା ଦ୍ରୋଣ ଜାନୀ ଜଣେ ଗରିବ ଲୋକ । ଭଙ୍ଗା ଘରେ ବାପା, ମା’ଙ୍କ ସହିତ ଦିନମଣି ଦୟନୀୟ ଜୀବନ ବିତାଉଛନ୍ତି । ବର୍ଷେ ପୂର୍ବରୁ ଭବାନୀପାଟଣା ମୁଖ୍ୟ ଚିକିତ୍ସାଳୟକୁ ଭିନ୍ନକ୍ଷମ ପ୍ରମାଣପତ୍ର ଆଣିବା ଲାଗି ଦିନମଣିକୁ ନେଇ ତାଙ୍କର ବାପା ଦ୍ରୋଣ ଜାନୀ ଯାଇଥିଲେ । ହେଲେ ସେଠାରେ ଡାକ୍ତର ପ୍ରମାଣପତ୍ର ଦେବାକୁ ମନା କରିଦେଇଥିଲେ । ଫଳରେ ବାପପୁଅ ନିରାଶ ହୋଇ ଫେରିଆସିଥିଲେ। ନର୍ଲା ବ୍ଲକ ପ୍ରଶାସନ ନିକଟକୁ ମଧ୍ୟ ଯାଇଥିଲେ । ସେମାନେ କହିଲେ ଭିନ୍ନକ୍ଷମ ପ୍ରମାଣପତ୍ର ନ ଥିଲେ କୌଣସି ସରକାରୀ ସହାୟତା ମିଳିବ ନାହିଁ। ପ୍ରମାଣପତ୍ର ନ ଥିବାରୁ ବିଚରା ନାବାଳକ ଜନ୍ମରୁ ଭିନ୍ନକ୍ଷମ ହୋଇ ବି ସରକାରୀ ସୁବିଧାରୁ ବଞ୍ଚିତ ହୋଇଛନ୍ତି । ଭିନ୍ନକ୍ଷମ ଭତ୍ତା ନାହିଁ କି ଅନ୍ୟାନ୍ୟ କିଛି ସୁବିଧା ପାଉନାହାନ୍ତି । ତାଙ୍କ ବାପା ଗରିବ ହୋଇଥିବାରୁ ପରିବାର ଚଳାଇବା କଷ୍ଟକର ହୋଇପଡ଼ିଛି । ତେଣୁ ତାଙ୍କ ଭିନ୍ନକ୍ଷମ ପୁଅ ପ୍ରତି ପ୍ରଶାସନ ସହାୟତାର ହାତ ବଢାଇକୁ ତାଙ୍କ ପିତା ଓ ଗ୍ରାମବାସୀ ନିବେଦନ କରିଛନ୍ତି।