କାଇରୋ, ୧୫।୧୦- ଭାରତର ଆଗଧାଡ଼ିର ସ୍କ୍ବାଶ୍ ତାରକା ଜ୍ୟୋତ୍ସ୍ନା ଚିନ୍ନାପ୍ପା ଇଜିପ୍ଟିଆନ ଓପନ ସ୍କ୍ବାଶ୍ ଚାମ୍ପିୟନଶିପ୍ର କ୍ୱାର୍ଟର ଫାଇନାଲରେ ପ୍ରବେଶ କରିଛନ୍ତି। ଗତ ୬ ମାସ ମଧ୍ୟରେ ପ୍ରଥମ ଟୁର୍ନାମେଣ୍ଟ ଖେଳୁଥିବା ଜ୍ୟୋତ୍ସ୍ନା ସ୍ଥାନୀୟ ଖେଳାଳି ଫରିଦା ମହମ୍ମଦଙ୍କଠାରୁ କଡ଼ା ଚ୍ୟାଲେଞ୍ଜର ସମ୍ମୁଖୀନ ହୋଇଥିଲେ। ଶେଷରେ ବିଶ୍ୱର ୧୧ ନମ୍ବର ଏହି ଭାରତୀୟ ଖେଳାଳି ୩୮ତମ ର଼୍ୟାଙ୍କପ୍ରାପ୍ତ ଫରିଦାଙ୍କୁ ୧୧-୭, ୧୧-୬, ୭-୧୧, ୧୦-୧୨, ୧୧-୯ ପଏଣ୍ଟରେ ହରାଇବାକୁ ସକ୍ଷମ ହୋଇଥିଲେ। କ୍ୱାର୍ଟର ଫାଇନାଲରେ ସେ ବିଶ୍ୱର ୨ ନମ୍ବର ଖେଳାଳି ନୁର୍ ଇ ଶେର୍ବିନିଙ୍କୁ ଭେଟିବେ। ଜ୍ୟୋତ୍ସ୍ନା ପ୍ରଥମ ୨ ରାଉଣ୍ଡ ଜିତିଥିଲେ ହେଁ ଫରିଦା ସଫଳ ପ୍ରତ୍ୟାବର୍ତ୍ତନ କରି ପରବର୍ତ୍ତୀ ୨ ରାଉଣ୍ଡରେ ବିଜୟୀ ହୋଇଥିଲେ। ଫଳରେ ୫ମ ତଥା ନିର୍ଣ୍ଣାୟକ ରାଉଣ୍ଡ ଉପରେ ସମସ୍ତଙ୍କ ନଜର ରହିଥିଲା। ଏଥିରେ ଅଭିଜ୍ଞତାର ଉପଯୋଗ କରି ବାଜି ମାରିଥିଲେ ଏହି ଭାରତୀୟ ମହିଳା ଖେଳାଳି। ଅନ୍ୟପକ୍ଷରେ ଭାରତର ସବର୍ବୋଚ୍ଚ ର଼୍ୟାଙ୍କ୍ପ୍ରାପ୍ତ ପୁରୁଷ ଖେଳାଳି ସୌରଭ ଘୋଷାଲ କିନ୍ତୁ ତୃତୀୟ ରାଉଣ୍ଡରେ ହାରି ବିଦାୟ ନେଇଛନ୍ତି। ସେ ଇଜିପ୍ଟର ମେଜାନ ହାସହେମ୍ଙ୍କଠାରୁ ୮-୧୧, ୯-୧୧, ୮-୧୧ ପଏଣ୍ଟରେ ହାରି ଯାଇଛନ୍ତି। ଗତ ମାର୍ଚ୍ଚରେ କରୋନା ସଂକ୍ରମଣ ପରେ ଘୋଷାଲଙ୍କ ପାଇଁ ମଧ୍ୟ ଏହା ପ୍ରଥମ ମ୍ୟାଚ ଥିଲା।