ଭୁବନେଶ୍ୱର,୧୧।୧୧ବ୍ୟୁରୋ): ଚନ୍ଦ୍ରଶେଖରପୁର ଥାନା ଅଞ୍ଚଳରେ ଜଣେ ନାବାଳକଙ୍କ ହତ୍ୟା ଘଟଣାକୁ ୫ ମାସରୁ ଅଧିକ ଦିନ ବିତିଲାଣି, ହେଲେ ଏଯାଏ ପୋଲିସ ଚୁପ୍ ବସିଛି। ମୃତକଙ୍କ ପରିବାର ସଦସ୍ୟ ବାରମ୍ବାର ନ୍ୟାୟ ଆଶାରେ ଥାନାକୁ ଦୌଡ଼ି ହତାଶ ହୋଇଛନ୍ତି। ପୋଲିସ ସହଯୋଗ ବଦଳରେ ନାନା ହଇରାଣ କରିବାରୁ ଶେଷରେ ପୂରା ପରିବାର ପିଲାଛୁଆ ଧରି ଗୁରୁବାର ଥାନାରେ ଧାରଣା ଦେଇଥିଲେ। ପୁଅ ମୃତ୍ୟୁରେ ଭାଙ୍ଗି ପଡିଥିବା ବାପା ଥାନାରେ ଶୋଇ ରହି ପ୍ରତିବାଦ କରିଥିବାବେଳେ ମା’ ଛୋଟ ପିଲାଙ୍କୁ ଧରି ଥାନା ସମ୍ମୁଖ ରାସ୍ତାରେ ଧାଡ଼ି ହୋଇ ଦୀର୍ଘ ସମୟ ଧରି ବସି ରହିଥିଲେ। ଏହି ଘଟଣା ଚନ୍ଦ୍ରଶେଖରପୁର ଥାନା ପୋଲିସର କାର୍ଯ୍ୟଧାରାକୁ ନେଇ ପ୍ରଶ୍ନବାଚୀ ସୃଷ୍ଟି କରିଥିବାବେଳେ ବହୁ ବୁଝାଶୁଝା ପରେ ସେମାନେ ଧାରଣାରୁ ଉଠିଥିଲେ।
ସୂଚନାନୁଯାୟୀ, ଗତ ୫ମାସ ତଳେ ନୀଳାଦ୍ରିବିହାର ପଣ୍ଡାପାର୍କ ବସ୍ତିରେ ଦୈତରାଜ ନାୟକ (୧୭) ନାମକ ଜଣେ ନାବାଳକ ହଠାତ କେଉଁଆଡେ ନିଖୋଜ ହୋଇଯାଇଥିଲେ। ଏନେଇ ପରିବାର ପକ୍ଷରୁ ଥାନାରେ ଅଭିଯୋଗ କରାଯାଇଥିଲା। ଏହାର ୩ଦିନ ପରେ ଭରତୁପର ଜଙ୍ଗଲ ପାର୍ଶ୍ୱ ଟ୍ରେଞ୍ଚ୍ ମଧ୍ୟରୁ ଉଲଗ୍ନ ଅବସ୍ଥାରେ ଦୈତରାଜଙ୍କ ଗଳିତ ମୃତଦେହ ଜବତ କରିଥିଲା ପୋଲିସ। ପୁଅକୁ ହତ୍ୟା କରାଯାଇଥିବା ନେଇ ପରିବାର ଲୋକେ ଥାନାରେ ଅଭିଯୋଗ କରିବା ସହ ଏଥିରେ ୨ଜଣଙ୍କର ସମ୍ପୃକ୍ତି ଥିବା ନେଇ ପୋଲିସକୁ କହିଥିଲେ। ଏନେଇ ପୋଲିସ ଏକ ହତ୍ୟା ମାମଲା ରୁଜୁ କରି ତଦନ୍ତ ଆରମ୍ଭ କରିଥିଲା। ଏହାସହ ଉକ୍ତ ୨ଜଣଙ୍କୁ ଥାନାକୁ ଡାକି ପଚରାଉଚରା କରି କୌଣସି ପ୍ରମାଣ ନ ମିଳିବାରୁ ଛାଡି ଦେଇଥିଲା। ଏହାକୁ ନେଇ ମୃତକଙ୍କ ପରିବାର ଲୋକେ ପୋଲିସର ତଦନ୍ତକୁ ନେଇ ସନ୍ଦେହ କରିବା ସହ ଅସନ୍ତୋଷ ପ୍ରକାଶ କରିଛନ୍ତି। ଇତିମଧ୍ୟରେ ଏହି ଘଟଣା ପରଠାରୁ ମୃତକଙ୍କ ପରିବାର ଓ ଉକ୍ତ ୨ ବ୍ୟକ୍ତିଙ୍କ ପରିବାର ମଧ୍ୟରେ ଅନେକଥର ଗଣ୍ଡଗୋଳ ହେଲାଣି। ଏପରିକି ଗଣ୍ଡଗୋଳ ଘଟଣାରେ ପୋଲିସ ଉଭୟ ପକ୍ଷରୁ ଗିରଫ କରିଥିଲେ ମଧ୍ୟ ହତ୍ୟା ମାମଲାରେ ଚୁପ୍ ବସିଛି। ହତ୍ୟାର କାରଣ ଓ ଅଭିଯୁକ୍ତଙ୍କ ସମ୍ପର୍କରେ କିଛି ବି ସୂଚନା ଦେଇପାରୁନି ପୋଲିସ। ପୋଲିସ ଜାଣିଶୁଣି ଅଭିଯୁକ୍ତଙ୍କୁ ଛାଡି ଦେଇଥିବା ମୃତକଙ୍କ ପରିବାର ଲୋକେ ଅଭିଯୋଗ ଆଣି ପ୍ରତିବାଦରେ ଏଭଳି ଅଭିନବ ଧାରଣା ଦେଇଥିଲେ।