ଛତ୍ରପୁର,୨୪।୧୦(ଦିଲୀପ ସାମଲ): ଗଞ୍ଜାମ ଜିଲା ରମ୍ଭା ଥାନା ଅଧୀନ ବଡ଼ରାମପଲ୍ଲୀ ଗ୍ରାମ ନିକଟରେ କୋମଣ୍ଡ ଗ୍ରାମର କେ.ପଦ୍ମ ରେଡ୍ଡୀ ହତ୍ୟା ଘଟଣାରେ ପୋଲିସ ୫ଜଣ ଅଭିଯୁକ୍ତଙ୍କୁ ଗିରଫ କରିଛି। ଏପରି କି ପୋଲିସ ହତ୍ୟାକାଣ୍ଡରେ ବ୍ୟବହୃତ ଗୋଟିଏ ଖଣ୍ଡା, ଛୁରି ଏବଂ ମୋବାଇଲ ଫୋନ୍ ଜବତ କରିଛି। ଗିରଫ ଅଭିଯୁକ୍ତମାନେ ହେଲେ ରମ୍ଭା ଥାନା କୋମଣ୍ଡ ଗ୍ରାମର ରମେଶ ଚନ୍ଦ୍ର ବାରିକ, ଦିବାକର ବାରିକ, ପୁରୁଷୋତ୍ତମପୁର ଥାନା ସିକୁଳା ଗ୍ରାମର କୋକି ଓରଫ ନିରଞ୍ଜନ ମହାରଣା, ସମା ଗ୍ରାମର ପପୁ ବେହେରା ଏବଂ ନିମଖଣ୍ଡି ଥାନା ଗୁରୁଣ୍ଠି ଗ୍ରାମର ସୋନୁ ଓରଫ ସାଧୀନ କୁମାର ଦାସ ।
ସୂଚନାଯୋଗ୍ୟ, ଚଳିତ ମାସ ୨୧ ତାରିଖ ରାତିରେ କୋମଣ୍ଡ ଗ୍ରାମର କେ. ପଦ୍ମ ରେଡ୍ଡୀ ଏବଂ ଗୁଡିଝର ଗ୍ରାମର ନୃସିଂହନାଥ ପଣ୍ଡା ଘରକୁ ଆସୁଥିବା ବେଳେ ତାଙ୍କ ଉପରେ ଆକ୍ରମଣ ହୋଇଥିଲା। ଏଥିରେ କେ. ପଦ୍ମ ରେଡ୍ଡୀଙ୍କ ମୃତ୍ୟୁ ଘଟିଥିଲା। ନୃସିଂହନାଥ ଗୁରୁତର ଆହତ ହୋଇଥିଲେ। କୋମଣ୍ଡ ଗ୍ରାମର ଦୁଇ ଗୋଷ୍ଠୀଙ୍କ ମଧ୍ୟ୍ୟରେ ପୂର୍ବ ଶତ୍ରୁତା ସହ ଗ୍ରାମର ପାଣ୍ଠି ଟଙ୍କା ବ୍ୟବହାରକୁ ନେଇ ଏହି ହତ୍ୟାକାଣ୍ଡ ଘଟିଥିବା ପୋଲିସ ପକ୍ଷରୁ କୁହାଯାଇଛି। ହତ୍ୟାକାଣ୍ଡରେ ସମ୍ପୃକ୍ତ ଫେରାର ଅଭିଯୁକ୍ତଙ୍କୁ ଗିରଫ କରାଯିବ ବୋଲି ରମ୍ଭା ପୋଲିସ ପକ୍ଷରୁ କୁହାଯାଇଛି।