ନୂଆଦିଲ୍ଲୀ,୮।୪: ବିଆରଏସ୍ ନେତା କେ, କବିତାଙ୍କୁ ସୋମବାର ଦିଲ୍ଲୀର ରାଉଜ ଆଭେନ୍ୟୁ କୋର୍ଟରୁ ଏକ ବଡ଼ ଝଟକା ଲାଗିଛି। ଦିଲ୍ଲୀ ଲିକର ପଲିସି ମାମଲାରେ ତିହାର ଜେଲରେ ହାଜର ହୋଇଥିବା କବିତାଙ୍କ ମଧ୍ୟବର୍ତ୍ତୀକାଳୀନ ଜାମିନ ଆବେଦନକୁ କୋର୍ଟ ପ୍ରତ୍ୟାଖ୍ୟାନ କରିଛନ୍ତି। ଗତ ମାସରେ ମଦ ନୀତି ମାମଲାରେ ବିଆରଏସ ନେତା କବିତାଙ୍କୁ ଗିରଫ କରାଯାଇଥିଲା। ଏପ୍ରିଲ ୨ରେ କୋର୍ଟ ତାଙ୍କୁ ୧୪ଦିନ ପାଇଁ ନ୍ୟାୟିକ ହେପାଜତକୁ ପଠାଇଥିଲେ। ସେ ଏପ୍ରିଲ ୧୫ପର୍ଯ୍ୟନ୍ତ ଜେଲରେ ରହିବାକୁ ଯାଉଛନ୍ତି।
ପୁଅର ପରୀକ୍ଷାକୁ ଦର୍ଶାଇ କବିତା ତାଙ୍କୁ ମଧ୍ୟବର୍ତ୍ତୀକାଳୀନ ଜାମିନ ପ୍ରଦାନ କରିବାକୁ କୋର୍ଟରେ ଆବେଦନ କରିଥିଲେ। ବିଆରଏସ ନେତାଙ୍କ ଆବେଦନ ଉପରେ ଶୁଣାଣି ବେଳେ ତାଙ୍କ ଓକିଲ ଯୁକ୍ତି ଦର୍ଶାଇଥିଲେ ଯେ କେ. କବିତାଙ୍କ ପୁଅର ପରୀକ୍ଷା ଏପ୍ରିଲ ମାସରେ ଆରମ୍ଭ ହେବାକୁ ଯାଉଛି। ତାଙ୍କର ୧୬ ବର୍ଷର ପୁଅ ପରୀକ୍ଷା ସମୟରେ ମା’ର ସମର୍ଥନ ଆବଶ୍ୟକ କରେ। ଓକିଲ ଆହୁରି କହିଛନ୍ତି ଯେ ଭାଇ କିମ୍ବା ବାପା ମା’ଙ୍କ ଅନୁପସ୍ଥିତିକୁ ପୂରଣ କରିପାରିବେ ନାହିଁ, ଏପରି ପରିସ୍ଥିତିରେ ତାଙ୍କୁ ମଧ୍ୟବର୍ତ୍ତୀକାଳୀନ ଜାମିନ ଦିଆଯାଉ।
ଶୁଣାଣି ସମୟରେ ଇଡି ପକ୍ଷରୁ ହାଜର ହୋଇଥିବା ଓକିଲ ଜୋହେବ ହୁସେନ କହିଛନ୍ତି ଯେ ଏହି ମାମଲାରେ କବିତା ମୁଖ୍ୟ ଅଭିଯୁକ୍ତ। ସେ ତାଙ୍କ ବିରୋଧରେ ଥିବା ପ୍ରମାଣକୁ ମୋବାଇଲ ଫୋନରେ ମିଳିଥିବା ପ୍ରମାଣକୁ ନଷ୍ଟ କରିଦେଇଛନ୍ତି। ଇଡିର ଓକିଲ ଦାବି କରିଛନ୍ତି ଯେ ଅନୁସନ୍ଧାନକାରୀ ସଂସ୍ଥା ଏହି ମାମଲାରେ ସଫଳତା ହାସଲ କରିବାକୁ ଯାଉଛି ଏବଂ କବିତାଙ୍କୁ ମଧ୍ୟବର୍ତ୍ତୀକାଳୀନ ଜାମିନ ପ୍ରଦାନ ତଦନ୍ତରେ ବାଧା ସୃଷ୍ଟି କରିବ। ସେ କହିଛନ୍ତି ଯେ କବିତାଙ୍କ ପୁଅର ୧୨ ଟି ପରୀକ୍ଷା ମଧ୍ୟରୁ ୭ଟି ସରିସାରିଛି। ସେ ଏକୁଟିଆ ନୁହଁନ୍ତି, କାରଣ ତାଙ୍କ ପିତା ଏବଂ ବଡ ଭାଇ ମଧ୍ୟ ତାଙ୍କ ସହିତ ଅଛନ୍ତି।